ព័ត៌មានជាតិ

តើមានទំនិញកសិកម្មកម្ពុជាប៉ុន្មានមុខហើយ ដែលអាចនាំចេញទៅចិនបាន?

បានផុស

១ year មុន

នៅ

ថ្ងៃអង្គារ ២២ សីហា ២០២៣

ដោយ

ផលិតផលកសិកម្មរបស់កម្ពុជាចាប់ផ្តើមមានវត្តមានលើទីផ្សារប្រទេសចិនជាបន្តបន្ទាប់។ បង្កងប៉ាក អន្ទង់ ត្រីដំរី និងខ្យង ជាផលិតផលកសិកម្មចុងក្រោយ ដែលប្រទេសចិនទើបអនុញ្ញាតិឲ្យនាំចូលបន្ថែមទៀតពីកម្ពុជា។

ដោយឡែកកាលពីខែឧសភា ឆ្នាំ២០២៣ ផលិតផលជលផលធម្មជាតិរបស់កម្ពុជាចំនួន ១១ មុខ ទទួលបានការអនុញ្ញាតអាចនាំចេញទៅកាន់ទីផ្សារប្រទេសចិនដោយផ្ទាល់។ ផលិផលចំនួន ១១ មុខនោះរួមមាន៖ កំពឹសទឹកសាប, ត្រីប្រាធំ, ត្រីប្រាខ្ចៅ, ខ្យងទឹកសាបពីរប្រភេទ, អន្ទង់ទឹកសាប, បង្កងកណ្តូបពីរប្រភេទ, បង្គាខ្លឹង, បង្គាស, និងបង្គាប៉ារ៉ា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រហូតមកដល់ពេលនេះផលិតផលកសិកម្មរបស់កម្ពុជា ដែលអាចនាំចេញប្រទេសចិនរួមមាន៖ អង្ករ ដំឡូងមីក្រៀម គ្រាប់ស្វាយចន្ទី ចេក ផ្លែស្វាយ ពោត ផ្លែមៀនប៉ៃលិន (តាង៉ែន) ត្រីប្រា ម្រេច កំពឹសទឹកសាប, ត្រីប្រាធំ, ត្រីប្រាខ្ចៅ, ខ្យងទឹកសាបពីរប្រភេទ, អន្ទង់ទឹកសាប, បង្កងកណ្តូបពីរប្រភេទ, បង្គាខ្លឹង, បង្គាស, និងបង្គាប៉ារ៉ា បង្កងប៉ាក អន្ទង់ ត្រីដំរី និងខ្យង។

នៅក្នុងសន្និសីទសារព័ត៌មានស្ដីពី «លក្ខខណ្ឌគុណភាពឆ្លើយតប និងការនាំចេញកសិផល ទាក់ទងនឹងកិច្ចព្រមព្រៀងពាណិជ្ជកម្មសេរីកម្ពុជា-កូរ៉េ និងចិន» កាលពីថ្ងៃទី១៨ ខែមីនា ឆ្នាំ២០២២ លោក ងិន ឆាយ អគ្គនាយកនៃអគ្គនាយកដ្ឋានកសិកម្មបានបញ្ជាក់ថា ផលិតផលកសិកម្មកម្ពុជាមុនអាចឈានដល់ការនាំចេញទៅទីផ្សារចិនបាន គឺត្រូវឆ្លងកាត់កិច្ចចរចាចំនួន ៧ ដំណាក់កាល។

តាមឯកសាររបស់ក្រសួងកសិកម្ម ដំណើរការនៃការចរចាបើកទីផ្សារសម្រាប់ផលិតផលកសិកម្មកម្ពុជាទាំង ៧ ដំណាក់កាលរួមមាន៖

១/ការស្នើសុំបើកទីផ្សារ
២/ការវាយតម្លៃហានិភ័យសមាសភាពចង្រៃ
៣/ការចុះត្រួតពិនិត្យខ្សែច្រវាក់ផលិតកម្ម
៤/ការរៀបចំសេចក្តីព្រាងពិធីសារ និងចុះហត្ថលេខា
៥/ការបំពេញលក្ខខណ្ឌតម្រូវដូចមានចែងក្នុងពិធីសារ
៦/ការចុះត្រួតពិនិត្យមើលលទ្ធផលនៃការបំពេញលក្ខខណ្ឌតម្រូវ
៧/ការសម្រេចចិត្តបើកទីផ្សារ