ក្រុមហ៊ុនចិន នឹងបង្កើតរោងចក្រសហគ្រាស​ចំនួន ២៥ នៅខេត្តកំពង់ស្ពឺ​ នាចុងឆ្នាំ ២០២៣

ខេត្តកំពង់ស្ពឺ​ ជា​ខេត្ត​មួយ​ដែល​មានសក្ដានុពល​ខ្ពស់ ​ទទួលបាន​គម្រោ​ង​វិនិយោគក្នុងវិស័យឧស្សាហកម្ម ជាពិសេសបង្កើត​រោងចក្រ​សហគ្រាសថ្មីៗជាច្រើន។

លោក វ៉ី សំណាង អភិបាលខេត្តកំពង់ស្ពឺ បានឱ្យដឹងថា វិនិយោគិនមកពីខេត្តក្វាងចូវ សាធារណៈរដ្ឋប្រជាមានិតចិន នឹងបង្កើតរោងចក្រ សហគ្រាស នៅខេត្តកំពង់ស្ពឺ ចំនួន ២៥កន្លែង ដោយជំហានដំបូង មានតម្រូវការកម្លាំង​ពលកម្មប្រមាណ ២៣,០០០កន្លែង លើតម្រូវការសរុបប្រមាណជាង ៥០,០០០ កន្លែង។

លោកអភិបាលខេត្តឱ្យដឹងបែបនេះ នៅក្នុងដំណើរទស្សនកិច្ចដឹកនាំគណៈប្រតិភូអញ្ជើញជួបពិភាក្សាការងារ និងពិនិត្យ​ចង្វាក់ផលិតកម្មតាមបណ្តារោងចក្រ សហគ្រាស នៅខេត្តក្វាងចូវ សាធារណៈរដ្ឋប្រជាមានិតចិន កាលពីថ្ងៃទី ១៤ ខែ សីហា ឆ្នាំ ២០២៣។

យោងតាមការផេកផ្លូវការរបស់រដ្ឋបាលខេត្តកំពង់ស្ពឺ បានឱ្យដឹងថា គម្រោងរោងចក្រទាំងអស់នោះ មានមកពីតំបន់​សួនឧស្សាហ៍កម្ម SITOY GROUP ស្ថិតនៅសង្កាត់ ហូវ ជៀក ក្រុង តុងហ្គ័ន ផលិតកាបូបម៉ាកយី​ហោល្បីៗនាំ​ចេញទៅក្រៅប្រទេស ហើយម៉ាកយីហោទាំងអស់នេះ នឹងមកបង្កើតរោងចក្រនៅខេត្តកំពង់ស្ពឺ។ លោក TERAS YEUNG អគ្គនាយកក្រុមហ៊ុន SITOY GROUP បានបញ្ជាក់ថា ក្រុមហ៊ុនរបស់លោកប្តេជ្ញាដោយភាពជឿជាក់ នឹងទៅបង្កើតសាខានៅខេត្តកំពង់ស្ពឺ ចំនួន ២ រោងចក្រ ដែលផលិតកាបូបម៉ាកល្បីៗ និងមានតម្រូវការ​កម្លាំង​ពលកម្មជំហានដំបូងចំនួនប្រមាណ ៣,០០០ កន្លែង។

ជាមួយគ្នានេះ សួនឧស្សាហ៍កម្ម ហុង អ៊ី ដែលមានរោងចក្រសហគ្រាស ចំនួន ៦ ក្នុងវិស័យកាត់ដេរសម្លៀកបំពាក់ នឹងត្រូវមកបង្កើតនៅខេត្តកំពង់ស្ពឺ ដោយត្រូវការកម្លាំងពលកម្មជំហានដំបូងប្រមាណ ៦,០០០ កន្លែង។ លើសពីនេះទៀត សួនឧស្សាហកម្ម ហ្វីចូវ មាន ៤៤ រោងចក្រសហគ្រាស ជារោងចក្រផលិតសម្លៀកបំពាក់និងតម្បាញ, ផលិតស្បែកជើង, គ្រឿងបង្គុំអេឡិកត្រូនិក, ស្រោមទូរស័ព្ទនិងស្គ្រីនទូរស័ព្ទ, និងជ្រលក់ព័ណ៌ក្រណាត់ ជាដើម។ សួនឧស្សាហកម្មនេះ មានរោងចក្រសហគ្រាស ១៧ នឹងត្រូវទៅបង្កើតនៅខេត្តកំពង់ស្ពឺ ដែលមានតម្រូវការកម្លាំងពលកម្មជំហានដំបូងប្រមាណ ១៤,០០០ នាក់៕

អត្ថបទ៖ ផល ធារិត