ក្រសួងបរិស្ថាន រៀបចំទីលានទុកដាក់សំរាម សំណល់រឹង កម្រិតស្តង់ដា នៅខេត្តកណ្ដាល

ក្រសួងបរិស្ថាន បានរៀបចំទីលានទុកដាក់សំរាម សំណល់រឹង កម្រិតស្តង់ដាមួយកន្លែងដែលស្ថិតនៅស្ថានីយផ្សព្វផ្សាយ និងស្តារព្រៃឈើទួលព្រិច មានទីតាំងផ្លូវជាតិលេខ៥១ ឃុំទួលព្រេច ស្រុកអង្គស្នួល ខេត្តកណ្តាល។

នៅក្នុងពិធីផ្សព្វផ្សាយ និងដាំកូនឈើនៅទីតាំង “គម្រោងអភិវឌ្ឍទីលានទុកដាក់សំរាម សំណល់រឹង ចុងក្រោយកម្រិតតំបន់ប្រកបដោយអនាម័យ សម្រាប់រាជធានីភ្នំពេញ” នាថ្ងៃទី១៦ ខែសីហានេះ លោក សាយ សំអាល់ រដ្ឋមន្រ្តីក្រសួងបរិស្ថាន បានឱ្យដឹងថា ទីលានមួយនេះ ជាកន្លែងប្រមូល និងទុកដាក់ សំរាម សំណល់រឹង ដែលមានលក្ខណៈបច្ចេកទេសត្រឹមត្រូវ មិនបង្កផលប៉ះពាល់ដល់សុខភាពសាធារណៈ និងអនាម័យបរិស្ថាន។

លោករដ្ឋមន្ត្រីបានបន្តថា រាជរដ្ឋាភិបាល បានអនុញ្ញាតឱ្យសាងសង់ទីលានទុកដាក់សំរាម សំណល់រឹងខ្នាតតំបន់មួយនេះ បម្រើឱ្យការគ្រប់គ្រងសំណល់ សំរាម របស់រាជធានីភ្នំពេញ និងតាមបណ្ដាក្រុង ស្រុក មួយចំនួន នៃខេត្តកំពង់ស្ពឺ និងខេត្តកណ្ដាល ខណៈទីលានដែលមានបទដ្ឋានបច្ចេកទេសត្រឹមត្រូវ ក៏បានសាងសង់រួចហើយដែរនៅតាមបណ្ដាខេត្ត ក្រុង មួយចំនួនដូចជា ខេត្តព្រះសីហនុ ខេត្តកំពត ខេត្តកែប ខេត្តកំពង់ឆ្នាំង ខេត្តពោធិ៍សាត់ ខេត្តបាត់ដំបង ខេត្តកំពង់ធំ ខេត្តស្វាយរៀង។

គួរបញ្ជាក់ថា “គម្រោងអភិវឌ្ឍទីលានទុកដាក់សំរាម សំណល់រឹង ចុងក្រោយកម្រិតតំបន់ប្រកបដោយអនាម័យ សម្រាប់រាជធានីភ្នំពេញ” មានហេដ្ឋចនាសម្ព័ន្ធរួមមាន  អគារសម្រាប់ប្រតិបត្តិការ អគារបុគ្គលិក អគាររោងជាង ឃ្លាំង ចំណតមធ្យោបាយ  ស្ថានីយថ្លឹង ហេដ្ឋារចនាសម្ព័ន្ធផ្លូវ ប្រព័ន្ធទឹកភ្លៀង  អគារកំប៉ុស្ត អគារសម្រាប់ញែកសំណល់  រណ្តៅចាក់សំណល់ដែលមានការសាងសង់ចែកជា ៥ដំណាក់កាល ដោយក្នុងមួយដំណាក់កាលមានពី ៣-៤រណ្ដៅ មាន ជម្រៅពី ៣-៥ម៉ែត្រ ដែលគ្រោងប្រើប្រាស់បានរយៈពេលសរុប ២០ឆ្នាំ ប្រព័ន្ធប្រមូល និងប្រព្រឹត្តិកម្មទឹកសម្អុយ ប្រព័ន្ឋប្រមូលឧស្ម័នទីលាន តំបន់ទ្រនាប់ដែលមានការដាំដើមឈើ (គគីរ ឈើទាល អាកាស្យា) និងដីបម្រុងទុកសម្រាប់ហេដ្ឋរចនាសម្ព័ន្ធផ្សេងទៀត៕

អត្ថបទ៖ សំអឿន