សម្ដេច ស ខេង ណែនាំថ្នាក់ដឹកនាំអង្គភាពចំណុះក្រសួងមហាផ្ទៃ ត្រូវធានាថា មន្រ្តីរបស់ខ្លួនមកបំពេញការងារបានត្រឹមត្រូវ

ទោះបីជាមិនបន្តធ្វើជារដ្ឋមន្ត្រីក្រសួងមហាផ្ទៃ ក្នុងអាណត្តិថ្មីនេះក៏ដោយ ក៏សម្ដេចក្រឡាហោម ស ខេង បានណែនាំដល់ថ្នាក់ដឹកនាំអង្គភាពនីមួយៗ ចំណុះក្រសួងមហាផ្ទៃ ត្រូវធានាថា មន្រ្តីរបស់ខ្លួនមកបំពេញការងារបានត្រឹមត្រូវ ដោយមិនមែនមានតែឈ្មោះតែមិនមកធ្វើការនោះទេ។

ការណែនាំនេ គ្រាដែលសម្ដេចក្រឡាហោម ស ខេង បានអញ្ជើញជួបសំណេះសំណាលជាមួយថ្នាក់ដឹកនាំជាន់ខ្ពស់ក្រសួងមហាផ្ទៃ កាលពីព្រឹកថ្ងៃទី ១៧ ខែសីហា ឆ្នាំ ២០២៣នេះ។

នៅក្នុងឱកាសនោះ សម្ដេចក្រឡាហោម ស ខេង បានណែនាំឲ្យថ្នាក់ដឹកនាំអង្គភាពនីមួយៗ ត្រូវធានាថា មន្រ្តីរបស់ខ្លួនមកបំពេញការងារបានត្រឹមត្រូវ មានសមត្ថភាពបំពេញការងារ ដោយមិនមែនត្រឹមតែផ្ញើប្រអប់ ឬមានតែឈ្មោះតែមិនមកធ្វើការនោះទេ។

លើសពីនេះទៀត សម្ដេចក្រឡាហោម ស ខេង ក៏បានណែនាំដល់ថ្នាក់ដឹកនាំអង្គភាពនីមួយៗ ចំណុះក្រសួងមហាផ្ទៃ ត្រូវយកចិត្តទុកដាក់លើប្រព័ន្ធការពារសុវត្ថិភាព ដោយត្រូវកាត់បន្ថយការប្រើប្រាស់ភ្លើងមិនចាំបាច់ និងត្រូវរួមគ្នាថែរក្សាអានាម័យ និងសោភ័ណ្ឌភាពទាំងខាងក្នុង និងខាងក្រៅអគារ។  

សម្ដេច ក៏បានផ្ដល់អនុសាសន៍ថា ការកសាងស្ថាប័ន ការកែទម្រង់រដ្ឋបាលសាធារណៈ ការរៀបចំឲ្យបានល្អនូវតួនាទី ភារកិច្ច របៀបរបបធ្វើការងារ ការសាមគ្គីឯកភាពរវាងមន្រ្តីថ្នាក់លើ មន្រ្តីថ្នាក់ក្រោម មន្រ្តីថ្នាក់ស្មើជាមួយគ្នា ដោយប្រកាន់យកគោលការណ៍ស្មោះត្រង់ជាមួយគ្នា គឺជាគោលការណ៍សំខាន់ត្រូវបន្តអនុវត្ត ដើម្បីរួមគ្នាសម្រេចបានសមិទ្ធផជូនជាតិ និងប្រជាជន។

សម្ដេចបន្ថែមថា «ខាងលើក៏ស្មោះត្រង់ជាមួយខាងក្រោម ខាងក្រោមក៏ស្មោះត្រង់ជាមួយខាងលើ មិនត្រូវភូតកុហុក ហើយក៏មិនត្រូវមានល្បិចកលជាមួយគ្នាទេ។ យើងធ្វើការដើម្បីជាតិ ដើម្បីប្រជាពលរដ្ឋ មិនមែនដើម្បីយើងទេ។ អាចយើងទទួលផលមួយផ្នែកណានោះ ប៉ុន្តែយើងត្រូវតម្កល់ផលប្រយោជន៍ជាតិ និងប្រជាពលរដ្ឋជាធំ ដែលជាបញ្ហាមូលដ្ឋានទាំងអស់គ្នាត្រូវប្រកាន់យក»។

សម្ដេច ក៏បានណែនាំកុំឲ្យមានភាពចង្អៀតចង្អល់ ត្រូវខំបញ្ចេញស្នាដៃ បង្ហាញថា ខ្លួនពិតជាមានសមត្ថភាព ពិតជាមានឧត្តមគតិស្មោះត្រង់ចំពោះជាតិ និងប្រជាជន។ សម្ដេចបញ្ជាក់ទៀតថាដើម្បីជោគជ័យក្នុងការងារ ធំបំផុតគឺភាពស្មោះត្រង់ និងធ្វើការប្រកបដោយវិជ្ជាជីវៈ ហើយអ្នកដឹកនាំ ក៏មិនត្រូវមើល​បំណាំកូនចៅនោដែរ ប៉ុន្តែត្រូវតែប្រាប់ ណែនាំ តម្រង់ទិស។

សម្ដេចបន្តថា «រឿងអ្វីក៏ដោយ យើងក៏មិនចេះទាំងអស់ទេ តែយើងក៏មិនល្ងង់ទាំងអស់ដែរ យើងត្រូវតាំងខ្លួនអ៊ីចឹង។ កាលណាយើងតាំងថាខ្លួនយើងចេះ វាប្រៀបបានយកអ្វីមកគ្របសង្កត់ជាប់ វាអត់មានអ្វីចូលថ្មីទេ ព្រោះចេះហើយដឹងហើយ! តែបើតាំងខ្លួនថាល្ងង់ បានន័យថាយើងទទួលស្គាល់ថាយើងមិនទាន់ចេះអស់ទេ អ៊ីចឹងយើងបើកគ្របដើម្បីអ្វីថ្មីចូលមក យើងដឹង។ តែបើតាំងថាល្ងង់ ហើយមិនយកចិត្តទុកដាក់វាក៏ជាបញ្ហា»៕