សមាគម៖ ការឡើងថ្លៃប្រេងសាំងមិនទាន់ដល់កម្រិត​ធ្ងន់ធ្ងរ តែក៏ប៉ះពាល់ដល់សេដ្ឋកិច្ចពលរដ្ឋ

កាលពីដើមសប្តាហ៍កន្លងទៅ ក្រសួងពាណិជ្ជកម្ម បានប្រកាសពីតម្លៃប្រេងឥន្ធនៈឡើងថ្លៃគួរឱ្យភ្ញាក់ផ្អើល គឺ ៤៥៥០រៀល សម្រាប់ប្រេងសាំងធម្មតា និង ៤៤៥០រៀល សម្រាប់ប្រេងម៉ាស៊ូត។ ដោយតម្លៃនេះ ចាប់អនុវត្តពីថ្ងៃ ០១-១០ ខែ សីហា ឆ្នាំ ២០២៣។

លោក លោក ជា ចាន់​ដា​រ៉ា ប្រធាន​សមាគម​​ពាណិជ្ជករ​ដឹកជញ្ជូន និង​ខ្សែ​ចង្វា​ក់​ផ្គត់ផ្គង់​នៅ​កម្ពុជា បានលើកឡើងថា ការឡើងថ្លៃប្រេងនាពេលនេះ មិនទាន់ដល់កម្រិតធ្ងន់ធ្ងរនៅឡើយទេ។ ទោះយ៉ាងណា លោកថា ការឡើងថ្លៃនេះ ប្រាកដណាស់ថា នឹងប៉ះពាល់ដល់សេដ្ឋកិច្ចពលរដ្ឋ ជាពិសេសអ្នកប្រកបរបរក្នុងវិស័យដឹកជញ្ជូន។ លោកបន្ថែមថា «បងប្អូនដែលរកទទួលទានក្នុងវិស័យដឹកជញ្ជូនទំនិញ នឹងកាត់បន្ថយការចំណេញរបស់ពួកគាត់ នៅពេលដែល​សាំងឡើងថ្លៃ»។

បើតាមលោក ជា ចាន់ដារ៉ា តម្លៃប្រេងនៅកម្ពុជា ចុះនៅក្រោម ៤ពាន់រៀល គឺល្អប្រសើរបំផុតសម្រាប់ប្រជាពលរដ្ឋទូទៅ ជាពិសេសអ្នករកស៊ីដឹកជញ្ជូន។

ប្រធាន​សមាគម​​ពាណិជ្ជករ​ដឹកជញ្ជូន សង្ឃឹមថា សេដ្ឋកិច្ចសកលនឹងអំណោយផលល្អមកវិញ  តម្លៃប្រេងអន្តរ​ជាតិថយចុះ នោះតម្លៃប្រេងនៅកម្ពុជា នឹងធ្លាក់ចុះមកវិញផងដែរ។

ក្រសួងពាណិជ្ជកម្ម បានចេញតម្លៃលក់រាយប្រេងរៀងរាល់ ១០ថ្ងៃម្តង ដើម្បីឆ្លើយតបឱ្យទាន់និន្នាការនៃការប្រែ​ប្រួលថ្លៃប្រេងឥន្ធនៈនៅលើសកលលោក។

បើតាមអ្នកនាំពាក្យក្រសួងពាណិជ្ជកម្ម ធ្លាប់បានប្រាប់កម្ពុជាថ្មីថា តម្លៃប្រេងសាំងកម្ពុជា ឡើងថ្លៃ ឬធ្លាក់ចុះ គឺអាស្រ័យ​ទៅលើតម្លៃទីផ្សារអន្តរជាតិ។ ដោយសារកម្ពុជា ពឹងលើការនាំចូលប្រេងពីខាងក្រៅ ដូច្នេះនៅពេលតម្លៃ​ប្រេងលើពិភព​លោកឡើងថ្លៃ នៅកម្ពុជា ក៏ឡើងថ្លៃដូចគ្នា។

សូមបញ្ជាក់ថា បច្ចុប្បន្ន​នេះប្រេងឥន្ធនៈដែលកម្ពុជាប្រើប្រាស់ គឺបាននាំចូលពីប្រទេសសិង្ហបុរី ថៃ និងវៀតណាម។ ក្រុមហ៊ុនលក់រាយនៅកម្ពុជា ដែលនាំចូលប្រេងឥន្ធនៈ មានដូចជា ក្រុមហ៊ុនតេលា សូគីម៉ិច ប៉ាប៉ា សាវីម៉ិច លឹមឡុង និងក្រុមហ៊ុនមួយចំនួនទៀត។ ចំណែកក្រុមហ៊ុនបរទេស ដែលនាំចូលប្រេងឥន្ធនៈមកស្រុកខ្មែរ រួមមាន ក្រុមហ៊ុនតូតាល់ កាល់តិច និងក្រុមហ៊ុនភីធីធី។ នេះបើតាមការបញ្ជាក់របស់អ្នកនាំពាក្យក្រសួងពាណិជ្ជកម្ម៕