លោក ស ថេត ត្រូវបានប្រកាសចូលកាន់តំណែងជាអគ្គស្នងការនគរបាលជាតិ ជាផ្លូវការហើយ

នៅរសៀលថ្ងៃទី២៨ ខែសីហា ឆ្នាំ២០២៣នេះ លោក ស ថេត ត្រូវបានប្រកាសចូលកាន់តំណែងជាអគ្គស្នងការនគរបាលជាតិ ជាផ្លូវការហើយ ក្រោមវត្តមានរបស់លោក ស សុខា ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ។

តាមព្រះរាជក្រឹត្យរបស់ព្រះមហាក្សត្រនៃកម្ពុជា ចុះថ្ងៃទី២៣ ខែសីហា ឆ្នាំ ២០២៣ គឺព្រះមហាក្សត្របានត្រាស់បង្គាប់ដំឡើងឋានន្តរស័ក្តិនាយឧត្តមសេនីយ៍ដល់លោក ស ថេត និងតែងតាំងមុខតំណែងជាអគ្គស្នងការនគរបាលជាតិ ជំនួសលោក នេត សាវឿន ដែលទើបតែងតាំងទៅជាឧបនាយករដ្ឋមន្ត្រីនៃរាជរដ្ឋាភិបាល អាណត្តិទី៧នេះ។

មុនការតែងតាំងនេះ លោក ស ថេត គឺជាអគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ ហើយលោក ក៏ធ្លាប់ធ្វើជាស្នងការនគរបាលខេត្តបាត់ដំបង ផងដែរ៕