សម្ដេចតេជោ ហ៊ុន សែន ៖ សមាជិកគណៈរដ្ឋមន្ត្រីថ្មី គឺមានសញ្ញាបត្របណ្ឌិតជិតពាក់កណ្ដាល

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបញ្ជាក់ថា សមាជិកគណៈរដ្ឋមន្ត្រីនៅក្នុងអាណត្តិទី ៧ ដែលនឹងត្រូវតែងតាំងនាពេលឆាប់ៗនេះ គឺមានសញ្ញាបត្របណ្ឌិតជិតពាក់កណ្ដាល។ ការបញ្ជាក់របស់សម្ដេចតេជោ ហ៊ុន សែន បានធ្វើឡើងក្នុងពិធីសម្ពោធដាក់ឲ្យប្រើប្រាស់ផ្លូវក្រវាត់ក្រុងទី ៣ នាព្រឹកថ្ងៃទី ៣ ខែសីហា ឆ្នាំ ២០២៣នេះ។  

សម្ដេចតេជោ ហ៊ុន សែន​ បានថ្លែងថា សមាជិកគណៈរដ្ឋមន្ត្រីថ្មី ដែលនឹងត្រូវតែងតាំងក្នុងអាណត្តិទី ៧ នេះ គឺមានបណ្ឌិតជិតពាក់កណ្ដាល។ ក្នុងនោះ សម្ដេចតេជោ ហ៊ុន សែន បានថ្លែងអំណរគុណដល់លោកបណ្ឌិត អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដែលបានជួយបណ្ដុះបណ្ដាលកូនៗរបស់សម្ដេច។

សម្ដេចតេជោ ហ៊ុន សែន ថ្លែងបែបនេះថា «ហើយសូមបញ្ជាក់ថា បណ្ឌិតជិតពាក់កណ្ដាល ដែលនៅក្នុងរដ្ឋាភិបាលថ្មីនេះ ហើយអរគុណណាស់ចំពោះឯកឧត្ដម អូន ព័ន្ធមុនីរ័ត្ន ដែលបានជួយបណ្ដុះបណ្ដាលកូនខ្ញុំទាំង ៣នាក់ ព្រោះខ្ញុំផ្ញើឲ្យបណ្ដុះបណ្ដាល»៕