លោក វ៉ាង យី ក្លាយជាភ្ញៀវបរទេសដំបូងគេដែលមកជួបនាយករដ្ឋមន្ត្រីចាត់តាំងថ្មីរបស់កម្ពុជា

រដ្ឋមន្ត្រីការបរទេសចិន លោក វ៉ាង យី ក្លាយជាភ្ញៀវបរទេសដំបូងគេ ដែលបានធ្វើដំណើរទស្សនកិច្ចមកកាន់កម្ពុជា គឺចំពេលមានការផ្លាស់ប្ដូររាជរដ្ឋាភិបាលថ្មី ខណៈរដ្ឋមន្ត្រីចិនរូបនេះ ក៏បានជួបពិភាក្សាការងារជាមួយអនាគតនាយករដ្ឋមន្ត្រីថ្មី ឯកឧត្ដមកិត្តិទេសាភិបាលបណ្ឌិត ហ៊ុន ម៉ាណែត។

ក្រោយចូលកាន់តំណែងជារដ្ឋមន្ត្រីការបរទេសចិនជាថ្មីម្ដងទៀត កាលពីថ្ងៃទី២៥ ខែកក្កដា ឆ្នាំ២០២៣ លោក វ៉ាង យី បានផ្ដើមធ្វើដំណើរទស្សនកិច្ចនៅប្រទេសចំនួន៣ ដែលជាសមាជិកអាស៊ាន រួមមាន សិង្ហបុរី ម៉ាឡេស៊ី និងកម្ពុជា។ ប៉ុន្តែ សម្រាប់ដំណើរទស្សន​កិច្ចមកកាន់កម្ពុជាពេលនេះ គ្រប់យ៉ាងបានបង្ហាញឱ្យឃើញថា​ លោក វ៉ាង យី គឺជាភ្ញៀវដំបូងគេរបស់ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត ក្នុងនាមជានាយករដ្ឋមន្ត្រីចាត់តាំង។

ជាភ្ញៀវដំបូងដែលធ្វើដំណើរទស្សនកិច្ចមកកម្ពុជាចំនួន២ថ្ងៃ លោក វ៉ាង យី បានចូលក្រាបបង្គំគាល់ព្រះករុណា ព្រះបាទ សម្ដេចព្រះបរមនាថ នរោត្ដម សីហមុនី ព្រះមហាក្សត្រនៃកម្ពុជា និងចូលជួបសម្ដែងការគួរសមជាមួយសម្ដេចតេជោ ហ៊ុន សែន ដែលក្នុងឱកាសនោះ លោករដ្ឋមន្ត្រីការបរទេសចិន បានបញ្ជាក់ពីជំហរឥតងាករេរបស់ចិនក្នុងការជួយកម្ពុជាគ្រប់កាលៈទេសៈ។

ដោយឡែក ក្នុងជំនួបជាមួយឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត លោក វ៉ាង យី បានបញ្ជាក់ពីជំហរបន្តជំរុញការអនុវត្តការងារប្រកបដោយប្រសិទ្ធភាព និងភាពជិតស្និទ្ធរវាងកម្ពុជា និងចិន ខណៈភាគីចិន ក៏បានអញ្ជើញឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត ដើម្បីបំពេញទស្សនកិច្ចផ្លូវការនៅប្រទេសចិននាពេលខាងមុខឆាប់ៗនេះ ជាពិសេស ក្នុងពិព័រណ៍ចិន-អាស៊ាន លើកទី២០ ដែលប្រារព្ធឡើងនាពាក់កណ្ដាលខែកញ្ញា។

តាមរយៈនេះ បានបង្ហាញឱ្យឃើញថា លោក វ៉ាង យី មិនត្រឹមតែជាភ្ញៀវដែលមកដល់ផ្ទះនាយករដ្ឋមន្ត្រីថ្មីរបស់កម្ពុជាប៉ុណ្ណោះទេ តែលោក ក៏ជាភ្ញៀវទីមួយដែលមកអញ្ជើញនាយករដ្ឋមន្ត្រីថ្មីកម្ពុជា ទៅធ្វើដំណើរទស្សនកិច្ចផ្លូវការនៅប្រទសចិនដែរ។

ជាការឆ្លើយតប ឯកឧត្ដមកិត្តិទេសាភិបាលបណ្ឌិត ហ៊ុន ម៉ាណែត បានទទួលយកការអញ្ជើញនេះ ដោយឯកឧត្តម នឹងធ្វើដំណើរទស្សនកិច្ចជាផ្លូ​វការទៅកាន់សាធារណរដ្ឋប្រជាមានិតចិន ដើម្បីចូលរួមខួបលើកទី១០ នៃគំនិតផ្ដួចផ្ដើមខ្សែក្រវ៉ាត់ និងផ្លូវ នៅពាក់កណ្ដាលខែតុលា ឆ្នាំ២០២៣ ខាងមុខ។

គួរជម្រាបថា អំឡុងពេលទស្សនកិច្ចនៅកម្ពុជានេះ លោក វ៉ាង យី រដ្ឋមន្ត្រីការបរទេសចិន ក៏បានជួបពិភាក្សាការងារទ្វេភាគីជាមួយលោក ប្រាក់ សុខុន រដ្ឋមន្ត្រីក្រសួងការបរទេសកម្ពុជា រួមទាំងជំនួបការងារជាមួយមន្ត្រីជាន់ខ្ពស់រាជរដ្ឋាភិបាលកម្ពុជាមួយចំនួនទៀត ដូចជា លោក ហោ ណាំហុង លោក ស៊ុន​ ចាន់ថុល និងលោក សុខ ចិន្តាសោភា ថែមទៀតផង៕

ដោយ៖ ង៉ិល ណារ៉ាត់