សម្ដេចតេជោ ហ៊ុន សែន ៖ ការអត្ថាធិប្បាយខ្លះថា សម្ដេច ផ្ទេរតែតំណែងមិនបានផ្ទេរអំណាចនោះ ជាការអត្ថាធិប្បាយដ៏ល្ងឹតល្ងង់

សម្ដេចតេជោ ហ៊ុន សែន ប្រធានគណបក្សប្រជាជនកម្ពុជា បានលើកឡើងថា ចំពោះការអត្ថាធិប្បាយខ្លះដែលថា សម្ដេច ផ្ទេរតែតំណែងមិនបានផ្ទេរអំណាចនោះ ជាការអត្ថាធិប្បាយដ៏ល្ងឹតល្ងង់។

ក្នុងសន្និសីទសារព័ត៌មាន នៅព្រឹកថ្ងៃទី ២២ ខែសីហានេះ សម្ដេចតេជោ ហ៊ុន សែន មានប្រសាសន៍បែបនេះថា «ពិតណាស់ហើយ មានការធ្វើអត្ថាធិប្បាយខ្លះថា ហ៊ុន សែន ផ្ទេរតែតំណែងទេ ក៏ប៉ុន្តែមិនបានផ្ទេរអំណាច នោះជាការអត្ថាធិប្បាយដ៏ល្ងឹតល្ងង់របស់អ្នកដែលមិនចង់យល់ ឬអាចនិយាយបានថា ចំណេះដឹងទាបពេក»។

សម្ដេចតេជោ ហ៊ុន សែន បានបញ្ជាក់ថា អំណាចវាផ្សាភ្ជាប់នឹងមុខតំណែង ហើយសម្ដេចមានប្រសាសន៍ថា សម្ដេច គួរតែបង្រៀនចំពោះអ្នកធ្វើអត្ថាធិប្បាយខាងលើនេះ។ «តើសមាជិកសភា អនុញ្ញាតឲ្យចុះហត្ថលេខាជំនួសនាយករដ្ឋមន្ត្រីទេ? តើប្រធានគណបក្សនយោបាយ កាន់អំណាចគឺអនុញ្ញាតឲ្យមានការចុះហត្ថលេខាជំនួសនាយករដ្ឋមន្ត្រីទេ?»។ នេះជាសំណួររបស់សម្ដេចតេជោ ហ៊ុន សែន ទៅកាន់អ្នកអត្ថាធិប្បាយទាំងនោះ៕