តំបន់សេដ្ឋកិច្ចពិសេសព្រះ​សីហនុសម្រេចបានកំណើនទឹកប្រាក់ជាង១ ពាន់លានដុល្លារ

នៅក្នុងឆ្នាំ ២០២០ តំបន់សេដ្ឋកិច្ចពិសេសខេត្តព្រះសីហនុសម្រេច​បានការនាំចេញក្នុង​ទឹកប្រាក់​សរុប ជាង១ពាន់លានដុល្លារសហរដ្ឋអាមេរិក (១.៥៦៥) ដែលមានកំណើន ២៦.៥២% បើ​ធៀប​​​នឹងរយៈពេលដូចគ្នាកាលពីឆ្នាំ ២០១៩ គឺជាតួលេខកំណើនទោះបីជាទទួល​រងផលប៉ះពាល់​ពីជំងឺវីរុសក៏ដោយ។

គណនីផ្លូវការណ៍របស់ស្ថានទូតចិនប្រចាំកម្ពុជា បានឲ្យដឹងថា សម្តេចតេជោ ហ៊ុន សែន នាយ​ករដ្ឋ​មន្ត្រីកម្ពុជា ក៏បានចេញសារលិខិតអបអរសាទរចំពោះកំណើននេះ ដល់ក្រុមប្រឹក្សាភិបាលនៃ​តំបន់សេដ្ឋកិច្ចពិសេសខេត្តព្រះសីហនុ និងព្រមទាំងបានអបអរសាទរចូលឆ្នាំប្រពៃណីចិនដែលនឹងខិតជិតមកដល់នាពេលខាងមុខ។

នៅក្នុងលិខិតផ្ញើជូនប្រធានក្រុមហ៊ុនតំបន់សេដ្ឋកិច្ចពិសេសក្រុងព្រះសីហនុ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានមានប្រសាសន៍ថា រដ្ឋាភិបាលកម្ពុជាតែងតែទទួល​ស្គាល់​ថាផ្នែកឯកជនគឺជាដៃគូដ៏​ចាំបាច់និងមិនអាចខ្វះបានដែលត្រូវបំពេញ​ឱ្យគ្នាទៅវិញទៅមកក្នុង​ការរួម​ចំណែកដល់ការជំរុញសេដ្ឋកិច្ច ជាតិឱ្យកាន់តែមានការរីកចម្រើន។

តំបន់សេដ្ឋកិច្ចពិសេសក្រុងព្រះសីហនុ បានបើកការដ្ឋានសាងសង់នៅឆ្នាំ ២០០៨​បច្ចប្បន្នតំបន់សេដ្ឋកិច្ចពិសេសទាំងនោះ បានក្លាយទៅជាតំបន់សេដ្ឋកិច្ចពិសេស​អន្តរជាតិដែលបានទទួលសហគ្រាសមកពីអឺរ៉ុប អាមេរិក ចិន និង អាស៊ីអា គ្នេយ៍សរុប ១៦៦ សហគ្រាសហើយបានបង្កើតឱកាសការងារជិត ៣ ម៉ឺនកន្លែង។

ប្រធានក្រុមហ៊ុនតំបន់សេដ្ឋកិច្ចពិសេសក្រុងព្រះសីហនុ លោក Chen Jiangang បានថ្លែងឲ្យដឹងថា តាមការព្យាករតំបន់សេដ្ឋកិច្ចពិសេសសក្រុងព្រះសីហនុ នឹងរួមចំណែក ការបង្កើតទំហំពាណិជ្ជកម្មជាមួយចិនឲ្យបាន ១ ម៉ឺ លានដុល្លារក្នុងឆ្នាំ ២០២៣ ព្រមទាំងចលនាពាណិជ្ជកម្មរវាងកម្ពុជា និងប្រទេសផ្សេងៗ៕

អត្ថបទ៖ ឡេង ដេត