សម្ដេចតេជោ ហ៊ុន សែន មានជំនឿថា រាជរដ្ឋាភិបាលអាណត្តិថ្មី នឹងបន្តអនុវត្តអភិក្រម ឆ្លុះកញ្ចក់ ងូតទឹក ដុសក្អែល ព្យាបាល វះកាត់

សម្ដេចតេជោ ហ៊ុន សែន ប្រធានគណបក្សប្រជាជនកម្ពុជា មានជំនឿថា រាជរដ្ឋាភិបាលអាណត្តិថ្មី ដែលដឹកនាំដោយឯកឧត្ដមបណ្ឌិត ហ៊ុន ម៉ាណែត​ នឹងបន្តអនុវត្តអភិក្រមទាំង ៥ នោះគឺឆ្លុះកញ្ចក់ ងូតទឹក ដុសក្អែល ព្យាបាល វះកាត់ ដែលជាតម្រូវការខានមិនបាន។

ក្នុងសន្និសីទសារព័ត៌មាន នៅព្រឹកថ្ងៃទី ២២ ខែសីហានេះ សម្ដេចតេជោ ហ៊ុន សែន មានប្រសាសន៍បែបនេះថា «ខ្ញុំគិតថា រាជរដ្ឋាភិបាលថ្មី ពួកគេនឹងបន្តអភិក្រមនេះ នេះតាមការយល់ដឹងរបស់ខ្ញុំ ព្រោះអភិក្រមទាំង ៥នេះ វាជាតម្រូវការខានមិនបាន សម្រាប់អភិបាលកិច្ច និងការអនុវត្តរបស់យើង»។

បើតាមសម្ដេចតេជោ ហ៊ុន សែន នៅក្នុងជួរគណបក្សប្រជាជនកម្ពុជា មានការស្រុះស្រួលគ្នាទៅលើអភិក្រមទាំង ៥​ខាងលើនេះ ហើយកន្លងមក ក៏បានអនុវត្តជាបន្តបន្ទាប់រួចទៅហើយដែរ៕