ជិះកង់ឆ្លង ៦ប្រទេស ទីបំផុតលោក ទីវ តារារិទ្ធិ នាំយកថវិកាជាង ៥ម៉ឺនដុល្លារ ជូនមន្ទីរពេទ្យកុមារអង្គរ

នាព្រឹកថ្ងៃទី ២៦ ខែសីហា ឆ្នាំ២០២៣នេះ ថ្នាក់ដឹកនាំ និងក្រុមការងារមន្ទីរពេទ្យកុមារអង្គរ បានធ្វើដំណើរទទួលស្វាគមន៍ លោក ទីវ តារារិទ្ធិ ដោយជិះកង់រួមគ្នាចេញពីស្រះស្រង់ ទៅកាន់បរិវេណមន្ទីរពេទ្យកុមារអង្គរ។ ក្នុងឱកាសនេះ ថ្នាក់ដឹកនាំ បុគ្គលិកមន្ទីរពេទ្យកុមារអង្គរ រួមនឹងអ្នកគាំទ្រជាច្រើនរបស់តារារិទ្ធិ បានស្វាគមន៍យ៉ាងអធិកអធម នៅក្នុងបរិវេណ​មន្ទីរពេទ្យកុមារអង្គរ។

កម្មវិធីស្វាគមន៍នេះ​ ធ្វើឡើងបន្ទាប់ពីយុវជនរូបនេះ បានបំពេញបេសកកម្មជិះកង់ចម្ងាយ ៩៧៥០ គីឡូម៉ែត្រ ធ្វើដំណើរក្នុងប្រទេសអាស៊ានចំនួន ៦ប្រទេស ដោយប្រើពេលជិត៣ខែ។ ក្នុងដំណើរដ៏វែងឆ្ងាយ ជួបឧបសគ្គជាច្រើន អ្នកជិះកង់រូបនេះ បានរៃអង្គាសថវិកាពីសប្បុរសជនតាមតំបន់បណ្តាប្រទេសរួមមាន វៀតណាម ឡាវ សិង្ហបុរី ម៉ាឡេសុី ថៃ និងកម្ពុជា សរុបចំនួន ៥៦ ២៥៧ ដុល្លារអាមេរិក ($56,257) ។

ឆ្លៀតក្នុងឱកាសនេះ បើតាមមន្ទីរពេទ្យកុមារអង្គរ ក៏មានការប្រគល់ពានលើកទឹកចិត្ត និង ថ្លែងអំណរគុណដល់អ្នក​ជិះកង់​ផ្សងព្រេងរូបនេះ ចំពោះនូវការលះបង់កម្លាំងកាយចិត្ត ជិះកង់ផ្សងព្រេងម្នាក់ឯង ដើម្បីរៃអង្គាសថវិកាជូនដល់មន្ទីរពេទ្យកុមារអង្គរ។ ជាមួយគ្នានេះ មន្ទីរពេទ្យក៏អរគុណដល់សប្បុរសជនទាំងអស់ ដែលបានបរិច្ចាគថវិកាផ្ទាល់ខ្លួន និងគាំទ្រសកម្មភាពមនុស្សធម៌នេះ។

គួរបញ្ជាក់ថា កម្មវិធីជិះកង់សប្បុរសធម៌ “Southest Asia Bike Touring for Charity” ក្នុងតំបន់អាស៊ីអាគ្នេយ៍ ធ្វើឡើងដើម្បីរៃអង្គាសថវិកាជូនមន្ទីរពេទ្យកុមារអង្គរ ដោយមានការឯកភាពពីនាយកមន្ទីរពេទ្យកុមារអង្គរ វេជ្ជបណ្ឌិត ងួន ច័ន្ទភក្ត្រា ។ ក្នុងដំណើរបេសកកម្មនេះ លោក ទីវ តារារិទ្ធិ បានចាប់​ផ្តើមចេញដំណើរ​តាំងពីថ្ងៃទី ០១ ខែមិថុនា និងបានឆ្លងកាត់ឧបសគ្គរាប់មិនអស់ ទម្រាំមកដល់ទឹកដីនៃក្រុងសៀមរាប កាលពីម្សិលមិញនេះ៕

អត្ថបទ៖ សុធាវី

ដើម្បីជួយកុមារកម្ពុជា អ្នកស្ម័គ្រចិត្ត ២រូប ព្រមជិះកង់ឆ្លងប្រទេសតំបន់អាស៊ីអាគ្នេយ៍ និងអឺរ៉ុប រៃអង្គាសប្រាក់