លោក ហេង សុខគង់ ៖ ៧ខែ ឆ្នាំនេះ មានរោងចក្របង្កើតថ្មី ៩៨ លើទុនវិនិយោគជាង ៣០០លានដុល្លារ

លោក ហេង សុខគង់ រដ្ឋលេខាធិការ និងជាអ្នកនាំពាក្យក្រសួងឧស្សាហកម្ម វិទ្យាសាស្ដ្រ បច្ចេកវិទ្យា និងនវានុវត្តន៍ បានប្រាប់កម្ពុជាថ្មីថា គិតត្រឹមចុងខែ កក្កដា ឆ្នាំ ២០២៣ មានរោងចក្របង្កើតថ្មីតាមរយៈក្រសួងឧស្សាហកម្មចំនួន ៩៨ រោងចក្រ ដោយមានទុនវិនិយោគប្រមាណ ៣០១លានដុល្លារអាមេរិក។

ដោយឡែកតម្លៃបរិមានផលិតផលដែលក្រសួងឧស្សាហកម្មទទួលបាន គិតត្រឹមខែមិថុនា មានចំនួន ៧៣១៥​លានដុល្លារអាមេរិក ក្នុងនោះ ការនាំចេញមានចំនួនជាង ៥ពាន់លានដុល្លារ និងសម្រាប់លក់ក្នុងស្រុកមានចំនួនជិត ២ពាន់លានដុល្លារ។ នេះជាការបញ្ជាក់របស់លោក ហេង សុខគង់។

បើតាមលោក ហេង សុខគង់ មកទល់ពេលនេះ មានក្រុមហ៊ុនជាច្រើន កំពុងសិក្សាបង្កើតរោងចក្រផលិតបន្ទះ​ឈីបនៅកម្ពុជា។ ក្រុមហ៊ុនទាំងនោះ មានមកពីប្រទេសកូរ៉េ ចិន និងឥណ្ឌា ជាដើម៕