“ផ្ទុះជំងឺអេដស៍ជាង ១ពាន់ករណី” ជារឿងមិនពិត ខណៈចំនួននៃការឆ្លងថយចុះ ៩១%

ក្រសួងសុខាភិបាល​ បានច្រានចោលទាំងស្រុងចំពោះព័ត៌មានមិនពិត ពីគណនីបណ្តាញទំនាក់ទំនងសង្គមហ្វេសប៊ុក NX Vanlyda ដែលបានបង្ហោះសារដោយមានខ្លឹមសារថា ជំងឺអេដស៍ផ្ទុះឡើងលើមនុស្សជាង ១ពាន់ បង្កឱ្យមានការ ភាន់ច្រឡំ ដល់សាធារណជន។ លើសពីនេះ ក្រសួងសុខាភិបាល ក៏បានព្រមានដល់ម្ចាស់គណនីហ្វេសប៊ុកខាងលើ បញ្ឈប់ការផ្សាយបែបនេះជាបន្តទៀត។ នេះបើតាមការប្រកាសរបស់ ក្រសួងសុខាភិបាល នៅយប់ថ្ងៃទី០៤ ខែសីហា។

កាលពី​ថ្ងៃទី២៨ ខែសីហា ឆ្នាំ២០២៣ តាមរយៈគណនីហ្វេសប៊ុកខាងលើ ដែលបានសរសេរថា “ជំងឺអេដស៍ ថ្ងៃនេះផ្ទុះឡើង ១ពាន់នាក់ជាងហើយ ឱជីវិតប្រពន្ធកូននៅផ្ទះទៅជាយ៉ាងណា បើប្តីលួចមានដៃគូច្រើន” នោះ ត្រូវបានមហាជនយល់ខុស និងបានចែករំលែកតៗគ្នា។ ហេតុនេះ ដើម្បីចូលរួមទប់ស្កាត់ការផ្សាយបែបបំភ័ន្តមិនពិតនេះ ក្រសួងសុខាភិបាល ក៏បានភ្ជាប់ជាមួយនឹងសេចក្តីលម្អិតស្ថានភាពនៃចំនួនអ្នកឆ្លង ក៏ដូចជាកិច្ចបន្តការព្យាបាលអ្នកផ្ទុក មេរោគអេដស៍ផងដែរ។

បើតាមរបាយការណ៍ឆ្នាំ២០២២ ការឆ្លងមេរោគអេដស៍ថ្មី ត្រូវបានកាត់បន្ថយចំនួនដល់ទៅ ៩១% បើធៀបទៅនឹងពេលវេលានៃការរីករាលដាលនៃមេរោគអេដស៍ខ្ពស់បំផុត ក្នុងឆ្នាំ១៩៩៦។ ដោយឡែក បើប្រៀបធៀបត្រឹមឆ្នាំ២០១០ គឺមានការថយចុះ ៣៣% ។ មួយវិញទៀត យោងតាមទិន្នន័យ របស់ក្រសួងសុខាភិបាល បង្ហាញថា នៅចុងឆ្នាំ២០២២ មនុស្សប្រមាណ ៧៦០០០ នៅផ្ទុកមេរោគអេដស៍នៅឡើយ។

គួរបញ្ជាក់ថា អាជ្ញាធរជាតិប្រយុទ្ធនឹងជំងឺអេដស៍ ក្រសួងសុខាភិបាល/មជ្ឈមណ្ឌលជាតិប្រយុទ្ធនឹងជំងឺអេដស៍ សើស្បែក និងកាមរោគ (NCHADS) និងការិយាល័យពហុប្រទេសនៃអង្គការ USAIDS នៃប្រទេសកម្ពុជា ឡាវ និងម៉ាឡេស៊ី ដែលមានមូលដ្ឋាននៅទីក្រុងភ្នំពេញ បានបន្តកិច្ចខិតខំប្រឹងប្រែង ធ្វើយ៉ាងណា កាត់បន្ថយការឆ្លងថ្មី។ ពិសេស ក្នុងចំណោមបុរស លុបបំបាត់ការចម្លងពីម្តាយទៅកូន និងទៅដល់កុមារដែលផ្ទុកមេរោគអេដស៍ ជាមួយនឹងសេវានានា៕