ពន្ធដារប្រមូលពន្ធអចលនទ្រព្យទើបសម្រេចបានជាង ៣៦ភាគរយនៃផែនការប៉ុណ្ណោះ

ក្នុងរយៈពេល ៧ខែ ដើមឆ្នាំ២០២៣ ការប្រមូលពន្ធលើអចលនទ្រព្យ របស់អគ្គនាយកដ្ឋានពន្ធដារ បានប្រមាណជាង ១៤លានដុល្លារ បើប្រៀបធៀបនឹងផែនការ ប្រចាំឆ្នាំ២០២៣ ទើបតែសម្រេចបាន ៣៦.៩៩% ប៉ុណ្ណោះ។ នេះបើតាម​អគ្គនាយកដ្ឋានពន្ធដារ។​

យោងតាមរបាយការណ៍ ស្តីពីលទ្ធផលនៃការអនុវត្តថវិកាឆមាសទី១ និងការវាយតម្លៃការអនុវត្តច្បាប់ស្តីពី​ហិរញ្ញវត្ថុ​សម្រាប់​ការគ្រប់គ្រង ឆ្នាំ២០២៣ របស់ក្រសួងសេដ្ឋកិច្ច និងហិរញ្ញវត្ថុ បានបង្ហាញថា តាមការប៉ាន់ស្មាន​រហូតដល់​ដំណាច់ឆ្នាំ២០២៣ ចំណូលពន្ធដារ នឹងសម្រេច បានប្រមាណ១០៧.៥%នៃច្បាប់ស្តីពីហិរញ្ញវត្ថុសម្រាប់​ការគ្រប់គ្រងឆ្នាំ​២០២៣ ដែលឆ្លុះបញ្ចាំងឱ្យឃើញពីប្រសិទ្ធភាពនៃកិច្ចខិតខំប្រឹងប្រែង ក្នុងការអនុវត្តផែនការយុទ្ធសាស្ត្រ និងផែនការ​ប្រតិ​បត្តិ​របស់អគ្គនាយកដ្ឋានពន្ធដារ។ ក្នុងរយៈពេល ៧ខែ ឆ្នាំ២០២៣ ពន្ធ-អាករសរុប ដែលអគ្គនាយកដ្ឋាន​ពន្ធដារ​ប្រមូល​បានមានប្រមាណជាង ២ ៣១២ លានដុល្លារ ស្មើនឹង ៦៤.៧៦% នៃផែនការច្បាប់ស្តីពីហិរញ្ញវត្ថុ​សម្រាប់ការគ្រប់​គ្រងឆ្នាំ២០២៣ តែទោះជាយ៉ាងនេះក្តី បើពិនិត្យពីលទ្ធផលនៃការប្រមូលចំណូលពន្ធតាម ប្រភេទពន្ធវិញ មានប្រភេទ​ពន្ធមួយ​ចំនួននៅតែមានបញ្ហាប្រឈម ដូចជា ពន្ធលើអចលនទ្រព្យជាដើម។

ដើម្បីជំរុញការប្រមូលពន្ធលើអចលនទ្រព្យ និងចៀសវាងការផាកពិន័យលើម្ចាស់អចលនទ្រព្យ ដែលមិនបានបំពេញ​កាតព្វកិច្ចពន្ធនេះបានទាន់ពេលវេលា កាលពីថ្ងៃទី១១ ខែសីហា ឆ្នាំ២០២៣ អគ្គនាយកដ្ឋានពន្ធដារបានចេញ​លិខិតជូន​ដំណឹងស្តីពីការរំលឹកលើកទី២ ការប្រកាស បង់ពន្ធលើអចលនទ្រព្យ និង/ឬពន្ធលើដីធ្លីមិន​បានប្រើប្រាស់សម្រាប់​ឆ្នាំ២០២៣ ក្នុងការក្រើនរំលឹកម្ចាស់អចលនទ្រព្យមួយចំនួន​ដែលនៅមិនទាន់បានបំពេញកាតព្វកិច្ចប្រកាស​និងបង់​ប្រាក់ពន្ធ ឱ្យមករួសរាន់បង់ប្រាក់ពន្ធយ៉ាងយឺតបំផុតត្រឹមថ្ងៃទី៣០ ខែកញ្ញា ឆ្នាំ២០២៣ ជាកំណត់។ ចំពោះការខក​ខានមិន​បានបំពេញកាតព្វកិច្ចសារពើពន្ធនេះ ម្ចាស់អចលនទ្រព្យនឹងត្រូវរងនូវទណ្ឌកម្មរដ្ឋបាលស្របតាមច្បាប់ ស្តីពី​សារពើពន្ធ។

វិស័យអចលនទ្រព្យត្រូវបានគេមើលឃើញថា មិនទាន់មានស្ថានភាពល្អនៅឡើយ ក្រោយពីវិបត្តិកូវីដ-១៩មក។ អ្នកជំនាញមើលឃើញថា វិស័យនេះ នៅតែមានដំណើរការមិនសូវល្អរហូតដល់ដើមឆ្នាំ ២០២៤។ ប៉ុន្តែអាចនឹង​មានដង្ហើមដកឡើងវិញ នៅចុងឆ្នាំដដែលនេះ។

អ្នកឧកញ៉ា លាង ម៉េង អនុប្រធានសមាគមឧកញ៉ាកម្ពុជា និងជាអគ្គនាយកក្រុមហ៊ុន Chip Mong Group បានលើកឡើងនៅក្នុងវេទិកាធុរកិច្ចឆ្នាំ២០២៣កាលពីពេលថ្មីៗនេះថា ដើមឆ្នាំ ២០២៤ ស្ថានភាពវិស័យ​អចលនទ្រព្យ មិនទាន់ល្អប្រសើរនោះទេ ប៉ុន្តែវិស័យនេះ នឹងចាប់ផ្តើមល្អឡើងវិញនៅអំឡុងខែ តុលា ឆ្នាំដដែលនេះ។ អ្នកឧកញ៉ា សង្ឃឹមថា រាជរដ្ឋាភិបាលថ្មី ដែលយល់ច្បាស់អំពីស្ថានភាពនេះ អាចនឹងមានយុទ្ធសាស្រ្ត​គន្លឹះធ្វើឱ្យវិស័យ​អចលន​ទ្រព្យកម្រើកឡើងវិញ ដូចកាលឆ្នាំ ២០១៨កន្លងទៅ ដែលមានសេដ្ឋកិច្ចខ្លាំង៕