ក្រសួងអប់រំត្រៀមវិធានការដោះស្រាយសាលារៀនរងផលប៉ះពាល់ដោយជំនន់ទឹកភ្លៀង

ក្រសួងអប់រំ យុវជន និងកីឡា ត្រៀមវិធានការអន្តរាគមន៍ដោះស្រាយចំពោះសាលារៀន ដែលរងផល​ប៉ះពាល់ដោយសារជំនន់ទឹកភ្លៀង ដើម្បីធានាសុវត្ថិភាព និងការសិក្សារបស់សិស្សានុសិស្ស។

លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា បានឱ្យដឹងនៅរសៀលថ្ងៃទី៧ សីហានេះថា ក្រសួងកំពុងតែបន្តយកចិត្តទុកដាក់តាមដានស្ថានភាពធម្មជាតិ និងត្រៀមក្រុមការងារ ក្នុងការចុះអន្តរាគមន៍​ចំពោះសាលាតាមលទ្ធភាពជាក់ស្តែង ដែលឆ្លើយតបលើផលប៉ះពាល់ពីគ្រោះទឹកជំនន់ និងជំនន់ទឹកភ្លៀង​តាមគ្រឹះស្ថានសិក្សា។

លោកបានបន្តទៀតថា ក្រសួងអប់រំបានអំពាវនាវដល់សិស្សានុសិស្ស លោកគ្រូ អ្នកគ្រូ បុគ្គលិកអប់រំ មាតាបិតា និងគ្រប់ភាគីពាក់ព័ន្ធទាំងអស់ បង្កើនការប្រុងប្រយ័ត្ននារដូវភ្លៀងនេះ ក្នុងការបន្តថែទាំសុខភាពនិងរក្សាសុវត្ថិភាព។  ជាមួយគ្នានេះ ត្រូវប្រុងប្រយ័ត្នខ្ពស់ ដើម្បីចូលរួមការពារមិនឱ្យកូនលង់ទឹក ចៀសផុតពីការឆ្លងរោគា និងគ្រោះថ្នាក់នានា។ សិស្សានុសិស្សទាំងអស់ ក៏ត្រូវបន្តខិតខំរៀនសូត្រក្នុងថ្នាក់ និងរៀនខ្លួនឯងបន្ថែម ព្រមទាំងស្តាប់ដំបូន្មានពីសំណាក់​មាតាបិតា ហើយក្រៅពីការបន្តរៀនសូត្រ សិស្សានុសិស្សទាំងអស់ត្រូវបន្តរក្សាសុខភាព គោរពច្បាប់ចរាចរណ៍ និងចៀស​វាង​ការប្រើប្រាស់ថ្នាំញៀនខុសច្បាប់ និងបារីគ្រប់ប្រភេទ ដើម្បីរក្សាសុខភាព និងអាយុជីវិត។

លោករស់ សុវាចា បានបញ្ជាក់ថាថ្មីៗនេះថា ជំនន់ទឹកភ្លៀងបានបណ្តាលឱ្យសាលារៀនចំនួន៧ក្នុងនោះ មានសា​លារៀន​ចំនួន៦នៅខេត្តរតនគិរី និង១សាលារៀននៅខេត្តកំពង់ធំ បានផ្អាកដំណើការជាបណ្តោះអាសន្ត។ ប៉ុន្តែ​បច្ចុប្បន្នសា​លាទាំងនោះបានបើកដំណើរការឡើងវិញជាធម្មតាហើយ៕

អត្ថបទ ៖ សំអឿន