រដ្ឋមន្រ្តីពាណិជ្ជកម្មកម្ពុជា ស្នើអាមេរិកបន្តប្រព័ន្ធអនុគ្រោះពន្ធ GSP ឡើងវិញ

តំណាងរាជរដ្ឋាភិបាលកម្ពុជា លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានស្នើដល់សភាអាមេរិក បន្តផ្តល់​ប្រព័ន្ធអនុគ្រោះពន្ធ GSP ដល់កម្ពុជាឡើងវិញ ដើម្បីពង្រឹងកិច្ចសហប្រតិបត្តិការពាណិជ្ជកម្មរវាងប្រទេសទាំងពីរ ដោយ​ផ្ដល់ផលចំណេញឱ្យគ្នាទៅវិញទៅមក។

ការស្នើរបស់រដ្ឋមន្រ្តីក្រសួងពាណិជ្ជកម្ម ធ្វើឡើងនៅក្នុងកិច្ចពិភាក្សាការងារជាមួយគណៈប្រតិភូនៃសភាអាមេរិក ដឹកនាំ​ដោយលោក Jason Smith ប្រធានគណៈកម្មាធិការស្តីពីរបៀប និងមធ្យោបាយនៃសភាអាមេរិក កាលពីថ្ងៃទី ០២ សីហា នៅរាជធានីភ្នំពេញ។

ប្រព័ន្ធអនុគ្រោះពន្ធទូទៅរបស់សហរដ្ឋអាមេរិក ដែលហៅកាត់ជាភាសាអង់គ្លេសថា GSP (Generalized System of Preferences) បានផុតសុពលភាពពីកម្ពុជា ចាប់ពីថ្ងៃទី៣១ ខែធ្នូ ឆ្នាំ២០២០មក។

GSP ជាប្រភេទប្រព័ន្ធអនុគ្រោះពន្ធ ដែលអនុញ្ញាតឱ្យមានការនាំចូលទំនិញដោយមិនបង់ពន្ធ។ ប្រព័ន្ធអនុគ្រោះពន្ធ GSP នេះ អាចអនុញ្ញាតឱ្យកម្ពុជា នាំទំនិញ និងផលិតផលរាប់ពាន់មុខ ទៅកាន់ទីផ្សារអាមេរិក។ ប៉ុន្តែកម្ពុជា ពុំមានទំនិញ និងផលិតផលច្រើនមុខបែបនេះទេ ពោលគឺភាគច្រើននាំចេញទៅទីផ្សារមេរិក មានដូចជា សម្លៀកបំពាក់ ស្បែកជើង និងទំ​និញធ្វើដំ​ណើរ ជាដើម។ កម្ពុជា ទទួលបានប្រព័ន្ធអនុគ្រោះពន្ធ GSP ពីអាមេរិកតាំងឆ្នាំ១៩៩៧មក។

ទន្ទឹមនឹងនេះ លោក ប៉ាន សូរស័ក្តិ បានអំពាវនាវឱ្យក្រុមហ៊ុនអាមេរិកមកបណ្ដាក់ទុនវិនិយោគនៅកម្ពុជា ឱ្យបានច្រើន​បន្ថែមទៀត ដើម្បីកាត់បន្ថយឱនភាពពាណិជ្ជកម្មរវាងប្រទេសទាំងពីរ ក៏ដូចជាដើម្បីទាញ​យកផលចំណេញ​ពីគ្នាទៅ​វិញទៅមក។

ដោយឡែកវឌ្ឍនភាពថ្មីៗក្នុងការពង្រីកទីផ្សាររបស់កម្ពុជា លោករដ្ឋមន្រ្តីបានបញ្ជាក់ថា មានដូចជា ការចុះហត្ថលេខាលើ​កិច្ចព្រមព្រៀងពាណិជ្ជកម្មសេរីតំបន់ និងទ្វេភាគី និងការរៀបចំបរិយាកាសធុរកិច្ច ដើម្បីទាក់ទាញការវិនិយោគ​ឱ្យបានរឹត​តែច្រើនបន្ថែមទៀត។

សូមបញ្ជាក់ថា នៅក្នុងឆមាសទី១ ឆ្នាំ ២០២៣នេះ កម្ពុជា និងអាមេរិក មានទំហំពាណិជ្ជកម្មប្រមាណ ៤.៣​ពាន់លាន​ដុល្លារ មានការថយចុះចំនួន ៩.៦ភាគរយ បើធៀបនឹងរយៈពេលដូចគ្នាកាលពីឆ្នាំ ២០២២។ ក្នុងនោះ កម្ពុជា នាំចេញ​ទៅអាមេរិកសម្រេចបានជាង ៤.២ពាន់លានដុល្លារ និងនាំចូលមកវិញមានចំនួនជាង ១១៩លានដុល្លារ។ នេះបើយោង​តាម​របាយការណ៍អគ្គនាយកដ្ឋានគយ និងរដ្ឋាករកម្ពុជា៕