តើឧបករណ៍ភ្លេង Angklung ជារបស់​ប្រទេសណា?

Angklung ជាឧបករណ៍ភ្លេងរបស់ប្រទេសឥណ្ឌូណេស៊ី ដែលអាចប្រគុំជាបទភ្លេងសម្រាប់ច្រៀងបានយ៉ាងពីរោះ និងអាចលេងជាមួយឧបករណ៍តន្រ្ដីផ្សេងៗបានផងដែរ។

ឧបករណ៍មួយប្រភេទនេះមានប្រជាប្រិយភាពពាសពេញពិភពលោក ប៉ុន្តែវាមានដើមកំណើតពីខេត្ត West Java និងខេត្ត Banten ក្នុងប្រទេសឥណ្ឌូណេស៊ី ហើយត្រូវបានលេងដោយជនជាតិ ស៊ុនដា អស់រយៈពេលជាច្រើន​សតវត្សរ៍មកហើយ។ សំឡងរបស់ Angklung បានក្លាយជាផ្នែកមួយដ៏សំខាន់នៃអត្តសញ្ញាណ​វប្បធម៌​នៃសហគមន៍​ស៊ុនដា។

ឧបករណ៍មួយប្រភេទនេះ ត្រូវបានធ្វើឡើងដោយបំពង់ឫស្សីមួយគូ ឬច្រើនគូ ចងព្យូរក្នុងស៊ុមឬស្សី ដើម្បីបង្កើត​សំឡេងនៅពេលញ័រ ឬរង្គើ។ នៅថ្ងៃទី ១៨ ខែវិច្ឆិកា ឆ្នាំ ២០១០ អង្គការយូណេស្កូ (UNESCO) បានទទួលស្គាល់  Angklung ជាបេតិកភណ្ឌអរូបីនៃមនុស្សជាតិ។

នៅក្នុងការតាំងពិព័រណ៍ស្ដីពី ពាណិជ្ជកម្ម និងទេសចរណ៍ឥណ្ឌូណេស៊ី ^​ នៅកោះពេជ្រកាលពីថ្ងៃទី ០៤ សីហា ឆ្នាំ ២០២៣ ក្រុមកុមារ កុមារី ឥណ្ឌូណេស៊ី បានយកឧបករណ៍ Angklung នេះ មកប្រគុំធ្វើជាបទភ្លេង អមជាមួយ​នឹងហ្គីតា បានយ៉ាងពីរោះរណ្ដំ បង្ហាញដល់អ្នកចូលរួម។

សូមបញ្ជាក់ថា ឧបករណ៍នេះ មានទំនាក់ទំនងយ៉ាងជិតស្និទ្ធជាមួយនឹងទំនៀមទម្លាប់ប្រពៃណី សិល្បៈ និងអត្តសញ្ញាណ​វប្បធម៌នៅប្រទេសឥណ្ឌូណេស៊ី ដែលភាគច្រើនលេងក្នុងពិធីដូចជា ការដាំស្រូវ និងការច្រូតកាត់ ជាដើម៕

អត្ថបទ៖ ផល ធារិត