ព័ត៌មានជាតិ

តើនរណាខ្លះ ពាក់ព័ន្ធនឹងផែនការរំដោះអ្នកទោសគ្រឿងញៀនឱ្យរត់គេចខ្លួនដោយសុវត្ថិភាព?

បានផុស

១ year មុន

នៅ

ថ្ងៃសៅរ៍ ១៩ សីហា ២០២៣

ដោយ

លោក ម៉ក់ ជីតូ អគ្គស្នងការរងនៃអគ្គស្នងការនគរបាលជាតិទទួលបន្ទុកផែនប្រឆាំងគ្រឿងញៀន បានលើកឡើងនៅក្នុងសន្និសីទសារព័ត៌មានព្រឹកថ្ងៃទី ១៩ សីហា ថា កងកម្លាំងនគរបាលជាតិ កំពុងសហការជាមួយបណ្តាប្រទេសជិតខាង និងបង្កើនកិច្ចសហប្រតិបត្តិការជាមួយអង្គភាពពាក់ព័ន្ធទាំងអស់ ដើម្បីតាមចាប់ខ្លួនមេគ្រឿងញៀនដែលក្រុមឧក្រិដ្ឋជនរំដោះនៅទីតាំងពេទ្យធ្មេញមួយកន្លែងនៅខេត្តសៀមរាប ត្រឡប់មកវិញ ក្នុងរយៈពេលដ៏ខ្លីខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទន្ទឹមនឹងការរំដោះទណ្ឌិត គេចខ្លួនដោយសុវត្ថិភាពនេះ មហាជនមានការសង្ស័យថា អាចមានការពាក់ព័ន្ធនឹងមន្ត្រីពន្ធនាគារ ទើបឧក្រិដ្ឋជនអាចរំដោះទណ្ឌិតនេះបាន។ ឆ្លើយតបនឹងការសង្ស័យនេះ លោក ម៉ក់ ជីតូ បានលើកឡើងថា នគរបាលជាតិ នឹងបើកការស្រាវជ្រាវ ដើម្បីឱ្យអស់មន្ទិលជុំវិញបញ្ហានេះ។

ទោះយ៉ាងណា នៅក្នុងប្រតិបត្តិការរបស់នគរបាលជាតិ ក្រោមការបញ្ជាដោយលោក នេត សាវឿន អគ្គស្នងការដ្ឋាននគរបាលជាតិ សមត្ថកិច្ចបានចាប់ខ្លួនជនសង្ស័យបានចំនួន៧នាក់ ក្នុងនោះ មានជនជាតិខ្មែរអាមេរិក ៦ នាក់ និងជនជាតិចិនកាន់ប៉ាស្ព័រអាមេរិក ០១ នាក់។

ដោយឡែកមុខសញ្ញាដែលសមត្ថកិច្ចកំណត់បានយ៉ាងច្បាស់ និងកំពុងតាមចាប់ខ្លួន រួមមាន មេខ្លោងឈ្មោះ Chen yueh sheng ហៅ ជេ, ទណ្ឌិតត្រូវបានរំដោះឈ្មោះ Chen hsin han, និងអ្នករៀបចំផែនការអាវុធ និងសម្ភារៈឈ្មោះ ស៊ីម សឿន ជាជនជាតិខ្មែរ។ នេះបើតាមរយបាយការណ៍របស់សមត្ថកិច្ច។

នៅក្នុងរបាយការណ៍នេះ ក៏បានបង្ហាញអត្តសញ្ញាណក្រុមជនជាតិអេស្ប៉ាញ មានតួនាទីជាអ្នកឃ្លាំមើលជនសង្ស័យ និងសង្កេតហេតុការណ៍ ជុំវិញទីតាំងគ្លីនិចធ្មេញ មានគ្នាចំនួន ៦នាក់ ក្នុងនោះស្រី ២នាក់ផងដែរ។ ចំណែកអ្នកទទួលទណ្ឌិតចេញពីគ្លីនិចធ្មេញនាំចូលឡាន ទៅជាមួយឈ្មោះ ស៊ីម សឿន សមត្ថកិច្ចកំពុងស្រាវជ្រាវអត្តសញ្ញាណ។

បើតាមលោក ម៉ក់ ជីតូ កងកម្លាំងនគរបាល នឹងតាមចាប់ទណ្ឌិតនេះឱ្យបាន ក្នុងរយៈពេលដ៏ខ្លី ដើម្បីយកមកផ្តន្ទាទោសឱ្យបានធ្ងន់ធ្ងរ។

សូមរម្លឹកថា ហេតុការណ៍នៃការរំដោះអ្នកទោសជនជាតិចិន ក្នុងអំឡុងពេលយកមកព្យាបាលនៅគ្លិនិកធ្មេញមួយកន្លែង នៅខេត្តសៀមរាប កើតឡើងកាលពីថ្ងៃ ១៧ សីហា ២០២៣ ក្រុមឧក្រិដ្ឋជនបានរៀបចំផែនការយ៉ាងហ្មត់ចត់ ដោយមានត្រៀមសម្ភារៈនិងរួមទាំងបំពាក់អាវុធគ្រប់ដៃ។ បើតាមលោក ម៉ក់ ជីតូ ការរៀបចំរំដោះអ្នកទោសចិននេះ ក្រុមឧក្រដិដ្ឋជនបានធ្វើសកម្មភាពផ្ទាល់មានគ្នាចំនួន ៤ នាក់ និងមានបក្ខពួកខាងក្រៅជួយរៀបចំសកម្មភាព។

ឧក្រិដ្ឋជនជាមេខ្លោង ត្រូវបានតុលាការកាត់ទោសឱ្យជាប់ពន្ធនាគារ ៥២ ឆ្នាំ ដោយជាប់ពាក់ព័ន្ធបទល្មើសគ្រឿងញៀន៕