កសិករមួយចំនួន នៅតែបន្តចិញ្ចឹមគោលក្ខណៈគ្រួសារ ទោះបីតម្លៃទីផ្សារមានការធ្លាក់ចុះក៏ដោយ

ប្រជាកសិករមួយចំនួន បានប្រាប់ថា តម្លៃទីផ្សារគោចិញ្ចឹមលក្ខណៈគ្រួសាររបស់ពួកគាត់ មានការធ្លាក់ចុះគួរឲ្យកត់ សម្គាល់ ក្នុងរយៈពេលប៉ុន្មានឆ្នាំចុងក្រោយនេះ។ តែទោះជាយ៉ាងណាក៏ដោយ ពួកគាត់នៅតែបន្តការចិញ្ចឹមនេះបន្តទៀត។

លោក សុខ ពៅ ជាកសិករចិញ្ចឹមគោលក្ខណៈគ្រួសារ ស្ថិតនៅស្រុកខ្សាច់កណ្ដាល ខេត្តកណ្ដាល បានប្រាប់សារព័ត៌ មានកម្ពុជាថ្មីថា ទោះបីទីផ្សារគោធ្លាក់ចុះយ៉ាងណាក៏ដោយ ក៏លោកនៅតែមិនបោះបង់ការចិញ្ចឹមគោនេះដែរ។ រាល់ថ្ងៃលោកចិញ្ចឹមគោគួបផ្សំការធ្វើស្រែចំការបន្ថែម ដើម្បីផ្គត់ផ្គង់គ្រួសារបានមួយចំណែក។

លោកបានបន្តទៀតថា ការចិញ្ចឹមគោទោះបីមិនធ្វើឲ្យមានបាន តែវាអាចចំណេញសម្រាប់លោកជាកសិករស្រាប់។ ជាក់ស្ដែង ការចិញ្ចឹមគោរបស់គាត់ពីមួយឆ្នាំទៅមួយឆ្នាំ អាចលក់បានប្រាក់ខ្លះ ដើម្បីទិញម៉ូតូ និងផ្គត់ផ្គង់ការសិក្សារៀនសូត្ររបស់កូនចៅ បានមួយកម្រិតអំពីរបរចិញ្ចឹមគោលក្ខណៈគ្រួសាររបស់គាត់។ លោក សុខ ពៅ បញ្ជាក់ទៀតថា ការចិញ្ចឹមគោលក្ខណៈគ្រួសារ អាចមានផលចំណេញជាច្រើនទៀតដូចជា៖ លាមកគោ អាចកែឆ្នែទៅជាជីសម្រាប់ដាំដុះ ដំណាំស្រែ ស្វាយ ក្រូច និងចេក ជាដើម។

បន្ថែមពីលើនេះលោក សុខ ពៅ ក៏បានអំពាវនាវដល់ប្រជាកសិករផ្សេងទៀត ជាពិសេសតំបន់ជនបទ បន្តចិញ្ចឹមគោលក្ខណៈគ្រួសារឲ្យបានច្រើនៗឡើង ដើម្បីផ្គត់ផ្គង់គ្រួសារ សហគមន៍ និងសង្គមជាតិទាំងមូល។

ចំណែកឯលោក ចន្ទ ផាន កសិករចិញ្ចឹមគោលក្ខណៈគ្រួសារ ស្ថិតនៅស្រុកស្រីសន្ធរ ខេត្តកំពង់ចាម បានប្រាប់មកសារព័ត៌មានកម្ពុជាថ្មីដែរថា ការចិញ្ចឹមគោលក្ខណៈគ្រួសារកាលពីដើមឡើយ មានទីផ្សារគួរសម ព្រោះគោដែលលោកចិញ្ចឹម ភាគច្រើនជាប្រភេទគោកូនកាត់ សុទ្ធសឹងតែជាពូជល្អ សម្រាប់យកទៅបង្កាត់ជាមួយពូជផ្សេងៗទៀត។ លោកបន្ថែមថា កាលពីមុន គោពូជ ឬគោកូនកាត់ ដែលលោកចិញ្ចឹម គឺមានតម្លៃថ្លៃគួរសមដោយ ១នឹម លក់បានតម្លៃចន្លោះពី ១៥លានរៀល ទៅ ២០លានរៀល មិនខ្វះឈ្មួញទិញនោះឡើយ។

លោក ចន្ទ ផាន បញ្ជាក់ថា មកដល់ពេលនេះបច្ចុប្បន្ននេះ ការចិញ្ចឹមគោលក្ខណៈគ្រួសារ ត្រូវបានថយចុះយ៉ាងខ្លាំង ស្របពេលគ្មានឈ្មួញទិញ និងតម្លៃគោក៏ធ្លាក់ចុះទៅតាមហ្នឹងដែរ។ ដោយសារ លោក សង្កេតឃើញថា បច្ចុប្បន្ននេះអ្វីៗត្រូវបានជំនួសដោយគ្រឿងយន្តដូចជា៖ ត្រាក់ទ័រ ឬគោយន្ត និងបច្ចេកវិទ្យាទំនើបៗផ្សេងទៀត មកជំនួសកម្លាំងមនុស្ស និងសត្វបានឆាប់រហ័សជាងមុនឆ្ងាយណាស់៕

អត្ថបទ៖ សួស សិត