សមាគមឧកញ៉ា នឹងរៀបចំវេទិកាធុរកិច្ចកម្ពុជាឆ្នាំ ២០២៣​ បង្ហាញពីបច្ចុប្បន្នភាពពាណិជ្ជកម្ម និងបញ្ហាប្រឈមនានា

សមាគមឧកញ៉ា នឹងរៀបចំវេទិកាធុរកិច្ចកម្ពុជាឆ្នាំ ២០២៣​ ក្នុងគោលបំណង ដើម្បីពិភាក្សាអំពីបច្ចុប្បន្នភាព​នៃបរិយាកាសពាណិជ្ជកម្ម និងវិនិយោគនៅកម្ពុជា ដោយផ្តោតលើបញ្ហាប្រឈម និងឱកាស ជាពិសេសលើវិស័យ​សំខាន់ៗ មួយចំនួនដូចជា វិស័យកសិកម្ម ទេសចរណ៍ និងបដិសណ្ឋារកិច្ច វិស័យកម្មន្តសាល និងភស្តុភារកម្ម វិស័យសំណង់ និងអចលនទ្រព្យ ជាដើម។

សមាគមឧកញ៉ាកម្ពុជា បានបញ្ជាក់ថា ឧកញ៉ាទាំងអស់ដែលចូលរួម ក៏នឹងមានឱកាសបង្កើតទំនាក់ទំនងកាន់តែ​ទូលំទូលាយ និងពិភាក្សាគ្នាឱកាសវិនិយោគសក្តានុពលផ្សេងៗផងដែរ។

កម្មវិធីនេះ នឹងចាប់ផ្តើមនៅថ្ងៃទី ១១ សីហា ឆ្នាំ ២០២៣ ខាងមុខ ពោលគឺក្រោមប្រធានបទ ««វេទិកាធុរកិច្ចឆ្នាំ២០២៣ និងពិធីពិសា​អា​ហារសាមគ្គី» នៅសណ្ឋាគារ ហ្កាឌិន ស៊ីធី ក្រោមអធិបតីភាពលោក សុខ ចិន្តាសោភា រដ្ឋមន្រ្តីអមនាយក​រដ្ឋមន្រ្តី អគ្គលេខាធិការក្រុមប្រឹក្សាអភិវឌ្ឍន៍កម្ពុជា។

លើសពីនេះទៀត កម្មវិធីនេះ នឹងផ្សព្វផ្សាយបន្ថែមអំពីទស្សនវិស័យ និងបេសកកម្មរបស់សមាគមឧកញ៉ាកម្ពុជា ក៏ដូចជា​ជំរុញលើកកម្ពស់ការធ្វើពាណិជ្ជកម្ម និងការវិនិយោគនៅកម្ពុជា រួមទាំងរឹតចំណងសាមគ្គីភាពក្នុង​ចំណោម​ថ្នាក់ដឹកនាំ​សមាជិក​សមាជិកាសមាគម និងថ្នាក់ដឹកនាំមន្ត្រីនៃក្រុមប្រឹក្សាអភិវឌ្ឍន៍កម្ពុជា ក៏ដូចជាការពង្រឹងកិច្ចសហប្រតិ​បត្តិការ​ជាមួយ អនុព័ន្ធពាណិជ្ជកម្មនៃតំណាងស្ថានទូតនានាប្រចាំនៅកម្ពុជា និងតំណាង​ស្ថាប័នឯកជន​សំខាន់ៗមួយ​ចំនួន​ផងដែរ៕