ព័ត៌មានជាតិ

ភ្លៀងធ្លាក់ច្រើន ធ្វើឱ្យដំឡូងមីខូចគុណភាព ធ្លាក់ចុះទាំងទិន្នផល និងតម្លៃ

បានផុស

១ year មុន

នៅ

ថ្ងៃអង្គារ ២២ សីហា ២០២៣

ដោយ

ស្ថានភាពទិន្នផល និងតម្លៃទីផ្សារដំឡូងមីស្រស់នៅខេត្តឧត្តរមានជ័យមានការធ្លាក់ចុះដោយសារបញ្ហាអាកាសធាតុធ្លាក់ភ្លៀងដែលធ្វើឱ្យដំឡូងខូចគុណភាពនៅឆ្នាំ ២០២៣នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក នាង សុត កសិករដាំដំឡូងមី នៅស្រុកត្រពាំងប្រាសាទ ខេត្តឧត្តរមានជ័យ បានប្រាប់ថា លោកមានដាំដំឡូងមីប្រមាណ ៥០ ហិកតា ខណៈទិន្នផលនៅឆ្នាំនេះ ធ្លាក់ចុះជិតពាក់កណ្ដាល រីឯតម្លៃក៏ធ្លាក់ចុះដូចគ្នាដែរ ដោយសារបញ្ហាអាកាសធាតុធ្លាក់ភ្លៀងច្រើនធ្វើឱ្យដំណាំខូចគុណភាព។

ពីមុនលោកថា ក្នុង១ ហិកតា ប្រមូលផលបានពី ៣០ ទៅ ៣៥ តោន ខណៈបច្ចុប្បន្នលោកប្រមូលបានត្រឹមជាង ១០ តោនប៉ុណ្ណោះ។ តម្លៃលក់ចេញបច្ចុប្បន្នធ្លាក់ចុះ ចន្លោះពី ២៥០ រៀល ដល់ ២៨០ រៀល ខណៈនៅខែប្រាំងលក់បានក្នុងតម្លៃ ៤០០ រៀល។

លោក នាង សុត ប្រាប់ថា នៅឆ្នាំនេះ ការទូទាត់លើការចំណាយលើរបរដាំដំឡូងមីមិនរួចខ្លួននោះទេ ខណៈកសិករមួយចំនួនទៀតក៏ត្រូវខាតបង់ផងដែរ។

ទោះយ៉ាងណា របាយការណ៍របស់ក្រសួងពាណិជ្ជកម្មបង្ហាញថា រយៈពេល៦ខែ ឆ្នាំ២០២៣ ការនាំចេញផលិតផលដំឡូងមីពីកម្ពុជាទៅកាន់ទីផ្សារអន្តរជាតិមានតម្លៃជាប្រាក់ជាង ៣៣៩ លានដុល្លារ កើនឡើងជាង ១០ ភាគរយ បើធៀបនឹងរយៈពេលដូចគ្នាកាលពីឆ្នាំ២០២២។

ផលិតផលដំឡូងមីរបស់កម្ពុជា ភាគច្រើនត្រូវបាននាំចេញទៅកាន់ប្រទេសថៃ និងវៀតណាម ដែលជាទីផ្សារចម្បងបំផុតសម្រាប់ប្រជាកសិកររស់នៅជាប់ព្រំដែនប្រទេសទាំង២នេះ៕