សាំងបន្តឡើងថ្លៃ ៤៦៥០រៀល ខណៈម៉ាស៊ូតរក្សាតម្លៃដដែល ក្នុងសប្តាហ៍នេះ

នៅក្នុងសប្តាហ៍ទី៣ ខែ សីហានេះ ប្រេងម៉ាស៊ូត បន្តរក្សាតម្លៃដដែល ៤៧០០រៀល ក្នុងមួយលីត្រ បន្ទាប់ពីហក់ឡើង​ខ្លាំង​កាលពីសប្តាហ៍មុន។ ប៉ុន្តែតម្លៃប្រេងសាំង បានបន្តឡើង ១០០រៀលបន្ថែមពីតម្លៃដើម ពោលគឺ តម្លៃលក់រាយ​ក្នុងសប្តាហ៍នេះ ៤៦៥០រៀល ក្នុងមួយលីត្រ។ នេះបើតាមប្រកាសរបស់ក្រសួងពាណិជ្ជកម្ម នៅថ្ងៃទី ២១ សីហានេះ។

សូមបញ្ជាក់ថា បច្ចុប្បន្ន​នេះប្រេងឥន្ធនៈដែលកម្ពុជាប្រើប្រាស់ គឺបាននាំចូលពីប្រទេសសិង្ហបុរី ថៃ និងវៀតណាម។ ក្រុមហ៊ុនលក់រាយនៅកម្ពុជា ដែលនាំចូលប្រេងឥន្ធនៈ មានដូចជា ក្រុមហ៊ុនតេលា សូគីម៉ិច ប៉ាប៉ា សាវីម៉ិច លឹមឡុង និងក្រុមហ៊ុនមួយចំនួនទៀត។ ចំណែកក្រុមហ៊ុនបរទេស ដែលនាំចូលប្រេងឥន្ធនៈមកស្រុកខ្មែរ រួមមាន ក្រុមហ៊ុនតូតាល់ កាល់តិច និងក្រុមហ៊ុនភីធីធី។

ក្រសួងពាណិជ្ជកម្ម បានចេញតម្លៃលក់រាយរៀងរាល់ ១០ថ្ងៃម្តង ដើម្បីឆ្លើយតបឱ្យទាន់និន្នាការនៃការប្រែ​ប្រួលថ្លៃប្រេងឥន្ធនៈនៅលើសកលលោក៕