ព័ត៌មានជាតិ

អគារទីស្ដីការក្រសួងមហាផ្ទៃ សម្រេចការសាងសង់បានជាង ៩៨ ភាគរយ ហើយ

បានផុស

២ years មុន

នៅ

ថ្ងៃអង្គារ ១ សីហា ២០២៣

ដោយ

ដំណើរការសាងសង់អគារទីស្ដីការក្រសួងមហាផ្ទៃ សម្រេចបានជាង ៩៨ ភាគរយ ហើយ ខណៈអគារនេះ បើកការដ្ឋានសាងសង់កាលពីថ្ងៃទី ១១ ខែវិច្ឆិកា ឆ្នាំ ២០២១ កន្លងទៅ ក្រោមអធិបតីភាព សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោកជំទាវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីរសៀលថ្ងៃទី ៣១ ខែកក្កដា ឆ្នាំ ២០២៣ នេះ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានបន្តអញ្ជើញចុះពិនិត្យវឌ្ឍនភាព នៃដំណើរការសាងសង់អគារទីស្ដីការក្រសួងមហាផ្ទៃ។

នាឱកាសនោះដែរ លោកឧកញ៉ា ទូច គីម អគ្គនាយកក្រុមហ៊ុនគីមិច ក្រុមហ៊ុន គីម ម៉ិច ខនស្ត្រាក់សិន អ៊ិនវេសមេន បានធ្វើសេចក្ដីរាយការណ៍ជូន សម្ដេចក្រឡាហោម ថា «ដំណើរការសាងសង់អគារទីស្ដីការក្រសួងមហាផ្ទៃ សម្រេចបានជាង ៩៨ ភាគរយ ហើយក្រុមហ៊ុនកំពុងឈានទៅបង្ហើយការសាងសង់ប្រកបដោយទំនួលខុសត្រូវខ្ពស់»។

សូមជម្រាបថា អគារទីស្ដីការក្រសួងមហាផ្ទៃ មានទំហំ ១៥៣ ម៉ែត្រ គុណ ៨៣ ម៉ែត្រ និងកម្ពស់ ៩ ជាន់ មិនរាប់បញ្ចូលជាន់ផ្ទាល់ដី និងជាន់សម្រាប់ចំណតរថយន្តដែលអាចចតរថយន្តក្នុងអគារបាន សរុបចំនួន ៣៣០ គ្រឿង។ ចំពោះប្លង់ស្ថាបត្យកម្ម នៃអគារទីស្ដីការថ្មីរបស់ក្រសួងមហាផ្ទៃ ជាប្រភេទស្ថាបត្យកម្ម ក្លាសិក រចនាបថខ្មែរ ដំបូលប្រក់ក្បឿងស្រកាលិញ មានបុស្បុកចំនួនប្រាំ លំនាំតាមប្រាសាទអង្គរវត្តកំពូលប្រាំ អនុលោមតាមគោលការណ៍សមាមាត្រ នៃរូបរាងអគារ និងគិតគូរយ៉ាងហ្មត់ចត់អំពីពន្លឺ និងខ្យល់ធម្មជាតិ ប្រកបដោយផាសុកភាព ស័ក្ដិសមជាទីកន្លែងធ្វើការបែបសម័យទំនើប៕

អត្ថបទ ៖ ពិសី