ខេត្តបន្ទាយមានជ័យមានរោងចក្រ ២២ កន្លែង​មានកម្មករនិយោជិតជាង ៩ ពាន់នាក់

លោក អ៊ុំ រាត្រី អភិបាលខេត្តបន្ទាយមានជ័យបានឱ្យដឹងថា បច្ចុប្បន្ននេះខេត្តបន្ទាយមានជ័យ​មានរោងចក្រចំនួន ២២ មានកម្មករនយោជិត​ចំនួន ៩៣១០ នាក់ ដែល​បានជួយលើកស្ទួយដល់ជីវភាពរស់នៅរបស់ប្រជាពលរដ្ឋក៏ដូចជាសេដ្ឋកិច្ចខេត្តឱ្យបានកាន់តែប្រសើរ។

នៅក្នុងឱកាសចូលរួមបទបង្ហាញអំពីស្ថានភាពទូទៅ និងសក្តានុពលរបស់ខេត្តបន្ទាយមានជ័យក្នុងវេទិកាអភិបាលខេត្តខ្សែក្រវ៉ាត់សេដ្ឋកិច្ចប្រចាំអនុតំបន់ទន្លេមេគង្គ នៅទីក្រុងគួនមីញខេត្តយូណានសាធារណ:រដ្ឋប្រជាមានិតចិនកាលពីចុងសប្តាហ៍កន្លងទៅនេះ លោកអភិបាលខេត្តបានបន្តថា ខេត្តបន្ទាយមានជ័យមានតំបន់សេដ្ឋកិច្ចពិសេសចំនួន ០៣ និង​សួន​ឧស្សាហកម្មចំនួន ១ រួមមានតំបន់សេដ្ឋកិច្ចពិសេសអូរនាងមានរោងចក្រចំនួន ៤ កន្លែង តំបន់សេដ្ឋកិច្ចពិសេសសានកូ មានរោងចក្រចំនួន ១០ កន្លែងនិងតំបន់សេដ្ឋកិច្ចរ៉ូយ៉ាល់គ្រុបមានរោងចក្រចំនួន ១ កន្លែងនិងសួនឧស្សាហកម្មក្រុងសេរីសោភ័ណ្ឌមានរោងចក្រចំនួន ៣ កន្លែង។

នៅក្នុងឱកាសនោះ លោកអភិបាលខេត្តបន្ទាយមានជ័យបានស្នើឱ្យអ្នកវិនិយោគិនចិន មកចូលរួមវិនិយោគនិងអភិវឌ្ឍខេត្តបន្ទាយមានជ័យឱ្យបានច្រើនបន្ថែមទៀតព្រោះថាខេត្តនៅមានសក្កានុពលវិនិយោគជាច្រើនទៀតនៅឡើយ៕

អត្ថបទ៖ សំអឿន