ក្រោយ​ចាកចេញពី​តំណែង លោក ស៊ុន ចាន់ថុល បន្សល់​ស្នាដៃ​អ្វី​ខ្លះ​នៅ​ក្រសួង​សាធារណការ​?

លោក ស៊ុន ចាន់​ថុល បាន​ចូល​មកកាន់តួនាទី​ជា​រដ្ឋមន្រ្តី​ក្រសួង​ក្រសួងសាធារណការ និង​ដឹកជញ្ជូន​កាលពី​ឆ្នាំ ២០១៦។ ជា​បញ្ញវន្ត​បញ្ចប់​ការ​សិក្សា​​នៅ​អាមេរិក លោក ស៊ុន ចាន់ថុល មាន​ប្រវត្តិ​ប្រឡូកការងារ​ក្នុង​វិស័យឯកជនជាង ១០ ឆ្នាំ ​មុនចូល​​ទៅ​បម្រើការងារ​រដ្ឋ​ និង​បាន​ទៅ​​​ដឹកនាំ​នៅ​​ក្រសួង​សាធារណការ និ​ងដឹកជញ្ជូន។

ក្នុង​អណត្តិជា​រដ្ឋមន្រ្តី​ ​លោក ស៊ុន ចាន់​ថុល បានខិតខំ​កែទម្រង់​ប្រព័ន្ធ​ការងារ​នៅ​ក្រសួង​សាធារណការ ដោយ​អនុវត្ត​​​គោលការណ៍បង្ខិតសេវាឲ្យ​កៀកប្រជាពលរដ្ឋ តាមរយៈការប្រើប្រាស់ប្រព័ន្ធបច្ចេកវិទ្យាព័ត៌មានវិទ្យា។

លោក​រដ្ឋមន្រ្តីក៏​តែងតែ​បំផុស​ស្មារតី​ឲ្យ​ថ្នាក់​ដឹកនាំ​និង​មន្រ្តី​ក្រោម​ឱវាទ ​ខិតខំ​បំពេញ​ការងារ​ប្រកប​ដោយ​ឆន្ទៈមោះមុត​ពោល​គឺធ្វើឱ្យបានលឿន ធ្វើឱ្យមាន​ប្រសិទ្ធភាព និង​តម្លាភាព ដើម្បីបម្រើ​សេវាជូន​ប្រជាពលរដ្ឋ​ប្រកប​ដោយការទទួលខុសត្រូវខ្ពស់។

អ្វី​ជាការចាប់អារម្មណ៍​ លោក​រដ្ឋមន្រ្តីតែងតែ​បង្ហាញ​វត្តមាននៅ​តាមការដ្ឋាន​សាងសង់​ហេដ្ឋារចនាសម្ព័ន្ធ​នានា​ ជាពិសេស​គម្រោង​ផ្លូវ​ថ្នល់​ដែល​លោកយកចិត្តទុកដាក់ខ្លាំង​បំផុត​​ ដើម្បី​ធានា​​ឲ្យ​ក្រុមហ៊ុនម៉ៅការ​អនុវត្ត​ការ​សាងសង់​ស្រប​តាម​​ស្តង់ដា​បច្ចេកទេស​បានត្រឹមត្រូវ។

គម្រោង​ហេដ្ឋារចនាសម្ព័ន្ធ​ផ្លូវ​ជាតិ​ធំៗ​ជាច្រើន​ បានសាងសង់នៅ​​​ក្នុង​អណ្ណតិ​របស់​លោក​រដ្ឋមន្រ្តីមាន​ដូចជា គម្រោង​ផ្លូវ​ជាតិ​​លេខ ២ លេខ ២២ លេខ ៣ លេខ ១១ គម្រោង​ផ្លូវ​ល្បឿនលឿន​ភ្នំពេញ​ខេត្ត​ព្រះសីហនុ គម្រោងផ្លូវល្បឿនលឿនទៅក្រុង​បាវិតដែលកំពុង​សាងសង់ ​ផ្លូវក្រវាត់ក្រុងទី ២ និងទី៣ ស្ពានអាកាសដីហុយ ផ្លូវជាតិ​លេខ ៤ ផ្លូវជាតិ​លេខ ៥ ផ្លូវជាតិ​លេខ ៣១ លេខ ៣៣ ​កំណាត់​ផ្លូវជាតិ​លេខ ២៣ ក៏ដូចជា​គម្រោង​ផ្លូវ​ជាតិ​លេខ ៤៨ លេខ ១០ និង​ផ្លូវជាតិលេខ ៥៨ ដែលជាផ្លូវក្រវ៉ាត់ព្រំដែនតភ្ជាប់ពីក្រុងប៉ោយប៉ែត ខេត្តបន្ទាយមានជ័យទៅដល់ក្រុងសំរោងខេត្តឧត្តរមានជ័យ។

ក្រៅពីបណ្តាញ​ផ្លូវជាតិ​ធំៗ លោករដ្ឋមន្រ្តី​ក៏​បានជំរុញកែលម្អ​លើការ​ស្ថាបនា​បណ្តា​ផ្លូវ​ខេត្ត​តភ្ជាប់​ដូចជា ផ្លូវខេត្តលេខ ១៤៦បេ លេខ ១៤៨ នៅ​ខេត្តព្រះសីហនុ និង​​លេខ ៣១២ ទៅច្រកព្រំដែន​វៀតណាម​ស្ថិតនៅក្នុង​ស្រុកព្រះស្តេច ខេត្តព្រៃវែង។

ទាក់ទង​ចំណូល​សេវា​សាធារណៈ​ ក្នុងពេល​លោក​ដឹកនាំ​ជា​រដ្ឋមន្រ្តី​បាន​កើន​ឡើង​យ៉ាងគំហុក។ ចំណូល​ពី​សេវាសាធារណៈកើនឡើង​ដល់​ជាង ៤០ លាន​ដុល្លារ​ក្នុងមួយ​ឆ្នាំ។ លោក​រដ្ឋមន្រ្តី​ថ្លែង​ថា ការដាក់​ឲ្យ​ប្រើប្រាស់​ប្រព័ន្ធស្វ័យប្រវត្តិកម្ម​លើការ​ផ្តល់​សេវា​សាធារណៈ​​មិនត្រឹមតែជួយ​ឱ្យក្រសួងអាច​រក​​ចំណូល​ចូល​ក្នុងថវិកាជាតិបាន​យ៉ាងច្រើន ថែមទាំង​​ផ្តល់​ភាពងាយស្រួល រហ័ស ចំណេញពេលវេលា បញ្ឈប់​ការចំណាយ​ក្រៅផ្លូវនៅតាមកន្លែង​ផ្តល់សេវានីមួយៗ​។

កម្ពុជា​ថ្មី​សូម​រំលេចពី​​ស្នាដៃ​ខ្លះៗ​របស់លោក​ ស៊ុន ចាន់​ថុល ក្នុង​អណត្តិ​ដែល​លោក​កាន់តួនាទីជា​រដ្ឋមន្រ្តី​នៅ​ក្រសួង​សាធារណការ​ និង​ដឹកជញ្ជូន។

១- ការ​រៀបចំ​​ប្រព័ន្ធ​ស្វ័យប្រវត្តិកម្ម​ការ​ផ្តល់សេវាសាធារណៈ
២- បង្កើតកម្មវិធីបង្រៀនបើកបរ (Cambodia Driving Rules)
៣- រៀបចំ​ប្រព័ន្ធស្វ័យប្រវត្តិកម្មលក់លេខពិសេសផ្ទាល់ខ្លួនសម្រាប់​រថយន្ត
៤- បង្កើតកម្មវិធីថែទាំផ្លូវ (ROAD CARE Mobile App)
៥- រៀបចំប្រព័ន្ធ QR Code បំពាក់​នៅលើ​ស្លាកលេខ​យានយន្ត
៦- បង្កើតមណ្ឌលត្រួតពិនិត្យលក្ខណៈបច្ចេកទេសយានយន្ត (ឆៀក) និង​ឆៀក​ចល័ត​នៅតាម​បណ្តា​ខេត្ត
៧- រៀបចំមណ្ឌលប្ដូរនិងពន្យារបណ្ណបើកបរនៅតាមផ្សារទំនើប
៨- ផ្ដួចផ្ដើម​គំនិត​អភិវឌ្ឍ​សេវា​ដឹកជញ្ជូន​អ្នក​ដំណើរ​តាមផ្លូវទឹកក្នុងរាជធានីភ្នំពេញ
៩- ប្រើ​កណ្ដាប់​ដៃ​ដែក​គ្រប់គ្រង​យានយន្ត​កែច្នៃ​ខុស​បច្ចេកទេស និង​ដឹកលើសទម្ងន់
១០- ដាក់ឲ្យដំណើរការ​ខ្សែរថភ្លើងភ្នំពេញ​ខេត្ត​ព្រះសីហនុ ដែល​ជា​ការ​បើក​ទំព័រ​សករាជ​ថ្មីនៃ​វិស័យ​ដឹក​ជញ្ជូន​ផ្លូវដែក​របស់​ប្រទេស​កម្ពុជា។
១១-បង្កើត​វិទ្យាស្ថានតេជោសាធារណការ និងដឹកជញ្ជូន
១២- បង្កើតទីស្តីការ​ក្រសួងសាធារណការថ្មី
១៣- សម្រួល​នីតិវិធី​កាត់​ឈ្មោះ​យានយន្ត​
១៤- បង្កើតកម្មវិធីដកពិន្ទុប័ណ្ណបើកបរ
១៥- អភិវឌ្ឍផ្លូវ​ល្បឿនលឿន​ភ្នំពេញ-ព្រះសីហនុ ដែលបញ្ចប់ដាក់ឲ្យប្រើប្រាស់នៅឆ្នាំ២០២២
១៦- គម្រោងផ្លូវល្បឿនលឿនភ្នំពេញ-បាវិត ដែល​កំពុង​ដំណើរការ​សាងសង់
១៧- គម្រោងផ្លូវក្រវាត់ក្រុងទី ៤ (កំពុងសិក្សា)
១៨- គម្រោងប្រព័ន្ធរថភ្លើងធុនស្រាលនៅភ្នំពេញ
១៩-បង្កើតកម្មវិធី MPTW Live Show ឆ្លើយតបចម្ងល់ពលរដ្ឋលើបណ្តាញទំនាក់ទំនង​សង្គម
២០- អភិវឌ្ឍកម្មវិធី (App) សម្រាប់ក្រុមការងារ​ត្រួតពិនិត្យយានយន្ត​ដឹកជញ្ជូន​លើសទម្ងន់កម្រិត
២១-ជំរុញប្រើប្រាស់រថយន្តអគ្គិសនី និងបង្កើតស្ថានីយសាកបញ្ចូលអគ្គិសនីតាមបណ្តាខេត្តក្រុង
២២-រៀបចំប្រព័ន្ធផ្លាស់ប្តូរទិន្នន័យអេឡិចត្រូនិកនៅកំពង់ផែ (Port EDI)
២៣-រៀបចំមជ្ឍមណ្ឌលពិសោធន៍ក្រសួងសាធារណការ
២៤-ផ្តួចផ្តើមបង្កើតបណ្តាញដឹកជញ្ជូនតាមផ្លូវទឹក តាមរយៈបង្កើតផែរណបតាមដងទន្លេ
២៥-ដាក់ផែនការជីកស្តារព្រែកទន្លេបាសាក់ ភ្ជាប់ទៅសមុទ្រខេត្តកែប
២៦-ដាក់​មហិច្ឆតាប្តូរផ្លាកយានយន្ត​ទៅជាប្រព័ន្ធ QR Code
២៧-ដាក់ឲ្យដំណើរការកម្មវិធីទូរសព្ទថ្មី MPWT Public Service Tracking ដើម្បី​តាម​ដាន​ប្រតិបត្តិការ​ប្រើប្រាស់​សេវា​សាធារណៈ​នៅ​​ក្រសួង​សាធារណការ​និង​ដឹកជញ្ជូន
២៨-ទិញគ្រឿងចក្របំពាក់ដល់​មន្ទីរសាធារណការ​រាជធានី-ខេត្ត ដើម្បីជួយសម្រួលដល់ការជួសជុលថែទាំផ្លូវថ្នល់ឱ្យកាន់តែមានប្រសិទ្ធភាពខ្ពស់។

គួរ​បញ្ជាក់ថា សម្រាប់​រដ្ឋាភិបាល​នីតិកាលទី ៧ តំណែង​​រដ្ឋមន្រ្តីក្រសួង​សាធារណការ​ និង​ដឹកជញ្ជូន ត្រូវបាន​ផ្លាស់ប្តូរ​​​ជំនួស​ដោយ​លោក ប៉េង ពោធិ៍នា ដោយ​អតីត​រដ្ឋមន្រ្តី​លោក ស៊ុន ចាន់ថុល ឡើងតំណែងជាឧបនាយករដ្ឋមន្ត្រីសម្រាប់គណៈរដ្ឋមន្រ្តីថ្មីដឹកនាំដោយឯកឧត្តមបណ្ឌិត ហ៊ុន ម៉ាណែត៕