ពាណិជ្ជករ និងអ្នកនាំចូលកម្ពុជា អាចបង្កើតឱកាស​ក្នុងពិព័រណ៍គ្រឿងសង្ហារិម នៅឥណ្ឌា

ក្រុមប្រឹក្សាជំរុញការនាំចេញផលិតផលសិប្បកម្មឥណ្ឌា នឹងរៀបចំពិព័រណ៍សិប្បកម្ម និងវត្ថុអនុស្សាវរីយ៍ឥណ្ឌាលើកទី៥៦ និងពិព័រណ៍ដេលី ឆ្នាំ២០២៣ “The 56th Indian Handicrafts & Gifts Fair (IHGF) Delhi Fair (Autumn) 2023″ RUSHUU ពីថ្ងៃទី១២ ដល់ទី ១៦ ខែតុលា ឆ្នាំ២០២៣ ខាងមុខ នៅមជ្ឈមណ្ឌល​តាំងពិព័រណ៍​ហ្គីត​ធ័រណយដាឥណ្ឌា តំបន់ដេលី ប្រទេសឥណ្ឌា។ នេះបើតាមសេចក្តីជូនដំណឹងរបស់ក្រសួងពាណិជ្ជកម្មកម្ពុជា។

ក្រសួងពាណិជ្ជកម្ម បញ្ជាក់ថា ពិព័រណ៍នេះ នឹងបង្ហាញពីជម្រើសដ៏សម្បូរបែប និងសហសម័យ នៃផលិតផល​គ្រឿងសង្ហារិម​ជាង ២ពាន់មុខ និង ៣០០ម៉ូដ ដែលកំពុងពេញនិយមទៅលើ ១៤ប្រភេទផលិតផលផ្សេងៗគ្នា សម្រាប់ប្រើប្រាស់​តុបតែងផ្ទះ ការិយាល័យ សណ្ឋាគារ ភោជនីយដ្ឋាន និងសាលារៀន និងមានគ្រឿងបរិក្ខាសង្ហារិមផ្សេងៗទៀតដែល​ផលិតចេញ​ពីប្លាស្ទិក កាកអំពៅ និងឫស្សី សម្រាប់អ្នកនាំចូល អ្នកលក់ដុំ អ្នកលក់រាយ និងអ្នកជំនាញរចនាដែលមកពី​បណ្តា​ប្រទេស​ដទៃ។

យោងតាមការបោះពុម្ពផ្សាយលើកចុងក្រោយ នៃពិព័រណ៍ IHGFDelhi ដែលបានប្រព្រឹត្តទៅក្នុងខែមីនា ឆ្នាំ២០២៣ ព្រឹត្តិការណ៍នេះមានអ្នកទស្សនាជាង ៧០០០នាក់ មកពីបណ្តាប្រទេសជាង ១០០ និងមានអាជីវកម្មសរុបជាទឹក​ប្រាក់ជាង ៤២៥ លានដុល្លារអាមេរិក។

ក្រសួងពាណិជ្ជកម្ម ក្នុងនាមអ្នកសម្របសម្រួលព្រឹត្តិការណ៍ខាងលើ បានជូនដំណឹងដល់ពាណិជ្ជករ និងអ្នកនាំចូល ដែលមានចំណាប់អារម្មណ៍ចង់ចូលរួមជាអ្នកទស្សនាពិព័រណ៍ ឬអ្នកទិញទំនិញពីប្រទេសឥណ្ឌា អាចទាក់ទងទៅ www.ihgfdelhifair.in/register ឬទាក់ទងដោយផ្ទាល់ទៅស្ថានទូតឥណ្ឌ ប្រចាំនៅរាជធានីភ្នំពេញ តាមអាស​យ​ដ្ឋាន ​ផ្ទះលេខ៥០-៥២ ផ្លូវសម្តេចប៉ាន សង្កាត់បឹងរាំង ខណ្ឌដូនពេញ រាជធានីភ្នំពេញ ឬទូរស័ព្ទលេខ ០២៣ ២១០ ៩១២/ ០២៣ ២១០ ៩១៣ អ៊ីម៉ែល៖ [email protected]/ admn.phnompenh​@mea.gov.in ៕