ADB អនុម័តប្រាក់កម្ចី ១00 លានដុល្លារ លើកកម្ពស់សមត្ថភាពកម្លាំងពលកម្ម​នៅកម្ពុជា

ធនាគារអភិវឌ្ឍន៍អាស៊ី (ADB) បានសម្រេចអនុម័តប្រាក់កម្ចីចំនួន ១០០ លានដុល្លារ ដើម្បីដោះស្រាយគម្លាត និងកង្វះខាតជំនាញ តាមរយៈកំណែទម្រង់ វិនិយោគលើការអប់រំ បណ្តុះបណ្តាលបច្ចេកទេស និងវិជ្ជាជីវៈ (TVET) រួមជាមួយនឹងការចូលរួមសហការពីវិស័យឯកជន បន្ថែមទៀតផងដែរ។

យោងតាមការចេញផ្សាយរបស់ធនាគារអភិវឌ្ឍន៍អាស៊ី ប្រចាំនៅកម្ពុជា នៅថ្ងៃទី ០១ ខែសីហា ឆ្នាំ ២០២៣ បានបង្ហាញថា សម្រាប់ការអភិវឌ្ឍវិស័យសេដ្ឋកិច្ចនាពេលអនាគត នឹងជួយប្រែក្លាយកម្ពុជា ទៅជាសេដ្ឋកិច្ច​ឧស្សាហកម្មដែលផ្អែកលើចំណេះដឹង និងជំរុញវិស័យបច្ចេកវិទ្យា តាមរយៈការពង្រឹងធនធានមនុស្ស ដោយផ្តោត​លើការលើកកម្ពស់បរិយាកាសអភិវឌ្ឍន៍ជំនាញរបស់ប្រទេស និងផ្តល់នូវបរិយាបន្នដែលនាំមុខដោយឧស្សាហកម្ម និងការកៀរគរមូលនិធិបន្ថែមសម្រាប់ការអភិវឌ្ឍជំនាញដែលផ្ដោតលើតម្រូវការ។

លោកស្រី Jyotsana Varma នាយិកានៃធនាគារអភិវឌ្ឍន៍អាស៊ីប្រចាំប្រទេសកម្ពុជា មានប្រសាសន៍ថា ^«ការកែ​ទម្រង់​កម្លាំងពលកម្មរបស់កម្ពុជា និងការធ្វើទំនើបកម្មសេដ្ឋកិច្ច ទាមទារឱ្យមានកំណែទម្រង់ជាបន្តបន្ទាប់នៃប្រព័ន្ធ TVET (Technical and Vocational Education and Training ) តាមរយៈយុទ្ធសាស្ត្រស៊ីជម្រៅ និងការវិនិយោគជាបន្តបន្ទាប់ដែលមានពេលវេលាគ្រប់គ្រាន់។ កំណែទម្រង់រចនាសម្ព័ន្ធ និងស្ថាប័ន TVET ទាំងនេះ មានសារសំខាន់ក្នុងការរៀបចំកម្មវិធីបណ្តុះបណ្តាលដែលឆ្លើយតបនឹងតម្រូវការទីផ្សារ ធ្វើឱ្យប្រសើរឡើង​នូវកន្លែង​បណ្តុះបណ្តាលនិងឧបករណ៍ និងពង្រីកមូលនិធិអភិវឌ្ឍជំនាញ (SDF)^»។

ដើម្បីឆ្លើយតបទៅនឹងបញ្ហាប្រឈមសំខាន់ៗចំនួនបីរួមមាន៖ កង្វះកម្មវិធីអភិវឌ្ឍន៍ជំនាញដែលផ្តោត និងស៊ីជម្រៅ​សម្រាប់បដិវត្តន៍ឧស្សាហកម្មទីបួន, តួនាទីរបស់វិស័យឯកជននៅមានកម្រិតក្នុងការអភិវឌ្ឍន៍ជំនាញ និងចក្ខុវិស័យ​ផ្លាស់ប្តូរនៃឧស្សាហកម្ម, ហិរញ្ញវត្ថុមិនគ្រប់គ្រាន់និងភាពជាដៃគូក្នុងជំនាញ។ ការអភិវឌ្ឍនេះទៀតសោត រួមបញ្ជូល​គ្នាបញ្ហាប្រឈមទាំងនេះ ដើម្បីកំណត់នូវលទ្ធភាពការងារ និងផលិតភាពនៃកម្លាំងពលកម្មបច្ចុប្បន្ន និងអនាគត ដែលអាចរារាំងប្រទេសកម្ពុជាពីការធ្វើពិពិធកម្ម និងការផ្លាស់ប្តូរទៅជាសេដ្ឋកិច្ចផ្អែកលើចំណេះដឹង។

សូមបញ្ជាក់ថា កម្មវិធីនេះ ជាធាតុផ្សំដ៏សំខាន់នៃការគាំទ្ររបស់ ADB សម្រាប់រដ្ឋាភិបាលក្នុងការពង្រឹងធនធានមនុស្ស អភិវឌ្ឍវិស័យឯកជន និងទីផ្សារការងារ ដែលស្របតាមផែនការ និងយុទ្ធសាស្ត្រអភិវឌ្ឍរួមរបស់រដ្ឋាភិបាល ក៏ដូចជាយុទ្ធ​សាស្ត្រភាពជាដៃគូរបស់ ADB សម្រាប់កម្ពុជា ឆ្នាំ ២០១៩-២០២៣៕

 អត្ថបទ៖ ផល ធារិត