​សមាគមគាំទ្រគោលនយោបាយកសិកម្មរបស់រាជរដ្ឋាភិបាលថ្មី​

លោក សុខ រ៉ាដែន ប្រធានក្រុមប្រឹក្សាសមាគមវារីវប្បករកម្ពុជានៅថ្ងៃទី ២៥ ខែសីហា ឆ្នាំ ២០២៣នេះ បានថ្លែងគាំទ្រកម្មវិធីនយោបាយរបស់រាជរដ្ឋាភិបាលនិតិកាលទី៧ ដែលថ្នាក់ដឹកនាំសុទ្ធតែយុវជនបន្តវេន ដែលនឹងមានចក្ខុវិស័យវែងឆ្ងាយលើវិស័យកសិកម្ម។

លោកសង្ឃឹមថា គណៈរដ្ឋមន្ត្រីឈាមថ្មីនឹងមានចក្ខុវិស័យវែងឆ្ងាយធ្វើដំណើរទៅមុខល្អ ប្រសិទ្ធិភាពខ្ពស់ ដែលអ្នកដឹកនាំថ្មីមានចំណេះដឹងខ្ពស់ហើយធ្វើឱ្យវិស័យគ្រប់យ៉ាងរីកចម្រើនប្រកួតប្រជែងជាមួយបរទេស។

ប្រធានសមាគមវារីវប្បករកម្ពុជារូបនេះ ក៏អំពាវនាវឱ្យរាជរដ្ឋាភិបាលថ្មី ​បន្តកសាងហេដ្ឋារចនាសម្ព័ន្ធធារាសាស្ត្រឱ្យបានរឹងមាំ ដើម្បីទប់រក្សាទឹកទុកនៅរដូវប្រាំង។

លោក សុខ រ៉ាដែន បន្ថែមថា៖ «កន្លងមកយើងមានប្រឡាយ ប៉ុន្តែទឹកមានតែខែវស្សា ឯខែប្រាំងក៏អស់ទឹកតាមហ្នឹង កន្លែងបឹងបួរខ្លះក៏ដូចគ្នា អញ្ចឹងយើងត្រូវការកសាងហេដ្ឋារចនាសម្ព័ន្ធប្រឡាយ អាងស្តុកទឹកទាំងនោះ ទប់ទឹកដើម្បីយើងប្រើប្រាស់នៅខែប្រាំង»។

សូមជំរាបផងដែរថា រាជរដ្ឋាភិបាលនិតិកាលទី ៧ ថ្មី បានប្រកាសគោលនយោបាយអាទិភាព ៦ ចំណុចសម្រាប់ចាប់ផ្ដើមអនុវត្តក្នុងឆ្នាំ ២០២៣។ ក្នុងនោះ រាជរដ្ឋាភិបាលបានដាក់ចេញនូវយន្តការលើកស្ទួយផលិតកម្ម និងរកទីផ្សារ និងរក្សាលំនឹងថ្លៃកសិផលរបស់កសិករ។

ចំណែកឯគោលនយោបាយមួយទៀតគឺការដាក់ពង្រាយមន្ត្រីបច្ចេកទេសកសិកម្មទៅគ្រប់ឃុំ-សង្កាត់ ដែលមានសកម្មភាពសកសិកម្មនៅទូទាំងប្រទេស ដើម្បីជំរុញការលើកកម្ពស់ផលិតភាពកសិកម្ម និងជួយដល់គ្រួសារកសិករ៕