អ្នកឧកញ៉ា ហុង ពីវ ៖ទូកធំក្តោងធំ អតិថិជនជួបវិបត្តិ ក្រុមហ៊ុនបុរីពិភពថ្មី រឹតតែជួបវិបត្តិជាងអតិថិជនទៅទៀត

រយៈពេលប៉ុន្មានថ្ងៃមកនេះ ប្រជាពលរដ្ឋដែលជាអតិថិជនរបស់បុរីពិភពថ្មីរបស់អ្នកឧកញ៉ ហុង ពីវ បានចេញតវ៉ា ស្នើឱ្យម្ចាស់​បុរីនេះជួយទិញផ្ទះរបស់ពួកគាត់វិញ ដូចមាននៅក្នុងកិច្ចសន្យាដែលបានព្រមព្រៀងគ្នា។ អតិថិជន បានលើកឡើងថា ម្ចាស់បុរីពិភពថ្មី មិនព្រមទិញទិញផ្ទះពីអតិថិជនវិញនោះទេ ដោយបានបំពានកិច្ចសន្យា។

ឆ្លើយតបនឹងបញ្ហានេះ អ្នកឧកញ៉ា ហុង ពីវ ម្ចាស់បុរីពិភពថ្មី បានចេញសេចក្តីថ្លែងការណ៍មួយនៅរសៀលថ្ងៃទី ២១ សីហា ដោយមានខ្លឹមសារដូច្នេះថា« ក្រុមហ៊ុនបុរីពិភពថ្មី ចាប់ផ្តើមសាងសង់ផ្ទះលក់ជូនអតិថិជន ចាប់ពីឆ្នាំ ២០០៣ រហូតមកដល់ បច្ចុប្បន្ននេះ អស់រយៈពេល ២០ឆ្នាំមកហើយ។ អតិថិជនដែលបានទិញសម្រាប់រស់នៅ ក៏បានចំណេញ ពីការឡើងថ្លៃនៃផ្ទះដែលកំពុង រស់នៅ រីឯអតិថិជនវិនិយោគដែលបានទិញ-លក់ៗ ក៏បានចំណេញ រាប់ម៉ឺនដុល្លារ​មកហើយដែរ»។

នៅក្នុងសេចក្តីថ្លែងការណ៍ដដែល បានសង្កត់ធ្ងន់ថា «មកដល់បច្ចុប្បន្ននេះ ដោយសារមានវិបត្តិសេដ្ឋកិច្ចសកល ប្រទេសយើងក៏មិនអាចជៀសផុតបានដែរ ជាពិសេសខាងវិស័យអចលនទ្រព្យ ដូចអតិថិជនបានយល់ដឹងហើយថា ទូកធំក្ដោងធំ អតិថិជនជួបវិបត្តិ ក្រុមហ៊ុនរឹតតែជួបវិបត្តិ កាន់តែធំជាងអតិថិជនទៅទៀត»។

អ្នកឧកញ៉ា ហុង ពីវ បានអះអាងនៅក្នុងសេចក្តីថ្លែងការណ៍នេះថា ក្រុមហ៊ុននៅតែសម្រួលជូន អតិថិជនតាមលទ្ធភាព​ដែលអាចធ្វើទៅបាន មានដូចជា  ១-ក្រុមហ៊ុននៅតែអនុវត្ត១០០%ទៅតាមកិច្ចសន្យាលក់-ទិញ ដែលមានចែងជា​លាយលក្ខណ៍អក្សរ, ២-បន្ដផ្តល់ការរៀបចំឥណទានសារឡើងវិញ។ ពោលគឺ ពន្យារយៈពេលបង់រំលស់ពី ១៧ឆ្នាំ រហូតដល់ ៣០ ឆ្នាំ ។

អ្នកឧកញ៉ា បានគូសបញ្ជាក់ទៀតថា កន្លងមកក្រុមហ៊ុនបានយកទ្រព្យសម្បត្តិទៅតម្កល់នៅធនាគារ ដើម្បីខ្ចីប្រាក់មក វិនិយោគទិញ និងសង់ផ្ទះលក់ជូនអតិថិជន ហើយក្រុមហ៊ុនក៏ត្រូវបង់ការប្រាក់ជូនធនាគារផងដែរ។

ចំណែកអតិថិជនមកទិញផ្ទះពី ក្រុមហ៊ុនមានភាពងាយស្រួលបំផុត ១-គ្មានប្រាក់កក់, ២-គ្មានការបញ្ចាក់ ចំណូល ចំណាយ, ៣-គ្រាន់តែបង់រំលស់ប្រចាំខែ អាចចូលរស់នៅបាន និងមានសិទ្ធិអាស្រ័យផល ក្នុងនាមជា ម្ចាស់ផ្ទះ។ ក្រុមហ៊ុនពិភពថ្មីបានគោរពរាល់កិច្ចសន្យា ជាមួយអតិថិជនទាំងអស់ ដោយគ្មានការកែប្រែឡើយ។ នេះជាការបន្ថែម​របស់អ្នកឧកញ៉ា ហុង ពីវ។

ទន្ទឹមនឹងនេះ នៅក្នុងសេចក្តីថ្លែងការណ៍ បានព្រមានថា បើនីតិបុគ្គល រូបវន្តបុគ្គល ឬអតិថិជនណា ដែលបានយកឈ្មោះ​ក្រុមហ៊ុនទៅផ្សាយ ព័ត៌មានមិនពិត ក្នុងចេតនាបំផ្លើស លាបពណ៌ ក្នុងបំណងបង្អួចកេរ្តិ៍ឈ្មោះក្រុមហ៊ុនដោយប្រើប្រាស់ កែប្រែខុសពីការពិតនៃអង្គហេតុនីមួយៗ រវាងក្រុមហ៊ុន និងអតិថិជន នោះក្រុមហ៊ុននឹងប្រើប្រាស់សិទ្ធិ ដើម្បីតតាំងតាម​ផ្លូវច្បាប់ក្នុងបំណងការពារកិត្តិយសក្រុមហ៊ុន និងសូមឲ្យតុលាការធ្វើការផ្តន្ទា ទោសជនទាំងឡាយណា ដែលបានប្រ​ព្រឹត្តិដូច​បានរៀបរាប់ខាងលើ តាមផ្លូវច្បាប់៕