ព័ត៌មានជាតិ

កសិករនៅតែជម្នះចិញ្ចឹមគោ ទោះបីតម្លៃគោធ្លាក់ថ្លៃបន្តិចក្ដី

បានផុស

២ years មុន

នៅ

ថ្ងៃចន្ទ ២១ សីហា ២០២៣

ដោយ

បន្ទាយមានជ័យ ៖ ថ្វីត្បិតតែតម្លៃសត្វគោរស់ចុះថ្លៃបន្តិចក៏ពិតមែន តែមិនបានប៉ះពាល់ធ្ងន់ធ្ងរដល់ការចិញ្ចឹមសត្វគោរបស់ប្រជាកសិករស្រុកស្វាយចេកខេត្តបន្ទាយមានជ័យនោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះបើតាមការឱ្យដឹងពីលោកស៊ិន ខេ ប្រជាកសិករចិញ្ចឹមសត្វគោរនៅស្រុកស្វាយចេកខេត្តបន្ទាយមានជ័យបានឱ្យដឹងកាលពីចុងសប្តាហ៍កន្លងទៅនេះ។

លោកបានបន្តថា រូបលោកបានប្រកបរបស់ចិញ្ចឹមគោជាង១០ឆ្នាំហើយ ដោយការចិញ្ចឹមនេះមានគោជាង៥០ក្បាល គឺចិញ្ចឹមដោយខ្លួនឯងផង និងប្រវាស់ជាមួយគេផង ដោយបានផលចែកគ្នាតាមរយៈការលក់កូនគោដែលធំតៗគ្នា។

មូលហេតុដែលប្រជាកសិករអះអាងថា មិនប៉ះពាល់ធ្ងន់ធ្ងរដល់ការចិញ្ចឹមសត្វគោនៅពេលដែលតម្លៃសត្វគោចុះថោកនោះ ដោយសារតែការចិញ្ចឹមសត្វគោរបស់គាត់ក៏ដូចអ្នកចិញ្ចឹមដទៃគឺចិញ្ចឹមតាមបែបធម្មជាតិប្រលែងឱ្យស៊ីចំណីអាហារតាមវាលស្រែឬព្រៃ ដែលមានស្មៅដោយមិនចិញ្ចឹមជាលក្ខណៈកសិដ្ឋានត្រូវចំណាយលើការទិញចំណីអាហារនោះទេ។ និងម្យ៉ាងទៀតនៅពេលដែលសត្វគោចុះថ្លៃគឺកសិករមិនទាន់លក់នោះទេ។

ការចិញ្ចឹមគោបែបប្រវាស់ គឺរូបលោកមិនចំណាយទុនទិញសត្វគោនោះទេ គឺអ្នកដែលប្រវាស់ជាមួយលោកជាអ្នកទិញ។ ឧទាហរណ៍បើមេបួនចែកម្នាក់ពីរ ពេលបានកូន កូនគោដំបូងបានមកអ្នកឃ្វាល។ លុះគោមានប្អូន ទើបលក់ដោយមួយក្បាលបានមួយម៉ឺនបាត ឬ លើសប្រហែលមួយលាន់រៀល។

លោកហ៊ុយ ទូច ប្រធានការិយាល័យបសុពេទ្យខេត្តបន្ទាយមានជ័យបានឱ្យដឹងថា ចំពោះសត្វគោ/ក្របីដែលពលរដ្ឋចិញ្ចឹមទូទាំងខេត្តមានសរុបចំនួន១៤ម៉ឺនក្បាល ក្នុងនោះក្របី១ម៉ឺន៦ពាន់ក្បាល។

ការចិញ្ចឹមគោ/ក្របីមានការកើនឡើង (២០០០ក្បាល) ទាំងជាលក្ខណៈគ្រួសារ និងលក្ខណៈពាណិជ្ជកម្មបើធៀបឆ្នាំ២០២២។ ដោយឡែកបើតម្លៃគោរស់វិញពី១ម៉ឺនទៅ១ម៉ឺន២ពាន់រៀលក្នុងមួយគីឡូក្រាម។

លោកបានបន្តឱ្យដឹងទៀតថា ដោយបានការណែនាំជាប្រចាំពីលោកប្រធានមន្ទីរកសិកម្មខេត្តបន្ទាយមានជ័យជំនាញការិយាល័យបសុពេទ្យតែងធ្វើការយកចិត្តទុកដាក់លើការតាមដានសុខភាពសត្វនៅតាមមូលដ្ឋាន ក្នុងនោះផ្សព្វផ្សាយអត្ថប្រយោជន៍នៃប្រើប្រាស់វ៉ាក់សាំងដូចជា អ៊ុតក្តាម សារទឹកដល់អ្នកចិញ្ចឹមសត្វពាហណៈក្នុងខេត្ត។

លើសពីនេះទៅទៀតផ្តោតលើចំណីដែលមានទាំងបរិមាណនិងគុណភាពគឺដាំស្មៅចំណីសត្វ។

ដោយ ៖ អ ពៅ