រដ្ឋាករទឹកបាត់ដំបងបញ្ជាក់ថា ការប្រែពណ៌ទឹកស្ទឹងសង្កែ ពិតជារងនូវការបំពុលពិតមែន

បន្ទាប់ពីមានការបង្ហោះចែករំលែករូបភាពនៅលើបណ្តាញសង្គមតៗគ្នា ជុំវិញករណីទឹកប្រែប្រួលពណ៌ប្លែកខុស​ពីធម្មតានោះ នៅថ្ងៃទី០៤ ខែសីហាឆ្នាំ២ ០២៣នេះ រដ្ឋាករទឹកខេត្តបាត់ដំបងបានបង្ហោះសារជូនដំណឹង ដោយ​បញ្ជាក់ថា ទឹកស្ទឹងសង្កែពិតជាទទួលរងនូវការបំពុលពិតប្រាកដមែន។

យោងតាមខ្លឹមសារដែលបង្ហោះរបស់អង្គភាពរដ្ឋាករទឹកខេត្តបាត់ដំបង បានឲ្យដឹងថា ដោយបានទទួលព័ត៌មាន​តាមបណ្តាញសង្គមចែករំលែកតៗគ្នា គិតត្រឹមនៅថ្ងៃ ទី០៣ខែ សីហា ឆ្នាំ២០២៣ អង្គភាពរដ្ឋាករទឹកបាត់ដំបង បានដុតដៃដុតជើងចុះទៅពិនិត្យស្ថានភាពជាក់ស្តែងនៃប្រភពទឹកធ្វើផលិតកម្មនៅស្ទឹងសង្កែជាលទ្ធផលបានពិនិត្យឃើញថា ទឹកស្ទឹងសង្កែពិតជាបា នទទួលរងនូវការបំពុលពិតប្រាកដមែន។

ដើម្បីដោះស្រាយបញ្ហាប្រឈមនៃការបំពុលប្រភពទឹកខាងលើ អង្គភាពរដ្ឋាករទឹកបាត់ដំបងបានចាត់តាំង​ក្រុមអ្នក​បច្ចេកទេសផ្នែក ត្រួតពិនិត្យគុណភាពទឹកនៅតាមបន្ទប់ពិសោធន៍ឲ្យនៅប្រចាំការតាមដានត្រួត ពិនិត្យគុណភាព​ទឹកជាប្រចាំ។ គិតត្រឹមម៉ោងនេះ ស្ថានភាពគុណភាពទឹកមានការប្រែពណ៌ប្លែកខុសពីធម្មតា ប៉ុន្តែចំពោះគុណភាព​ទឹកស្អាតវិញនៅតែរក្សាបានគុណភាពល្អអនុលោមតាមស្តង់ដារគុណភាពទឹកស្អាតរបស់អង្គភាពនៅឡើយ។

អង្គភាពរដ្ឋាករទឹកបាត់ដំបង សូមឱ្យពលរដ្ឋ កុំមានការបារម្ភទោះមានការប្រែប្រួលគុណភាពទឹកយ៉ាងណាទៀត អង្គភាព​រដ្ឋាករទឹកបាត់ដំបង នឹងធ្វើការជូនដំណឹងនៅពេលក្រោយ៕

អត្ថបទ ៖ ចាន់រ៉ា