ព័ត៌មានជាតិ

កម្ពុជាបញ្ជូនទ័ពមួកខៀវ១៨៤នាក់ទៅបំពេញបេសកកម្មអង្គការសហប្រជាជាតិនៅប្រទេសលីបង់

បានផុស

៤ years មុន

នៅ

ថ្ងៃចន្ទ ១ កុម្ភៈ ២០២១

ដោយ

កម្ពុជាបានបញ្ជូនកងវិស្វកម្មកម្លាំងមួកខៀវ១៨៤នាក់ ក្នុងនោះមានកម្លាំងនារី៣០នាក់ចេញទៅបំ ពេញបេសកកម្មរបស់អង្គការសហប្រជាជាតិនៅសាធារណៈរដ្ឋលីបង់ដើម្បីធ្វើការប្តូរវេនកម្លាំងចាស់ក្នុងគោលបំណងស្វែងរកសន្តិភាពសម្រាប់ប្រទេសមួយនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាយឧត្តមសេនីយ៍ សែម សុវណ្ណនី អនុប្រធានគណៈកម្មាធិការជាតិ និងជាអគ្គនាយកមជ្ឈមណ្ឌលជាតិរក្សាសន្តិភាព ក្នុងពិធីជូនដំណើរកងទ័ពមួកខៀវនៅអកាសយាន្តអន្តរជាតិភ្នំពេញ នៅល្ងាចថ្ងៃទី៣១ ខែមករា ឆ្នាំ២០២១ ថ្លែងឱ្យដឹងថា នេះជាលើកទី១១ហើយ ដែលកម្ពុជានឹងបញ្ជូនកម្លាំងទៅ កាន់សាធារណរដ្ឋលីបង់ ដើម្បីស្វែងរកសន្តិភាពជូនប្រទេសនេះ។កម្លាំងមួកខៀវកម្ពុជាចេញទៅបំពេញបេសកកម្មនេះ គឺបញ្ជូនទៅដើម្បីប្តូរកម្លាំងចាស់ដែលត្រូវ បញ្ចប់បេសកកម្មរយៈពេល១ឆ្នាំ នឹងមកវិញនៅថ្ងៃទី២ ខែកុម្ភៈ ឆ្នាំ២០២១។

នាយឧត្តមសេនីយ៍ មានប្រសាសន៍បន្តថា ការបញ្ជូនកងវិស្វកម្មទាំង១៨៤នាក់ ត្រូវចេញទៅបំពេញបេសកកម្មនេះ ក៏មានអមដោយកម្លាំងដោះមីនផងដែរ គឺជាកម្លាំងបានទទួលវគ្គហ្វឹកហ្វឺនជំនាញត្រឹមត្រូវតាមស្តង់ដាររបស់អង្គការសហប្រជាជាតិ ដែលកម្លាំងទាំងនោះមានមកពីស្ថាប័ន ចំណុះផ្ទាល់ក្រសួងការពារជាតិ កម្លាំងចំណុះមជ្ឈមណ្ឌលជាតិ អគ្គបញ្ជាការដ្ឋាន បញ្ជាការដ្ឋានទ័ពជើងទឹកបញ្ជាការដ្ឋានកងទ័ពអាកាស បញ្ជាការដ្ឋានជាតិប្រឆាំងភេវរកម្ម និងពីស្ថាប័នទ័ពមួយចំនួនទៀត។

គួរបញ្ជាក់ថា ចាប់តាំងពីឆ្នាំ២០០៦មក កម្ពុជាបានបញ្ជូនកម្លាំងចំនួនសរុបជាង៧៣០០នាក់ ក្នុងនោះមានស្ត្រីចំនួនជាង៤៥០នាក់ ទៅចូលរួមបេសកកម្មរបស់អង្គការសហប្រជាជាតិ។បច្ចុប្បន្នកម្ពុជាមានកម្លាំងចំនួនជិត១០០០នាក់ ដែលកំពុងបំពេញបេសកកម្មនៅប្រទេសចំនួន៥ រួមមាន ប្រទេសស៊ូដង់ ស៊ូដង់ខាងត្បូង អាហ្វ្រិកកណ្តាល លីបង់ និងម៉ាលីដែលធ្វើឲ្យកម្ពុជាក្លាយជាប្រទេសបរិច្ចាគកម្លាំងរក្សាសន្តិភាពច្រើនជាងគេលំដាប់ទី២នៅក្នុងតំបន់អាស៊ាន៕

អត្ថបទ ៖ សំអឿន