បណ្ឌិត្យ​សភា​នគរបាល​កម្ពុជា​ ជា​សាលា​បណ្តុះបណ្តាល​ជំនាញ​ដល់មន្រ្តីនគរបាលជាតិ

បណ្ឌិត្យ​សភា​នគរបាល​កម្ពុជា​ប្រែក្លាយ​ពី​សាលា​ភូមិន្ទ​នគរបាល​នៅក្នុងឆ្នាំ ២០០៧ មាន​ទីតាំង​ស្ថិត​នៅ​ភូមិ​ស្ដៅ​កន្លែង ឃុំ​ដីឥដ្ឋ ស្រុក​កៀនស្វាយ ខេត្ត​កណ្ដាល​លើ​ផ្ទៃដី​ជាង ១៣ ហិកតា។

បណ្ឌិត្យ​សភា​នគរបាល​កម្ពុជាមាន​អង្គភាព​ចំណុះ​ចំនួន ១១ (ថ្នាក់​ស្មើ​នាយកដ្ឋាន) និង​សាលា​នគរបាល​ជាតិ​ភូមិភាគ​ចំនួន ៦ ដូច​ខាងក្រោម៖

១-មន្ទីរចាត់ការ

មានតួនាទីធ្វើជាសេនាធិការជូនប្រធានបណ្ឌិត្យសភានគរបាលកម្ពុជា លើការងាររដ្ឋបាល ការងារ​ផែនការ ភស្តុភារ ហិរញ្ញវត្ថុ បុគ្គលិក កិច្ចការនិស្សិត សិក្ខាកាម គ្រប់គ្រងទិន្នន័យ ពិធីការ​និង​ទំនាក់ទំនង និង​បញ្ជូនបញ្ហារបស់ថ្នាក់ដឹកនាំបណ្ឌិត្យសភាដល់អង្គភាពចំណុះ។

២-វិទ្យាស្ថានស្រាវជ្រាវវិទ្យាសាស្ត្រនគរបាល

វិទ្យាស្ថានស្រាវជ្រាវវិទ្យាសាស្ត្រនគរបាល មានតួនាទីធ្វើជា​សេនាធិការ​ជូនប្រធាន​បណ្ឌិត្យសភា នគរបាល​កម្ពុជា លើការងារស្រាវជ្រាវវិទ្យាសាស្ត្រនគរបាល ធ្វើវិក្រឹតការ សុក្រឹតការ គ្រប់គ្រង​មន្ទីរ​ពិសោធន៍ សិក្សា និងគ្រប់គ្រងបណ្ណាល័យ។

៣-វិទ្យាស្ថានបណ្តុះបណ្តាលវិជ្ជាជីវៈនគរបាល

វិទ្យាស្ថានបណ្តុះបណ្តាលវិជ្ជាជីវៈនគរបាល មានតួនាទីធ្វើជាសេនាធិការជូនប្រធានបណ្ឌិត្យសភា នគរបាល​កម្ពុជា លើការងារអប់រំបណ្តុះបណ្តាល កម្រិតបរិញ្ញាបត្រ នៃមុខ​ជំនាញ​ក្នុងក្រប​ខ័ណ្ឌវិជ្ជាជីវៈ​នគរបាល។

៤-វិទ្យាស្ថានគ្រប់គ្រងនិងបញ្ជាដឹកនាំ

មាន​តួនាទី​ធ្វើជាសេនាធិការ​ជូនប្រធាន​បណ្ឌិត្យសភានគរ​បាល​កម្ពុជា លើ​ការងារអប់រំ បណ្តុះបណ្តាល​វគ្គ​តាមឋានានុក្រម និងកម្រិតបរិញ្ញាបត្រ​លើមុខជំនាញ​គ្រប់គ្រង​ទូទៅ គ្រប់គ្រង​មធ្យោបាយ និង​ដឹកនាំ​បញ្ជា។

៥-វិទ្យាស្ថានព័ត៌មានវិទ្យា និងភាសាបរទេស

មាន​តួនាទី​ធ្វើ​ជា​សេនាធិការ​ជូន​ប្រធាន​បណ្ឌិត​សភា​នគរបាលកម្ពុជា​លើការងារ​អប់រំ បណ្តុះ​បណ្តាល​កម្រិត​បរិញ្ញាបត្ររង បរិញ្ញាបត្រ និង​វគ្គខ្លីៗលើជំនាញ​ព័ត៌មានវិទ្យា និង​ភាសា​បរទេស

៦-វិទ្យាស្ថាន​ក្រោយ​បរិញ្ញាបត្រ​

មានតួនាទីធ្វើជាសេនាធិការជូន​ប្រធាន​បណ្ឌិត្យសភានគរបាល​កម្ពុជាលើការងារអប់រំ​បណ្តុះ​បណ្តាល កម្រិតក្រោយបរិញ្ញាបត្រ រួមមានថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិត

៧-នាយកដ្ឋាន​បណ្តុះបណ្តាល

មានតួនាទីធ្វើជា​សេនាធិការជូនប្រធាន​បណ្ឌិត្យសភានគរបាល​កម្ពុជា លើការងារអប់រំ​បណ្ដុះ​បណ្ដាល កម្រិត​បឋមវិជ្ជាជីវៈនគរបាល និងធ្វើវិក្រឹតការ សុក្រឹតការ មន្ត្រីនគរបាល នៅតាម​សាលា​នគរបាលជាតិ​ភូមិភាគ។

៨-មជ្ឈមណ្ឌលបណ្តុះបណ្តាលវិជ្ជាជីវៈមន្ត្រីពន្ធនាគារ

៩-សាលាមធ្យមវិជ្ជាជីវៈនគរបាល

មានតួនាទីធ្វើជាសេនាធិការជូនប្រធានបណ្ឌិត្យសភានគរបាលកម្ពុជា លើការងារអប់រំ​បណ្តុះ​បណ្តាល​មន្ត្រីនគរបាល និងនិស្សិត សម្រាប់កម្រិតបរិញ្ញាបត្ររង និងធ្វើវិក្រឹតការ សុក្រឹតការ មុខ​ជំនាញ​ឯកទេសដល់មន្ត្រីនគរបាលជាតិ

១០-សាលាមធ្យមបច្ចេកទេស

សាលាមធ្យមបច្ចេកទេស មានតួនាទីធ្វើជាសេនាធិការជូនប្រធានបណ្ឌិត្យសភានគរបាលកម្ពុជា លើ​ការងារអប់រំ បណ្តុះបណ្តាលមន្ត្រីនគរបាលជាតិ និងនិស្សិត លើមុខជំនាញបច្ចេកទេសនានា ពាក់ព័ន្ធ​ការប្រើប្រាស់​ឧបករណ៍​សម្ភារបច្ចេកទេស និងមធ្យោបាយ ដែល​គាំទ្រ​ដល់​កិច្ចប្រតិបត្តិការ​របស់​មន្ត្រីនគរបាល សម្រាប់​កម្រិតបរិញ្ញបត្ររង និងធ្វើវិក្រឹតការ សុក្រឹតការ

១១-ដេប៉ាតឺម៉ង់ធានាគុណភាពអប់រំផ្ទែក្នុង។

ដោយឡែក​សាលានគរបាលជាតិភូមិភាគ (ចំណុះនាយកដ្ឋានបណ្តុះបណ្តាល) មាន ៦ កន្លែង៖

– សាលានគរបាលជាតិភូមិភាគ១ (ខេត្តស្ទឹងត្រែង)

– សាលានគរបាលជាតិភូមិភាគ២ (ខេត្តកំពង់ចាម)

– សាលានគរបាលជាតិភូមិភាគ៣ (ខេត្តកំពង់ស្ពឺ)

– សាលានគរបាលជាតិភូមិភាគ៤ (ខេត្តសៀមរាប)

– សាលានគរបាលជាតិភូមិភាគ៥ (ខេត្តបាត់ដំបង)

– សាលានគរបាលជាតិភូមិភាគ៦ (ខេត្តកំពង់ឆ្នាំង)

បណ្ឌិត្យសភានគរបាលកម្ពុជា​ថ្នាក់​ស្មើអគ្គនាយកដ្ឋានដឹកនាំដោយប្រធានមួយរូប និងមានអនុ​ប្រធាន​ជាជំនួយការតាមការកំណត់។

នាយឧត្តមសេនីយ៍​ សេង​ ផល្លី​ ប្រធានបណ្ឌិត្យសភានគរបាលកម្ពុជា

បណ្ឌិត្យសភានគរបាលកម្ពុជាជាគ្រឹះស្ថានសិក្សាសាធារណៈ មាន​តួនាទី​ធ្វើជា​សេនាធិការជូន​រដ្ឋមន្តីក្រសួងមហាផ្ទៃ ដែលមានភារកិច្ចដូចខាងក្រោម៖

– សិក្សាស្រាវជ្រាវវិទ្យាសាស្ត្រនគរបាលពាក់ព័ន្ធដល់កិច្ចការសន្តិសុខ សណ្តាប់ធ្នាប់សាធារណៈ កិច្ច​ដឹកនាំ​បញ្ជា និង​ស្រាវជ្រាវ​កិច្ចការ​ពន្ធនាគារ

– ធ្វើការ​បណ្តុះបណ្តាល​ធនធានមនុស្សលើវិស័យសន្តិសុខ សណ្តាប់ធ្នាប់សាធារណៈ ចំណេះដឹង​ទូទៅ ច្បាប់ ព័ត៌មានវិទ្យា និង​ភាសាបរទេស​ជូនដល់មន្ត្រីនគរបាលជាតិ មន្ត្រីពន្ធនាគារ​គ្រប់​លំដាប់​ថ្នាក់ សិស្ស និស្សិត និង​មន្ត្រីរាជការ

– គ្រប់គ្រង និង​ដឹកនាំ​បញ្ជា​ការងារ​អប់រំ បណ្តុះបណ្តាល​គ្រប់​កម្រិត និង​គ្រប់​ជំនាញ

– រៀបចំ​ផែនការ អប់រំ​បណ្តុះបណ្តាល កម្រិត​បឋម​វិជ្ជាជីវៈ កម្រិត​បរិញ្ញាបត្ររង កម្រិត​បរិញ្ញាបត្រ កម្រិត​ក្រោយ​បរិញ្ញាបត្រ វិក្រឹតការ សុក្រឹតការ និង​វគ្គសិក្សាខ្លីៗ

– គ្រប់គ្រង និងរៀបចំផែនការ​អភិវឌ្ឍន៍​សមត្ថភាព​គ្រូ​នគរបាល​ជាតិ និង​សាស្ត្រាចារ្យ

– រៀបចំ និងអភិវឌ្ឍ​កម្មវិធីអប់រំគ្រប់កម្រិត​លើមុខជំនាញឯកទេស និង​វិធីសាស្ត្រ នៃកិច្ចប្រតិបត្តិការរបស់​មន្ត្រីនគរបាល​ជាតិ និងមន្ត្រីពន្ធនាគារ ស្រប​តាម​សភាពការណ៍សន្តិសុខ សណ្តាប់​ធ្នាប់សង្គម​នៃ​ការអភិវឌ្ឍ​របស់ប្រទេសជាតិ និង​ធ្វើទំនើបកម្ម​ខ្លឹមសារ​ឯកសារ បង្ហាត់បង្រៀន កម្មវិធីសិក្សា កម្មវិធី​បណ្ដុះបណ្ដាល និង​រៀបចំ​កម្មសិក្សា​ប្រតិបត្តិ

– កសាង​ផែនការ​ថវិកា មធ្យោបាយ សម្ភារ បម្រើ​ឱ្យ​ការងារ​បណ្ដុះបណ្ដាល​មន្ត្រី​នគរបាល​ជាតិ និង មន្ត្រី​ពន្ធនាគារ និង​កិច្ច​ដំណើរការ​របស់​បណ្ឌិត្យ​សភា​នគរបាល​កម្ពុជា​

– គ្រប់គ្រង​ចំណូល និង​ចំណាយ សមស្រប​តាម​នីតិវិធី​ហិរញ្ញវត្ថុ និង​តាម​គម្រោង​ផែនការ​ថវិកា​ប្រចាំ​ឆ្នាំ

– គ្រប់គ្រង​បញ្ជីសារពើភណ្ឌ ចលនទ្រព្យ អចលនទ្រព្យ ភស្តុភារ និង​ឧបករណ៍​បច្ចេកទេសរបស់ បណ្ឌិត្យ​សភា​នគរបាលកម្ពុជា

– ចេញ​សញ្ញាបត្រ វិញ្ញាបនបត្រ ទៅតាម​កម្រិតសិក្សា និង​មុខជំនាញ ជូន​ដល់​សិក្ខាកាម និស្សិត ដែល បានបញ្ចប់ការ​សិក្សាដោយ​ជោគជ័យ និង​លិខិតបញ្ជាក់​ការសិក្សា​ជូនដល់​សិក្ខាកាម និស្សិត​ដែល​ពុំ​បាន​បំពេញ គ្រប់លក្ខខណ្ឌ​របស់​បណ្ឌិត្យសភានគរបាលកម្ពុជា

– គ្រប់គ្រង​មន្ត្រីនគរបាល​ក្រោមឱវាទ និង​វាយតម្លៃ ដើម្បីស្នើសុំតែងតាំង​មុខ​តំណែង ផ្ទេរ​ភារកិច្ច ដំឡើង​ឋានន្តរស័ក្តិ ការលើកសរសើរ ឬដាក់វិន័យ តាមបែបបទ និង​នីតិវិធី​ជូនថ្នាក់ដឹកនាំ​ក្រសួងមហាផ្ទៃ​ពិនិត្យសម្រេច

– សហការ​ជាមួយនាយកដ្ឋានបុគ្គលិក​ផ្នែកនគរបាលជាតិ និង​អគ្គនាយកដ្ឋានពន្ធនាគារ ក្នុងការចាត់ បញ្ជូន​មន្ត្រីនគរបាលជាតិ មន្ត្រី​ពន្ធនាគារ មក​បណ្តុះបណ្តាលជំនាញ​វិជ្ជាជីវៈនគរបាល ជំនាញ​ពន្ធនាគារ​នៅ​បណ្ឌិត្យសភានគរបាល​កម្ពុជា តាមផែនការ​នៃឆ្នាំនីមួយៗ

– សហការរៀបចំ​វិញ្ញាសាប្រឡង កំណែ​និងកិច្ចដំណើរការ​ប្រឡង​ចូលក្របខ័ណ្ឌ ដើម្បី​លើក​សំណើ​ជូន​រដ្ឋមន្ត្រី​ក្រសួង​មហាផ្ទៃ​ពិនិត្យ​សម្រេច

– ធ្វើរបាយការណ៍​បូក​សរុប​លទ្ធផល​ការងារ និងទិសដៅ​បន្តរបស់​បណ្ឌិត្យ​សភា​នគរបាល​កម្ពុជា តាម​ការកំណត់​ជូន​រដ្ឋមន្ត្រី​ក្រសួង​មហាផ្ទៃ

– ទទួល​អនុវត្ត​ភារកិច្ច និង​សិទ្ធិផ្សេងៗ​ទៀត​ដែលរដ្ឋមន្ត្រីក្រសួង​មហាផ្ទៃប្រគល់​ឱ្យ៕