រដ្ឋមន្ត្រីក្រសួងការងារថ្មី ចុះពិនិត្យសកម្មភាពផលិតស្បែកជើង និងហូបបាយជាមួយកម្មកររោងចក្រនៅផ្លូវវេងស្រេង

លោក ហេង សួរ រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈថ្មី នៅថ្ងៃទី២៣សីហានេះបានចុះពិនិត្យសកម្មភាពផលិតស្បែកជើង និងបានហូបបាយជាមួយបងប្អូនកម្មករនិយោជិតដែលធ្វើការនៅរោងចក្រផលិតស្បែកជើង ម៉េងដា ហ្វូតវៀ នៅផ្លូវវេងស្រេងដោយមិនបានប្រាប់ជាមុន។

តាមរយៈផេកហ្វេប៊ុកផ្លូវការលោក ហេងសួរ បានសរសេរថា «ថ្ងៃដំបូងបានមកមើលសកម្មភាពផលិតស្បែកជើង និងបានហូបបាយជាមួយបងប្អូនកម្មករនិយោជិត ដែលធ្វើការនៅរោងចក្រផលិតស្បែកជើង ម៉េងដា ហ្វូតវៀ នៅផ្លូវវេងស្រេង»។លោករដ្ឋមន្ត្រីបានសរសេរទៀតថា «សុំទោសបងប្អូនផងដែលខ្ញុំបានចុះទៅដោយមិនបានប្រាប់មុន!»។

លោករដ្ឋមន្ត្រីបានសរសេរបន្តថា បច្ចុប្បន្នរោងចក្រនេះមានកម្មករនិយោជិតសរុបជាង៣ពាន់នាក់ ក្នុងនោះមានបងប្អូនកម្មការិនី ដែលកំពុងមានផ្ទៃពោះចំនួន១៦០នាក់ និងជនដែលមានពិការភាពចំនួន៤៣នាក់។ បងប្អូនកម្មករនិយោជិតនៅទីនេះធ្លាប់ជួបជាមួយសម្តេចពុក ហ៊ុន សែន កាលពីឆ្នាំ២០១៨ ហើយបងប្អូនដែលជារដ្ឋបាល ប្រធានផ្នែក ប្រធានក្រុម ក៏ធ្លាប់បានជួបជាមួយឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា កាលពីខែឧសភា ឆ្នាំ២០២៣នេះផងដែរ។

លោករដ្ឋមន្ត្រីបានសរសេរទៀតថា «បងប្អូនដែលខ្ញុំបានជួប គឺនឹករឭកដល់សម្តេចពុក ហ៊ុន សែន ហើយចងចាំជានិច្ចនូវរូបភាពដ៏ស្និទ្ធស្នាល និងកក់ក្ដៅដែលសម្តេចពុកបានចុះជួបបងប្អូនកម្មករនាពេលកន្លងទៅ។ បងប្អូនក៏រំពឹងថានឹងបានជួប បងប្រុស ហ៊ុន ម៉ាណែត ដ៏ស្វាហាប់ ម៉ឺងម៉ាត់ និងមានជ័យរបស់គេក្នុងពេលឆាប់ៗនេះផងដែរ»។

លោករដ្ឋមន្ត្រីបានសរសើររសជាតិម្ហូបនៅរោងចក្រនេះ គឺឆ្ងាញ់ និងមានអនាម័យល្អអាចទទួលយកបានជាគំរូមួយ។ លោករដ្ឋមន្ត្រីបានណែនាំឱ្យថ្នាក់ដឹកនាំ និងមន្ត្រីក្រសួង រួមទាំងអ្នកគ្រប់គ្រងរោងចក្រនីមួយៗ ត្រូវចុះមកជួប និងហូបបាយជាមួយបងប្អូនឱ្យបានញឹកញាប់ដើម្បីសាករសជាតិម្ហូបលក្ខខណ្ឌអនាម័យ និងរកវិធីសាស្ត្រកែលម្អឱ្យកាន់តែប្រសើរ
ឬយកធ្វើជាគំរូទៅកន្លែងផ្សេង។

លោករដ្ឋមន្ត្រីបានបញ្ជាក់ថា នៅរោងចក្រនេះ មានសហជីពមូលដ្ឋានរហូតដល់ទៅជាង២០សហជីព។ ប៉ុន្តែទំនាក់ទំនងរវាង សហជីពមូលដ្ឋាន និងអ្នកគ្រប់គ្រង គឺអាចចរចា និងដោះស្រាយការងារជាមួយគ្នាបាន៕

អត្ថបទ៖ សំអឿន