ព័ត៌មានជាតិ

ខេត្តកែបដាក់យុទ្ធសាស្រ្ត ៣ ទាក់ទាញគោលដៅទេសចរណ៍ធម្មជាតិ

បានផុស

២ years មុន

នៅ

ថ្ងៃសុក្រ ១១ សីហា ២០២៣

ដោយ

ខេត្តកែបគឺជាខេត្តក្នុងតំបន់ឆ្នេរ ដែលមានលក្ខខណ្ឌអំណោយផលនិងសក្តានុពលពីធម្មជាតិសម្រាប់ការអភិវឌ្ឍវិស័យទេសចរណ៍ ជាពិសេសទេសចរណ៍ធម្មជាតិនិងទេសចរណ៍វប្បធម៌។

ផ្អែកទៅលើសក្ដានុពលនិងស្របតាមនិន្នាការកើនឡើងនៃចំណាប់អារម្មណ៍របស់ភ្ញៀវទេសចរទូទៅលើគោលដៅទេសចរណ៍ធម្មជាតិ រាជរដ្ឋាភិបាលកម្ពុជាបានរៀបចំ “ផែនការមេអភិវឌ្ឍន៍ទេសចរណ៍ខេត្តកែប ឆ្នាំ២០២៣- ២០៣៥” ដើម្បីទាញយកប្រយោជន៍ជាអតិបរមាសម្រាប់ធ្វើការអភិវឌ្ឍវិស័យទេសចរណ៍។ ផែនការមេនេះបានកំណត់ចក្ខុវិស័យប្រែក្លាយខេត្តកែបទៅជា “គោលដៅទេសចរណ៍ធម្មជាតិនិងសមុទ្រសម្រាកកម្សាន្តបែបប្រណិតកម្រិតខ្ពស់”។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការអនុវត្តផែនការមេនេះ ប្រកាន់ខ្ជាប់នូវកិច្ចគាំពារបរិស្ថានធម្មជាតិដោយកាត់បន្ថយឱ្យបានជាអតិបរមានូវផលប៉ះពាល់ទៅលើបរិស្ថាន និងធនធានជីវចម្រុះ ដោយឈរលើទស្សនាទាន “ការអភិរក្សគាំទ្រដល់កិច្ចអភិវឌ្ឍ និងការអភិវឌ្ឍគាំទ្រដល់កិច្ចអភិរក្ស” និងទស្សនាទាននៃ “ការអភិវឌ្ឍទីក្រុងក្នុងឧទ្យានជាតិ”។

ដើម្បីសម្រេចចក្ខុវិស័យខាងលើ ផែនការមេនេះបានកំណត់យុទ្ធសាស្ត្រសំខាន់ៗចំនួន ៣ រួមមាន៖

ទី១- យុទ្ធសាស្ត្រអភិវឌ្ឍប៉ូលទេសចរណ៍ខេត្តកែប

សំដៅប្រែក្លាយខេត្តកែបជាប៉ូលទេសចរណ៍ចម្បងមួយ តាមរយៈការអភិវឌ្ឍប៉ូលទេសចរណ៍ចំនួន ៤ សំខាន់ៗ គឺ ទី១) ប៉ូលទេសចរណ៍តំបន់ក្រុងកែបចាស់ជា “ទីក្រុងធម្មជាតិក្នុងឧទ្យានប្រណិតកម្រិតពិភពលោក”។ ទី២) ប៉ូលទេសចរណ៍តំបន់អង្កោលជា “តំបន់ទេសចរណ៍ឆ្នេរសមុទ្រធម្មជាតិបែបទំនើប”។ ទី៣) ប៉ូលទេសចរណ៍ធម្មជាតិតំបន់ភ្នំវល្លិ៍“តំបន់កសិទេសចរណ៍និងទេសចរណ៍ធម្មជាតិប្រវត្តិសាស្ត្រ” និងទី៤) ប៉ូលទេសចរណ៍តំបន់សមុទ្រនិងប្រជុំកោះជា “តំបន់ទេសចរណ៍សមុទ្រកោះប្រណិត”។

ប៉ូលទេសចរណ៍នីមួយៗ នឹងត្រូវបានទទួលការអភិវឌ្ឍផលិតផលទេសចរណ៍ថ្មីៗទៅតាមសក្តានុពលនៃគោលដៅទាំងនោះ ព្រមទាំងមានការរៀបចំព្រឹត្តិការណ៍ ថ្មីៗជាមូលដ្ឋានសម្រាប់ទាក់ទាញភ្ញៀវទេសចរ និងមានការរៀបចំ និងការពង្រឹងយន្តការគាំទ្រនានាផងដែរ។

ទី២- យុទ្ធសាស្ត្រលើកកម្ពស់ការវិនិយោគនិងផ្សព្វផ្សាយ

សំដៅទាក់ទាញការវិនិយោគនិងការចូលរួមពីសំណាក់វិស័យឯកជន ក្នុងការអភិវឌ្ឍទេសចរណ៍ខេត្តកែប ព្រមទាំងរៀបចំយន្តការផ្សព្វផ្សាយ ដើម្បីលើកកម្ពស់កិត្តិនាមរបស់ខេត្តកែបជាគោលដៅទេសចរណ៍ប្រកបដោយគុណភាពកម្រិតពិភពលោក។

ទី៣-យុទ្ធសាស្ត្រអភិវឌ្ឍន៍វិស័យគាំទ្រ

សំដៅអភិវឌ្ឍវិស័យនានាដែលគាំទ្រដល់ការអភិវឌ្ឍវិស័យទេសចរណ៍ខេត្តកែប និងស្វែងរកដំណោះស្រាយចំពោះបញ្ហាប្រឈមនានាក្នុងវិស័យទាំងនោះ ដែលក្នុងនោះរួមមានដូចជាការគ្រប់គ្រងសំណល់រឹងនិងសំណល់រាវ និងការកសាងហេដ្ឋារចនាសម្ព័ន្ធគាំទ្រសំខាន់ៗជាដើម។

ដើម្បីធានាប្រសិទ្ធភាពនៃការអនុវត្ត “ផែនការមេអភិវឌ្ឍន៍ទេសចរណ៍ខេត្តកែប ឆ្នាំ២០២៣-២០៣៥” ផែនការមេនេះបានកំណត់យន្តការអនុវត្ត តាមដាន និងវាយតម្លៃការអនុវត្តយ៉ាងច្បាស់លាស់ ក្រោមការដឹកនាំរបស់គណៈកម្មាធិការជាតិអភិវឌ្ឍន៍ទេសចរណ៍ និងមានគណៈកម្មការគ្រប់គ្រងនិងអភិវឌ្ឍន៍ទេសចរណ៍តំបន់ឆ្នេរសមុទ្រកម្ពុជា ជាស្ថាប័នសម្របសម្រួល ព្រមទាំងមានគណៈកម្មាធិការអភិវឌ្ឍន៍ទេសចរណ៍ខេត្តកែប ស្ថាប័នទទួលបន្ទុកក្នុងការអនុវត្តផែនការមេ និងមានស្ថាប័នអង្គភាពមួយចំនួនទៀត ដែលនឹងគាំទ្រដល់ការអនុវត្តផែនការមេនេះ។

ការអនុវត្តផែនការមេនេះប្រកបដោយប្រសិទ្ធភាព ទាមទារឱ្យមានការសហការខ្ពស់ពីគ្រប់ភាគីពាក់ព័ន្ធ រួមទាំងក្រសួងស្ថាប័នគ្រប់កម្រិត ទាំងថ្នាក់ជាតិនិងថ្នាក់ក្រោមជាតិព្រមទាំងវិស័យឯកជននិងប្រជាពលរដ្ឋក្នុងមូលដ្ឋានផងដែរ។

ដោយសារការអនុវត្តផែនការមេនេះជាកិច្ចការរយះពេលយូរ ផែនការមេនេះត្រូវបានចាត់ទុកជា “ឯកសាររស់” ដើម្បីធានាភាពសមស្របទៅតាមការវិវត្តនៃស្ថានភាពសេដ្ឋកិច្ចសង្គម និងស្ថានភាពនៃទីផ្សារ និងវិស័យទេសចរណ៍សកល៕

Related Topics:ខេត្តកែប