វិស័យសំណង់ខេត្តកំពត នៅតែ​មាន​សន្ទុះ​អភិវឌ្ឍ មិនមានការ​ថមថយ​

លោក សុឹម សុខជា អនុប្រធានមន្ទីររៀបចំដែនដី នគររូបនីយកម្មសំណង់ និងសូរិយោដីខេត្តកំពតបានប្រាប់ឲ្យដឹងថា ទោះស្ថិតនៅក្នុងវិបត្តិសកលនៃជំងឺកូវីដ១៩ និងសង្គ្រាមរវាងរ៉ូស្សី-អ៊ុយគ្រែនក្តី វិស័យសំណង់ក្នុងខេត្តកំពតនៅតែមានដំណើរកាល្អទៅមុខជាដំដាប់ គ្មានការថមថយឬធ្លាក់ចុះនោះទេ ហើយប្រពលរដ្ឋនៅតែមានលទ្ធភាពគ្រប់គ្រាន់ ក្នុងការសាងសង់សំណង់លំនៅឋាននិងសំណង់ផ្សេងៗតាមតម្រូវការ។

មន្ត្រីជំនាញរូបនោះបានបញ្ជាក់ថា តាមរបាយការណ៍បើប្រៀបធៀបឆមាសទី១ ឆ្នាំ២០២៣ និង ឆមាសទី១នៅឆ្នាំ២០២២កន្លងទៅ ការ​សាងសង់​នៅតែរក្សាសន្ទុះល្អដដែលហើយតាមការរំពឹងទុក​នឹងកាន់តែប្រសើរៗបន្ថែមទៀតពីមួយឆ្នាំទៅមួយឆ្នាំ។

រដ្ឋបាល​ខេត្តកំពតបាន​យកចិត្តទុកដាក់លើការងារអភិវឌ្ឍន៍ហេដ្ឋារចនាសម្ព័ន្ធផ្សេងៗ និងការកែលម្អសោភណ្ឌភាពក្រុង ដើម្បីទាក់ទាញទេសចរ និងអ្នកវិនិយោគឲ្យចូលមកច្រើន ធ្វើឲ្យពលរដ្ឋខេត្តកំពតទទួលបានប្រាក់ចំណូលដោយផ្ទាល់ និងដោយប្រយោលជំរុញដល់ជីវភាពឲ្យកាន់តែប្រសើរ។

លោក សុឹម សុខជា ក៏ស្នើសុំឲ្យបងប្អូនប្រជាពលរដ្ឋនិងអ្នកវិនិយោគត្រូវចូលរួមសហការ និងគោរពច្បាប់សំណង់​ឲ្យបានល្អ  កុំសាងសង់មុនពេលទទួលបានលិខិតអនុញ្ញាតិ ឬសាងសង់បំពានដីរបស់រដ្ឋជាដើម។ ការគោរពច្បាប់បានចូលរួមចំណែកនៅក្នុងការអភិវឌ្ឍន៍សង្គម រក្សាបាននូវសុវត្ថិភាព និង សោភណ្ឌភាពសំណង់ និងមានឈ្មោះជាពលរដ្ឋល្អមួយនោះផងដែរ។

អត្ថបទ៖ សឹង រ៉ាត់