គម្រោងសង់សណ្ឋាគារផ្កាយ៥ រោងចក្រម្ហូបអាហារ និងសម្លៀកបំពាក់តម្លៃជាង ៩៦លានដុល្លារ​នឹងកើតឡើងនៅភ្នំពេញ

ក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីគម្រោងវិនិយោគចំនួនបី រួមមាន ការសាង​សង់សណ្ឋាគារលំដាប់ផ្កាយ៥ រោងចក្រកកែច្នៃម្ហូបអាហារ និងរោងចក្រសម្លៀកបំពាក់ តម្លៃជាង ៩៦លានដុល្លារ ដោយបានបង្កើតការងារជាង ៣ពាន់កន្លែងដល់ពលរដ្ឋ នៅរាជធានីភ្នំពេញ។

យោងតាមរបាយការណ៍របស់ក្រុ​មប្រឹក្សាអភិវឌ្ឍន៍កម្ពុជា បានបង្ហាញគម្រោងទាំងបីនេះ រួមមាន៖

១-“KHOU TOWER CO., LTD” គម្រោងសាងសង់ និងអាជីវកម្មសណ្ឋាគារថ្នាក់ផ្កាយ ៥ ចំនួន ២៣៧បន្ទប់ ដែលមានទីតាំងវិនិយោគស្ថិតនៅកាច់ជ្រុងមហាវិថីព្រះមុនីវង្ស (៩៣) កែងផ្លូវលេខ ៨៨ និងលេខ ៧៥ ភូមិ៩ សង្កាត់​ស្រះចក ខណ្ឌដូនពេញ រាជធានីភ្នំពេញ ក្នុងទុនវិនិយោគប្រមាណ ៨៤,៥ លានដុល្លារអាម៉េរិក និងអាចបង្កើតការងារ​បានចំនួន ៨៥៥កន្លែង។

២-“AL JAZEELAN FOOD PTE. LTD” គម្រោងបង្កើតរោងចក្រកែច្នៃម្ហូបអាហារ ដែលមានទីតាំងវិនិយោគ​ស្ថិតនៅភូមិសំរោងទាវ សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ ក្នុងទុនវិនិយោគប្រមាណ ៥,៦លាន​ដុល្លារ​អាម៉េរិក និងអាចបង្កើតការងារបានចំនួន ១២៥កន្លែង។

៣- “KUNBO STYLE APPAREL CO., LTD” គម្រោងបង្កើតរោងចក្រកាត់ដេរសម្លៀកបំពាក់ ដែលមាន​ទីតាំងវិនិយោគស្ថិតនៅភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ ក្នុងទុនវិនិយោគប្រមាណ ៥,២លាន​ដុល្លារអាម៉េរិក និងអាចបង្កើតការងារបានចំនួន ២.០៤១នាក់។

សូមបញ្ជាក់ថា រាជធានីភ្នំពេញ គឺជាតំបន់ប៉ូលសេដ្ឋកិច្ចទី១ ដ៏សំខាន់របស់កម្ពុជា ដែលអ្នកវិនិយោគតែងសម្លឹង​ដក់ជាប់​ក្នុងចិត្ត ក្នុងគោលបំណងបង្កើតគម្រោងវិនិយោគផ្សេងៗ៕