ព័ត៌មានជាតិ

តាំងពីដើមឆ្នាំ ២០២៣ រដ្ឋមន្រ្តីស៊ុន ចាន់ថុល ចុះតាមការដ្ឋានស្ថាបនាផ្លូវ ដើម្បីធានាគុណភាពលែងទទួលផ្លូវធ្វើមុខខូចក្រោយ

បានផុស

១ year មុន

នៅ

ថ្ងៃអង្គារ ១៥ សីហា ២០២៣

ដោយ

Dy Bunnara

លោក ស៊ុន ចាន់ថុល ត្រូវគេមើលឃើញថាជារដ្ឋមន្រ្តីកំណែទម្រង់ និងជាមន្រ្តីដែលសកម្មលើការងារសាធារណការ។

រដ្ឋមន្រ្តីរូបនេះតែងតែចុះតាមដានជាប់ជាប្រចាំនៅរាល់ការដ្ឋានស្ថាបនាផ្លូវ ដើម្បីធានាគុណភាពស្របតាមស្តង់ដាបច្ចេកទេស ខណៈកន្លងទៅលោកក៏ធ្លាប់រិះគន់ក្រុមហ៊ុនសាងសង់មួយចំនួន ដែលអនុវត្តខុសបច្ចេកទេសហើយក៏បានព្រមានដាក់ក្នុងបញ្ជីខ្មៅទៀតផង។

លោករដ្ឋមន្រ្តីតែងតែរំលឹកឲ្យក្រុមហ៊ុនសាងសង់យកចិត្តទុកដាក់លើការពង្រឹងគុណភាពសាងសង់ និងប្រកាសលែងទទួលផ្លូវធ្វើមុខខូចក្រោយធ្វើក្រោយខូចមុខទៀតហើយ។

ការចុះទៅពិនិត្យតាមការដ្ឋានសាងសង់ លោករដ្ឋមន្រ្តីក៏តែងតែបានផ្សព្វផ្សាយតាមបណ្តាញសង្គមដោយធ្វើការផ្សាយផ្ទាល់ដើម្បីផ្តល់ព័ត៌មានដល់មហាជន រួមទាំងផ្តល់បទសម្ភាសន៍ដល់ក្រុមអ្នកសារព័ត៌មានថែមទៀត។

តាំងពីដើមឆ្នាំ ២០២៣ លោក ស៊ុន ចាន់ថុលបានចុះទៅពិនិត្យការដ្ឋានស្ថាបនាតាមបណ្តាផ្លូវជាតិនានា។ ជាក់ស្តែងកាលពីថ្ងៃទី ២២ ខែកុម្ភៈ ឆ្នាំ២០២៣ លោករដ្ឋមន្រ្តីបានដឹកនាំគណៈប្រតិភូចុះពិនិត្យពីវឌ្ឍនភាពគម្រោងសាងសង់ផ្លូវជាតិលេខ១០ ពីស្រុកសំឡូត ខេត្តបាត់ដំបង កាត់តាមស្រុកវាលវែងខេត្តពោធិ៍សាត់ រហូតដល់ខេត្តកោះកុង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងឱកាសចុះត្រួតពិនិត្យគម្រោងស្ថាបនាផ្លូវជាតិលេខ ១០ លោករដ្ឋមន្រ្តីមើលឃើញមានភាពយឺតយ៉ាវបន្តិច។ ដើម្បីបញ្ជាក់ពីគុណភាព លោកបានឲ្យក្រុមបច្ចេកទេសធ្វើតេស្តគុណភាពស្រទាប់គ្រឹះនៅតាមកន្លែងមួយចំនួន ដើម្បីធានាបានថាការសាងសង់ស្របតាមស្តង់ដាបច្ចេកទេសមិនមានភាពចន្លោះប្រហោង។

នៅថ្ងៃទី ២៣ កុម្ភៈ លោករដ្ឋមន្រ្តីក៏បានបន្តចុះទៅពិនិត្យគម្រោងសាងសង់ផ្លូវជាតិលេខ ៤៨ (ស្រែអំបិល-កោះកុង) ចាប់ពីចំណុចប្រសព្វផ្លូវជាតិលេខ ៤ ត្រង់គីឡូម៉ែត្រលេខ ១៤១+៧៥០ ស្ថិតក្នុងភូមិអូរជ្រៅ ឃុំបឹងព្រាវ ស្រុកស្រែអំបិល រហូតដល់ក្រុងខេមរភូមិន្ទខេត្តកោះកុង។ លោករដ្ឋមន្រ្តីបានវាយតម្លៃដំណើរការសាងសង់ទើបតែបានសម្រេច ២១ ភាគរយ គឺយឺតជាងផែនការកំណត់រហូតដល់ ១២ ភាគរយ។

បើតាមលោករដ្ឋមន្រ្តី ក្រៅពីធ្វើយឺតជាងផែនការ ក្រសួងនៅរកឃើញមានបញ្ហាបច្ចេកទេសមួយចំនួនថែមទៀត។ លោកបានណែនាំឲ្យក្រុមហ៊ុនកែសម្រួលចំនុចខ្វះខាត និងបន្ថែមគ្រឿងចក្រនិងក្រុមការងារដើម្បីឲ្យការងារសម្រេចតាមផែនការ។

ពាក់ព័ន្ធនឹងផ្លូវជាតិលេខ ៤៨ នេះដែរ ក្រោយមានពាក្យចចាមអារ៉ាមថាក្រុមហ៊ុនម៉ៅការសាងសង់បានដកខ្លួនចេញពីគម្រោង លោករដ្ឋមន្ត្រីបានគូសបញ្ជាក់ថា មិនមានរឿងដូចដែលលេចឮនោះឡើយ។

នៅថ្ងៃ ២៣ កុម្ភៈ លោករដ្ឋមន្រ្តីក៏បានបន្តចុះពិនិត្យគម្រោងសាងសង់និងលើកកម្រិតគុណភាពផ្លូវជាតិលេខ ៤ ប្រវែង ១៩៦ គីឡូម៉ែត្រ។

ពីដើមឡើយផ្លូវជាតិលេខ ៤ មានទទឹងតួផ្លូវតែ ៧ ម៉ែត្រប៉ុណ្ណោះ ប៉ុន្តែត្រូវបានពង្រីកទទឹងតួផ្លូវរហូតដល់ ១០ ម៉ែត្រ ដោយក្នុងនោះប្រវែង ៤០ គីឡូម៉ែត្រត្រូវពង្រីកពី ២ គន្លង ទៅ ៤ គន្លង។

លោក ស៊ុន ចាន់ថុល បានថ្លែងថា តាមការគ្រោងទុកផ្លូវប្រវែង ១៧០ គីឡូម៉ែត្រនឹងត្រូវបញ្ចប់នៅដំណាច់ឆ្នាំ ២០២៣ ហើយប្រវែង ២៦ គីឡូម៉ែត្រទៀតនឹងត្រូវបញ្ចប់ក្នុងឆ្នាំ ២០២៤។ គម្រោងស្តារនិងពង្រីកផ្លូវជាតិលេខ ៤ ក៏មានស្ពានចាស់ចំនួន ២៤ កន្លែង ក៏នឹងត្រូវពង្រីកទំហំទទឹងរហូតដល់ ១០ ម៉ែត្រ។ ជាមួយគ្នានេះស្ពានថ្មីចំនួន ០៨ កន្លែងទៀតក៏នឹងត្រូវសាងសង់នៅក្នុងនោះមាន ០២ កន្លែង ជាទីតាំងដែលតែងតែរងគ្រោះដោយទឹកជំនន់ជារៀងរាល់ឆ្នាំ។ ស្ពានសរុបទាំង ៣២ កន្លែងគ្រោងសាងសង់ឱ្យបានរួចរាល់ក្នុងឆ្នាំ ២០២៥។

នៅថ្ងៃទី ២៨ កុម្ភៈ លោករដ្ឋមន្រ្តីបានចុះទៅពិនិត្យការស្ថាបនាផ្លូវក្រវាត់ក្រុងទី ៣។ ក្រោយការចុះពិនិត្យដោយធ្វើតេស្តជាក់ស្តែង លោករដ្ឋមន្រ្តីទទួលស្គាល់គុណភាពស្របតាមបច្ចេកទេសត្រឹមត្រូវ។

នៅថ្ងៃទី ០៩ ខែ មីនា លោករដ្ឋមន្រ្តីក៏បានចុះទៅពិនិត្យទីតាំងសាងសង់កំពង់ផែពហុបំណង និងមណ្ឌលភស្តុភារកម្មកំពង់ឆ្នាំង។ គម្រោងអភិវឌ្ឍកំពង់ផែពហុបំណង និងមជ្ឈមណ្ឌលភស្តុភារកម្មកំពង់ឆ្នាំង ជាតំបន់យុទ្ធសាស្ត្របម្រើដល់ការដឹកជញ្ជូន ព្រោះជាចំណុចកណ្តាលប្រទេសជាកន្លែងបែងចែកទំនិញពីបណ្តាខេត្តជុំវិញបឹងទន្លេសាបនិងខេត្តដទៃទៀតឆ្ពោះទៅទីផ្សារអន្តរជាតិ។

លោករដ្ឋមន្រ្តីបានគូសបញ្ជាក់ថា ការវិនិយោគសាងសង់កំពង់ផែនិងមជ្ឈមណ្ឌលភស្តុរភាកម្ម ជាចំណែកមួយធ្វើឱ្យការដឹកជញ្ជូនកាន់តែប្រសើរ ជាពិសេសការតភ្ជាប់នៃប្រព័ន្ធដឹកជញ្ជូនតាមផ្លូវទឹកដែលជាមហិច្ឆតារបស់រាជរដ្ឋាភិបាលកម្ពុជា។

នៅថ្ងៃទី ២០ ខែមីនា លោករដ្ឋមន្រ្តីក៏បានដឹកនាំប្រតិភូចុះពិនិត្យវឌ្ឍនភាពការងារសាងសង់អគាររដ្ឋបាលច្រកទ្វារអន្តរជាតិ ស្ទឹងបត់-បាណង់អៀង នៅក្រុងប៉ោយបែតខេត្តបន្ទាយមានជ័យ។

គម្រោងសាងសង់ច្រកទ្វារស្ទឹងបត់គ្រោងបញ្ចប់តាំងពីជាង ១ ឆ្នាំមុន ប៉ុន្តែក្រុមហ៊ុនសាងសង់ស្នើសុំពន្យាពេលដោយសារបញ្ហាជំងឺកូវីដ ប៉ុន្តែលោករដ្ឋមន្រ្តីបានក្រើនរំលឹកដល់ក្រុមហ៊ុនមិនអាចស្នើសុំពន្យាពេលម្តងហើយម្តងទៀតនោះទេ។

បើតាមលោករដ្ឋមន្រ្តី គម្រោងសាងសង់បានពន្យារពេល ២ លើករួចមកហើយ។ លើកទី១ ជាង១០០ថ្ងៃ លើកទី ២ ជាង ២០០ថ្ងៃ។ ក្រុមហ៊ុនសាងសង់សន្យានឹងជំរុញឲ្យបញ្ចប់នៅខែឧសភាឆ្នាំ ២០២៣ ប៉ុន្តែបើតាមលោករដ្ឋមន្រ្តីខែឧសភាក៏ប្រហែលជាមិនហើយទាន់ពេលដែរ។

លោករដ្ឋមន្រ្តីបានព្រមានថា ការពន្យារពេលអាស្រ័យលើកិច្ចសន្យាដែរ បើហួសរយៈពេលកំណត់ណាមួយគឺដល់ពេលត្រូវផាកពិន័យហើយ។

នៅថ្ងៃ ៣០ ឧសភា លោករដ្ឋមន្រ្តី ស៊ុន ចាន់ថុល ក៏ដឹកនាំប្រតិភូចុះពិនិត្យគម្រោងសាងសង់និងលើកកម្រិតគុណភាពផ្លូវជាតិលេខ ៣៣ និង ៣១ ក្នុងខេត្តកំពត។

ក្នុងដំណើរបេសកកម្មនេះក៏មានការចូលពីតំណាងក្រុមហ៊ុនសាជីវកម្មស្ពាន និងថ្នល់ចិន (CRBC) តំណាងក្រុមហ៊ុនទីប្រឹក្សាបច្ចេកទេសក្វាងចូវវ៉ានអាន និងមន្ត្រីបច្ចេកទេសគម្រោងជាច្រើនរូបផងដែរ។

ចំពោះគម្រោងស្ដារនិងលើកកម្រិតគុណភាពផ្លូវជាតិលេខ ៣១ ក្នុងខេត្តកំពត និងផ្លូវជាតិលេខ ៣៣ ក្នុងខេត្តកែប សម្រេចការសាងសង់បានរង្វង់ពី ២០ ទៅ ៣០ ភាគរយ ហើយអាចនឹងបញ្ចប់មុនពេលកំណត់នៅឆ្នាំ២០២៦។

យ៉ាងណាមិញលោករដ្ឋមន្រ្តីកត់សម្គាល់ឃើញថា ផ្លូវជាតិលេខ ៣១ បានអនុវត្តសាងសង់ស្របតាមស្តង់ដារបច្ចេកទេស ខណៈផ្លូវជាតិ ៣៣ លោកណែនាំឱ្យក្រុមហ៊ុនធ្វើការកែសម្រួលចំណុចខ្វះខាតឡើងវិញ។

លោករដ្ឋមន្រ្តីថ្លែងថា ផ្លូវជាតិលេខ ៣១ មានគ្រឹះរឹងមាំប៉ុន្តែចំពោះផ្លូវជាតិលេខ ៣៣ ធ្វើតេស្តរួចមិនទាន់ស្របតាមបច្ចេកទេសនោះទេ។

នៅថ្ងៃទី ២២ ខែមិថុនា ឆ្នាំ២០២៣ លោករដ្ឋមន្រ្តីក៏បានដឹកនាំប្រតិភូចុះទៅពិនិត្យវឌ្ឍនភាពការងារគម្រោងសាងសង់ផ្លូវជាតិលេខ៤៨ ជាថ្មីម្តងទៀត ខណៈលោកដឹកនាំគណៈប្រតិភូចូលរួមកម្មវិធីសម្ពោធកំពង់ផែដងទង់នៅក្រុងខេមរភូមិន្ទ ខេត្តកោះកុង។

ការចុះមកពិនិត្យជាថ្មីម្តងទៀតនេះលោក ស៊ុន ចាន់ថុល វាយតម្លៃជារួមការសាងសង់មានគុណភាពល្អអាចទទួលយកបាន ទោះបីមានចំណុចតិចតួចដែលត្រូវកែសម្រួលបន្ថែម។

នៅថ្ងៃ ២៦ មិថុនា លោករដ្ឋមន្ត្រី ស៊ុន ចាន់ថុល ក៏បានចុះពិនិត្យទីតាំងសាងសង់កំពង់ផែពហុបំណងនិងមណ្ឌលភស្តុភារកម្មកំពង់ឆ្នាំងស្ថិតក្នុងឃុំកំពង់ហៅ ស្រុកកំពង់លែង ខេត្តកំពង់ឆ្នាំង។

កំពង់ផែពហុបំណង និងមណ្ឌលភស្តុភារកម្មកំពង់ឆ្នាំង ជាគម្រោងវិនិយោគ របស់ក្រុមហ៊ុន KLP.T TRANSPORTATION Co.,Ltd បង្កើតឡើងនៅលើផ្ទៃដីជាង ១០០ហិកតា ដែលបង្កើតនូវសេវាកម្មផ្សេងៗ រួមមាន៖ (១) កំពង់ផែដឹកជញ្ជូនទំនិញ (២) មណ្ឌលសន្និធិប្រេង (៣) រមណីយដ្ឋានទេសចរណ៍ និង (៤) តំបន់សេដ្ឋកិច្ចពិសេស។

ថ្លែងក្នុងឱកាសនោះ លោករដ្ឋមន្ត្រីបានជម្រាបពីការទំនើបកម្មប្រព័ន្ធបច្ចេកវិទ្យាឌីជីថល ក្នុងការគ្រប់គ្រងប្រតិបត្តិការដឹកជញ្ជូនទំនិញចូលកំពង់ផែ ដើម្បីនាំមកនូវប្រសិទ្ធភាពការងារ កាត់បន្ថយការដឹកជញ្ជូនលើសទម្ងន់កម្រិតដោយច្បាប់ ជាពិសេសផ្តល់ឱ្យនូវតម្លាភាពក្នុងការធ្វើអាជីវកម្មរបស់វិស័យឯកជន លើកស្ទួយសេដ្ឋកិច្ច និងធានាការគ្រប់គ្រងចំណូលជូនជាតិបានកាន់តែប្រសើរ។

ការរៀបចំឱ្យបង្កើតកំពង់ផែពហុបំណង និងមណ្ឌលភស្តុភារកម្មនេះឡើងគឺក្នុងបំណងជំរុញការដឹកជញ្ជូន និងនាំចេញកសិផលពីខេត្តកំពង់ឆ្នាំង ខេត្តពោធិ៍សាត់ ខេត្តបាត់ដំបង ខេត្តបន្ទាយមានជ័យ ខេត្តសៀមរាប និងខេត្តកំពង់ធំ ទៅកាន់ទីផ្សារជាតិនិងអន្តរជាតិតាមរយៈផ្លូវទឹក ដោយកាត់បន្ថយការចំណាយពេលវេលា និងសោហ៊ុយក្នុងការដឹកជញ្ជូនជាពិសេសគឺកាត់បន្ថយការដឹកជញ្ជូនធុនធ្ងន់តាមផ្លូវថ្នល់ ដែលជាមូលហេតុនាំឱ្យផ្លូវថ្នល់ងាយរងការខូចខាត។

ដោយឡែកថ្មីៗនេះនៅថ្ងៃ ៨ សីហា លោក ស៊ុន ចាន់ថុល ក៏បានចុះទៅពិនិត្យកំណាត់ផ្លូវជាតិលេខ ៧៦ ក្នុងខេត្តមណ្ឌលគីរី ដែលរងការបាក់ស្រុតដោយសារជំនន់ទឹកភ្លៀង។

សកម្មភាពរបស់លោករដ្ឋមន្រ្តីចុះទៅទីតាំងបាក់ស្រុតក្រោយកើតឡើងតែប៉ុន្មានថ្ងៃ ហើយលោករដ្ឋមន្រ្តីបានជំរុញឲ្យមន្រ្តីជំនាញជួសជុលឲ្យបានឆាប់ រួមទាំងណែនាំឲ្យស្ថាបនាផ្លូវវាងដើម្បីប្រើប្រាស់បណ្តោះអាសន្ន។

ទាក់ទងកំណាត់ផ្លូវដែលបាក់ស្រុត លោករដ្ឋមន្រ្តីបានលើកពីជម្រើស ទីមួយគឺអាចជួសជុលឡើងវិញលើគន្លងផ្លូវចាស់ និងទីពីរសិក្សាពិនិត្យលទ្ធភាពសាងសង់លើគន្លងផ្លូវវាងថ្មីតែម្តង។ លោករដ្ឋមន្រ្តីបានបញ្ជាក់ថា ជម្រើសក្នុងការជួសជុលនឹងពិនិត្យសម្រេច បន្ទាប់ពីឆ្លងកាត់ការពិភាក្សាលម្អិតនិងស៊ីជម្រៅទាំងផ្នែកបច្ចេកទេសពាក់ព័ន្ធនិងផ្នែកហិរញ្ញវត្ថុ។

ក្រៅពីដឹកនាំប្រតិភូចុះតាមការដ្ឋានស្ថាបនាផ្លូវជាប់ជាប្រចាំ លោករដ្ឋមន្រ្តីក៏តែងតែចុះអមថ្នាក់ដឹកនាំក្នុងការសម្ពោធសមិទ្ធផល និងគម្រោងអភិវឌ្ឍនានាដែលបម្រើផលប្រយោជន៍ជាតិនិងប្រជាជន៕