អគ្គនាយកដ្ឋាន​អន្តោប្រវេសន៍ដឹក​នាំ​ដោយ នាយឧត្តមសេនីយ គៀត ច័ន្ទថារិទ្ធ មាន ៨ នាយកដ្ឋាន​ចំណុះ

អគ្គនាយកដ្ឋាន​អន្តោប្រវេសន៍ដឹក​នាំ​ដោយនាយឧត្តមសេនីយ គៀត ច័ន្ទថារិទ្ធ។ រចនាសម្ព័ន្ធ​ការងារ​របស់​អគ្គនាយកដ្ឋាន​អន្តោប្រវេសន៍មាន ៨ នាយកដ្ឋាន​ចំណុះ។

នាយឧត្តមសេនីយ គៀត ច័ន្ទថារិទ្ធ អគ្គនាយកអន្តោប្រវេសន៍

អគ្គនាយកដ្ឋាន​អន្តោប្រវេសន៍មានតួនាទី​ធ្វើជា​សេនាធិការ​ជូន​រដ្ឋមន្ត្រី​ក្រសួងមហាផ្ទៃ ដែល​មាន​ភារកិច្ច​ដូច​ខាង​ក្រោម៖

– សិក្សា រៀបចំ កសាង​ពង្រឹង​ច្បាប់ អនុក្រឹត្យ លិខិត​បទដ្ឋាន​គតិយុត្ត គោលនយោបាយ​និង​ផែនការ យុទ្ធសាស្ត្រ​ជាតិ​និង​វិធានការ​នានា​សំដៅ​លើក​កម្ពស់​ប្រសិទ្ធភាព​នៃ​ការ​គ្រប់គ្រង​កិច្ចការ​អន្តោប្រវេសន៍​និង​កិច្ចការ​ជនភៀសខ្លួន

– ដឹកនាំ​គ្រប់គ្រង​ការ​ធ្វើដំណើរ​ឆ្លងកាត់​ច្រកទ្វារ​អន្តរជាតិ និង​ច្រកទ្វារ​ព្រំដែន​អន្តរជាតិ​ទាំងអស់

– ដឹកនាំ​គ្រប់គ្រងការ​ស្នាក់នៅ គ្រប់គ្រង​ស្ថិតិ​របស់​ជនបរទេស​មិនមែន​អន្តោប្រវេសន្ត ជនបរទេស អន្តោប្រវេសន្ត ជនបរទេស​អន្តោប្រវេសន្ត​ជា​អ្នកវិនិយោគឯកជន ជនបរទេស​សុំសិទ្ធិ​ជ្រកកោន ជន​ភៀសខ្លួន​និង​ជនជាតិ​ខ្មែរ​ធ្វើ​មាតុភូមិ​និវត្តន៍​តាម​ច្បាប់​ជាតិ អន្តរជាតិ​ជា​ធរមាន

– លើក​គោលការណ៍ និង​វិធានការ​បង្ការ ទប់ស្កាត់ ស្រាវជ្រាវ និង​បង្ក្រាប​បទល្មើស​អន្តោប្រវេសន៍ បទល្មើស​ឧក្រិដ្ឋកម្ម​ឆ្លងដែន បទល្មើសប៉ះពាល់​ដល់​សន្តិសុខជាតិ និង​សុវត្ថិភាព​សង្គម ដែល​បង្ក​ឡើង​ដោយ​ជនបរទេស​និង​ជនពាក់ព័ន្ធ

– គ្រប់គ្រង​ការងារ​ទិដ្ឋាការ​ចូល​គ្រប់​ប្រភេទ​ដល់​ជនបរទេស​តាម​ច្រកទ្វារ​អន្តរជាតិ និង​ច្រកទ្វារ​ព្រំដែន​អន្តរជាតិ។ ការកំណត់​លក្ខណៈ​សម្បត្តិ​ដែលអាចផ្តល់ទិដ្ឋាការចេញ-ចូលមួយដង ឬច្រើនដង ឬ​ដែល​មិន​អាច​ផ្តល់ទិដ្ឋាការ​ចូល​ព្រះរាជាណាចក្រកម្ពុជា ត្រូវ​កំណត់​ដោយ​ប្រកាស​របស់​រដ្ឋមន្ត្រី​ក្រសួង​មហាផ្ទៃ

– គ្រប់គ្រង​ការងារ​ពន្យារ​ទិដ្ឋាការបន្តការស្នាក់នៅរបស់ជនបរទេស ដែលកាន់លិខិតឆ្លងដែនធម្មតា ។ ការកំណត់​លក្ខណៈសម្បត្តិ​ដែល​អាចពន្យារទិដ្ឋាការ ឬមិន​អាច​ពន្យារ​ទិដ្ឋាការ​បន្តការ​ស្នាក់នៅ​ក្នុង​ព្រះរាជាណាចក្រ​កម្ពុជា ត្រូវ​កំណត់​ដោយ​ប្រកាស​របស់​រដ្ឋមន្ត្រី​ក្រសួងមហាផ្ទៃ

– តាមការ​ប្រគល់សិទ្ធិពី​រដ្ឋមន្ត្​រីក្រសួងមហាផ្ទៃ អគ្គនាយកដ្ឋាន​អន្តោប្រវេសន៍ មានភារកិច្ច​សហការ ជាមួយ​ឧត្តមស្នងការ​អង្គការ​សហប្រជាជាតិទទួលបន្ទុកជនភៀសខ្លួន អនុវត្តការងារ​ជនភៀសខ្លួន​ស្របតាម​អនុសញ្ញាអន្តរជាតិឆ្នាំ១៩៥១ និងពិធីសារឆ្នាំ១៩៦៧ ទាក់ទិន​ទៅនឹង​ឋានៈ​នៃ​ជន​ភៀសខ្លួន ដែល​ព្រះរាជាណាចក្រកម្ពុជា​ចូលជា​សមាជិក

– តាមការប្រគល់​សិទ្ធិពីរដ្ឋមន្ត្រីក្រសួង​មហាផ្ទៃ អគ្គនាយកដ្ឋានអន្តោប្រវេសន៍ មាន​ភារកិច្ច​សហការ ជាមួយ​ក្រសួង​ការងារ​បណ្តុះបណ្តាល​វិជ្ជាជីវៈ ឬ​និង​អគ្គនាយកដ្ឋាន​ពាក់ព័ន្ធ​ដើម្បី​គ្រប់គ្រង​ត្រួត​ពិនិត្យ​កម្មករ និយោជិត​បរទេស​ក្នុងព្រះរាជាណាចក្រកម្ពុជា និង​កម្មករ​និយោជិត​ខ្មែរ​ដែល​ទៅធ្វើ​ការងារ​ក្រៅប្រទេស
– លើក​សំណើ​ជូន​រដ្ឋមន្ត្រី​ក្រសួង​មហាផ្ទៃ ដើម្បី​ពិនិត្យ​សម្រេច​ក្នុង​ការ​បណ្ដេញ​ជនបរទេស​ដែល​រំលោភ​ច្បាប់​ជា​ធរមាន​ចេញពី​ព្រះរាជាណាចក្រ​កម្ពុជា

– កសាង​ប្រព័ន្ធ​គ្រប់គ្រង​ទិន្នន័យ​អន្តោប្រវេសន៍​តាម​បច្ចេកវិទ្យា

– លើក​យោបល់​ជូន​រដ្ឋមន្ត្រី​ពិនិត្យ​សម្រេច​លើ​សំណើ​សុំ​ប័ណ្ណ​ស្នាក់នៅ​អចិន្ត្រៃយ៍ និង​សំណើ​សុំ​ពន្យារ​សុពលភាព​ប័ណ្ណ​ស្នាក់​នៅ​អចិន្ត្រៃយ៍ សម្រាប់​ជនបរទេស​អន្តោប្រវេសន្ត​ស្របច្បាប់ ជនបរទេស​អន្តោប្រវេសន្ត និង​ជនបរទេស​ដែល​ទទួល​ឋានៈ​ជា​ជនភៀសខ្លួន​ស្របច្បាប់​ជា​អ្នក​វិនិយោគ​ឯកជន

– ត្រួតពិនិត្យ និង​ផ្តល់លិខិត​ធ្វើដំណើរ​សម្រាប់​ជនបរទេស​អន្តោប្រវេសន៍​ស្របច្បាប់ ​ជនបរទេស​អន្តប្រវេសន្ត​ជា​អ្នកវិនិយោគ​ឯកជន និង​ជនភៀសខ្លួន

– ដឹកនាំ​ត្រួតពិនិត្យ​ការផ្តល់ប័ណ្ណឆ្លងព្រំដែន​ដល់​ប្រជាពលរដ្ឋខ្មែរ ដែលរស់នៅ​ជាប់​តំបន់​ព្រំដែន​និង​ផ្តល់​លិខិត​ធ្វើដំណើរ​សម្រាប់​ពលរដ្ឋ​ខ្មែរ​ធ្វើ​មាតុភូមិនិវត្តន៍

– គ្រប់គ្រង​ទីកន្លែង​ត្រៀមបណ្តេញចេញ​ចំពោះជនបរទេសធ្វើឱ្យប៉ះពាល់ដល់សន្តិសុខ សណ្តាប់​ធ្នាប់​សង្គម រង់ចាំ​ការបំពេញបែបបទ​បណ្តេញចេញ ឬបញ្ជូនទៅតុលាការតាម​នីតិវិធីច្បាប់

– តាមការ​ប្រគល់​សិទ្ធិរបស់​រដ្ឋមន្ត្រី​ក្រសួង​មហាផ្ទៃ អគ្គនាយកដ្ឋាន​អន្តោប្រវេសន៍ ទំនាក់ទំនង​និង សហការ​ជាមួយ​អង្គការ​អន្តរជាតិ សង្គម​ស៊ីវិល ដៃគូ​អភិវឌ្ឍន៍ បណ្តា​ប្រទេស​ជាមិត្ត និង​វិស័យ​ឯកជន​នានា ដើម្បីផ្លាស់ប្ដូរ​បទពិសោធន៍ ជំនួយ​បច្ចេកទេស ជំនួយ​ឧបករណ៍ សម្ភារ​ផ្សេងៗ និង​ការងារ​ពាក់ព័ន្ធ​ដទៃទៀត ដើម្បី​សម្រួល​និងគាំទ្រដល់ការងារជំនាញអន្តោប្រវេសន៍

– ត្រួតពិនិត្យ និង​ផ្ដល់​លិខិត​បញ្ជាក់​ប្រវត្តិ​ទោស និង​លិខិត​បញ្ចាក់ការ​បាត់លិខិត​ឆ្លងដែន ឬ​ឯកសារ ធ្វើ​ដំណើរ​ផ្សេងៗ របស់​ជនបរទេសក្នុងរយៈពេលស្នាក់នៅ និងធ្វើការ​ក្នុង​ព្រះរាជាណាចក្រ​កម្ពុជា
– គ្រប់គ្រង​ទិន្នន័យ​ជនបរទេស​ដែលជាប់​ពន្ធនាគារ និង​ជនបរទេស​ដែល​ជួប​គ្រោះថ្នាក់​ផ្សេងៗ​នៅ​ក្នុង​ព្រះរាជាណាចក្រកម្ពុជា

– បង្កើត​គេហទំព័រ​របស់​អគ្គនាយកដ្ឋាន​អន្តោប្រវេសន៍ ដើម្បី​ផ្សព្វផ្សាយ​ព័ត៌មាន​និង​ទទួល​ឆ្លើយតប ព័ត៌មាន​ផ្សេងៗ

– សម្របសម្រួល​និង​សហការ​ជាមួយអគ្គស្នងការដ្ឋាននគរបាលជាតិ និង​អគ្គនាយកដ្ឋាននានា​ចំណុះ ក្រសួង​មហាផ្ទៃ ដើម្បីបំពេញ​ភារកិច្ច​តាមតួនាទីភារកិច្ចរបស់ខ្លួន

– ដឹកនាំ​គ្រប់គ្រង​មន្ត្រីអន្តោប្រវេសន៍​ទាំង​នៅអគ្គនាយកដ្ឋានអន្តោប្រវេសន៍ និង​មន្ត្រីបម្រើការងារ អន្តោប្រវេសន៍​នៅថ្នាក់​ក្រោមជាតិ អនុវត្តឱ្យបានត្រឹមត្រូវ​តាមច្បាប់ អនុក្រឹត្យ និង​លិខិតបទដ្ឋាន​គតិយុត្ត

– ស្នើ​តែងតាំង ឬផ្លាស់ប្តូរភារកិច្ច លើកសរសើរ និងការអនុវត្តវិន័យមន្ត្រីអន្តោប្រវេសន៍ ជូនរដ្ឋមន្ត្រី ក្រសួងមហាផ្ទៃ ពិនិត្យសម្រេច

– រៀបចំ​ផែនការ​បណ្ដុះបណ្តាល​កសាង​ធនធាន​មនុស្ស ដើម្បី​ពង្រឹង​សមត្ថភាព​ជំនាញ​វិជ្ជាជីវៈ ភាសា បរទេស​ដល់​មន្ត្រី​អន្តោប្រវេសន៍

– ធ្វើ​របាយការណ៍​បូកសរុប​លទ្ធផល​ការងារ និង​ទិសដៅ​បន្ត​របស់​អគ្គនាយកដ្ឋាន​អន្តោប្រវេសន៍ តាម​ការ​កំណត់​ជូន​រដ្ឋមន្ត្រី​ក្រសួងមហាផ្ទ

– ទទួល​អនុវត្ត​ភារ​កិច្ច និង​សិទ្ធិ​ផ្សេងៗ​ទៀត​ដែល​រដ្ឋមន្ត្រី​ក្រសួង​មហាផ្ទៃ​ប្រគល់​ឱ្យ

អគ្គនាយកដ្ឋាន​អន្តោប្រវេសន៍ដឹកនាំ​ដោយអគ្គនាយក​មួយរូប និងមាន​អគ្គនាយករងជាជំនួយការតាមការកំណត់។

អគ្គនាយកដ្ឋានអន្តោប្រវេសន៍មានរចនាសម្ព័ន្ធដូចខាងក្រោម៖

១- នាយកដ្ឋានរដ្ឋបាលសរុប
២- នាយកដ្ឋានជនបរទេស មិនមែនអន្តោប្រវេសន្តនិងបច្ចេកវិទ្យា
៣- នាយកដ្ឋានជនបរទេសអន្តោប្រវេសន្ត
៤- នាយកដ្ឋានជនបរទេសអន្តោប្រវេសន្ត ជាអ្នកវិនិយោគឯកជន
៥- នាយកដ្ឋានច្រកទ្វារទី១ (​គ្រប់គ្រង​ច្រកទ្វារ​ព្រំដែនអន្តរជាតិ ​ជាប់​ជាមួយ​ព្រះរាជាណាចក្រកម្ពុជា​ថៃ សាធារណៈរដ្ឋ​ប្រជាមានិត​ឡាវ និង​ច្រកទ្វារ​អាកាសយានដ្ឋាន​អន្តរជាតិ)
៦- នាយកដ្ឋានច្រកទ្វារទី២ (​គ្រប់គ្រង​ច្រកទ្វារ​ព្រំដែន​អន្តរជាតិ ជាប់​ជាមួយ​សាធារណៈរដ្ឋសង្គមនិយមវៀតណាម និង​បណ្តា​ច្រកទ្វារ​កំពង់ផែ​អន្តរជាតិ)
៧- នាយកដ្ឋានស៊ើបអង្កេត និងអនុវត្តនីតិវិធី
៨- នាយកដ្ឋានជនភៀសខ្លួន។

ការរៀបចំ​តួនាទី ភារកិច្ច រចនាសម្ព័ន្ធ​និង​របៀបរបប​ធ្វើការងារ​របស់​ការិយាល័យ​ចំណុះ​ឱ្យ​នាយកដ្ឋាន​នៃ​អគ្គនាយកដ្ឋាន​អន្តោប្រវេសន៍ ត្រូវ​កំណត់​ដោយ​ប្រកាស​របស់​រដ្ឋមន្ត្រី​ក្រសួង​មហាផ្ទៃ​៕