ព័ត៌មានជាតិ

ឯកឧត្ដម ហ៊ុន ម៉ានី ជួបសំណេះសំណាល ថ្លែងអំណរគុណក្រុមការងារ និងរចនាសម្ព័ន្ធ គណៈកម្មាធិការគណបក្សឃុំហោងសំណំ ស្រុកឱរ៉ាល់

បានផុស

១ year មុន

នៅ

ថ្ងៃសៅរ៍ ២៦ សីហា ២០២៣

ដោយ

កាលពីព្រឹកថ្ងៃទី ២៦ ខែសីហា ឆ្នាំ ២០២៣ នេះ ឯកឧត្ដម ហ៊ុន ម៉ានី អនុប្រធានទី ១ នៃក្រុមការងារគណបក្សចុះជួយខេត្តកំពង់ស្ពឺ បានអញ្ជើញជួបសំណេះសំណាល និងថ្លែងអំណរគុណដល់ក្រុមការងារ និងរចនាសម្ព័ន្ធ គណៈកម្មាធិការគណបក្សឃុំហោងសំណំ ស្រុកឱរ៉ាល់ ខេត្តកំពង់ស្ពឺ ដើម្បីអបអរសាទរជ័យជម្នះជារួមរបស់គណបក្សប្រជាជនកម្ពុជាទូទាំងប្រទេស និងដោយឡែកសម្រាប់ឃុំហោងសំណំ ដែលទទួលបានជ័យជម្នះលេខ ១ ក្នុងស្រុកឱរ៉ាល់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មានប្រសាសន៍ក្នុងអង្គពិធី ឯកឧត្ដម ហ៊ុន ម៉ានី បានថ្លែងអំណរគុណចំពោះក្រុមគ្រួសារគណបក្សប្រជាជនកម្ពុជា ជាពិសេសរចនាសម្ព័ន្ធគណបក្សប្រជាជនកម្ពុជា ឃុំហោងសំណំ និងក្រុមការងារចុះជួយឃុំទាំងអស់ ដែលខិតខំប្រឹងប្រែងរួមគ្នាធ្វើឲ្យគណបក្សទទួលបានជ័យជម្នះយ៉ាងត្រចះត្រចង់ និងអបអរសាទរជារួមរបស់គណបក្សប្រជាជនកម្ពុជាទូទាំងប្រទេស និងដោយឡែកសម្រាប់ឃុំហោងសំណំ ដែលទទួលបានជ័យជម្នះលេខ ១ ក្នុងស្រុកឱរ៉ាល់ បានផ្ដល់ឱកាសឲ្យក្រុមការងារ និងប្រជាពលរដ្ឋ មកជួបជុំគ្នាដូចតាមសន្យា កាលពីថ្ងៃទី ១៥ ខែកក្កដា ឆ្នាំ ២០២៣ ក្នុងយុទ្ធនាការឃោសនាបោះឆ្នោតកន្លងទៅ។

ទន្ទឹមនឹងការអបអរសាទរនេះ ឯកឧត្ដម បានផ្ដាំផ្ញើការសាកសួរសុខទុក្ខពីសំណាក់ថ្នាក់ដឹកនាំគណបក្សប្រជាជនកម្ពុជា គឺ សម្ដេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា គឺ សូមថ្លែងអំណរគុណចំពោះរចនាសម្ព័ន្ធគណបក្សទាំងអស់ ក្រុមការងារចុះជួយស្រុក ឃុំ ជាពិសេសប្រជាពលរដ្ឋ ចំពោះការខិតខំប្រឹងប្រែងលះបង់ទាំងពេលវេលា កម្លាំងកាយចិត្ត និងចេញទៅបោះឆ្នោតជូនគណបក្សប្រជាជនកម្ពុជា ដែលនាំឲ្យគណបក្សទទួលបានជ័យជម្នះយ៉ាងធំធេងក្នុងការបោះឆ្នោតនីតិកាលទី ៧ កាលពីថ្ងៃទី ២៣ ខែកក្កដា ឆ្នាំ ២០២៣ កន្លងទៅនេះ។

ជាមួយគ្នានេះ ឯកឧត្ដម ក៏បានលើកឡើងផងដែរថា ទោះបី សម្ដេចតេជោ ហ៊ុន សែន លាលែងពីតំណែងនាយករដ្ឋមន្ត្រីកម្ពុជា តែ សម្ដេច នៅបន្តជាបង្អែករបស់ប្រជាពលរដ្ឋ និងមិនទៅណាចោលប្រជាពលរដ្ឋឡើយ។

ជាមួយនោះ ឯកឧត្ដម បានផ្ដាំផ្ញើការសាកសួរសុខទុក្ខ និងការថ្លែងអំណរគុណពីសំណាក់ ឯកឧត្ដមកិត្តិទេសាភិបាលបណ្ឌិត ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ផងដែរ ចំពោះការជឿទុកចិត្ត និងបោះឆ្នោតគាំទ្រជូនគណបក្សប្រជាជនកម្ពុជា។ បន្ថែមពីនេះ ឯកឧត្ដម បានមានប្រសាសន៍ថា «សូមជឿជាក់លើការដឹកនាំរបស់ ឯកឧត្ដមកិត្តិទេសាភិបាលបណ្ឌិត ដែល ឯកឧត្ដម គឺជាថ្នាក់ដឹកនាំដែលមានឆន្ទៈខ្ពស់ក្នុងការបន្តថែរក្សាសន្តិភាព ស្ថិរភាពនយោបាយ ការអភិវឌ្ឍលើគ្រប់វិស័យ និងធ្វើឲ្យសង្គមសេដ្ឋកិច្ចកម្ពុជាមានការរីកចម្រើនឆ្ពោះទៅមុខបន្ថែមទៀត»៕