ឯកឧត្ដម ហ៊ុន ម៉ាណែត ប្រាប់ក្រុមប្រឆាំងថា ត្រូវគោរពសិទ្ធិ និងឆន្ទៈពលរដ្ឋ ដែលបោះឆ្នោតឲ្យគណបក្សប្រជាជនកម្ពុជាផង

ឯកឧត្ដមបណ្ឌិត ហ៊ុន ​ម៉ាណែត នាយករដ្ឋមន្ត្រីនៃកម្ពុជា បានថ្លែងប្រាប់ដល់ក្រុមប្រឆាំងនៅក្រៅប្រទេស​ថា ត្រូវគោរពសិទ្ធិ និងឆន្ទៈរបស់ប្រជាពលរដ្ឋ ដែលបានទៅបោះឆ្នោត និងបានបោះឆ្នោតឲ្យគណបក្សប្រជាជនកម្ពុជា ឲ្យទទួលបានជ័យជំនះផង។

ការថ្លែងប្រាប់នេះ បានធ្វើឡើងក្នុងពិធីជួបសំណេះសំណាលជាមួយកម្មករ-និយោជិត តាមរោងចក្រ សហគ្រាសចំនួន ១៨.០០០នាក់ នៅតំបន់ព្រៃស្ពឺ ខណ្ឌពោធិ៍សែនជ័យ រាជធានីភ្នំពេញ នាព្រឹកថ្ងៃទី ២៩ ខែសីហា ឆ្នាំ ២០២៣នេះ។

ឯកឧត្ដមបណ្ឌិត ហ៊ុន ​ម៉ាណែត មានប្រសាសន៍ថា ក្រុមប្រឆាំងមុខដដែលៗ តែងតែមិនទទួលស្គាល់លទ្ធផល នៃការបោះឆ្នោតម្ដងឡើយ ហើយអ្វីដែលឯកឧត្ដមចាំជាងគេនោះ គឺក្រុមប្រឆាំងមុខដដែលៗនោះ កាលពីឆ្នាំ ២០១៣ បានដើរស្រែកតាមដងផ្លូវថា បោះឆ្នោតក្លែងក្លាយៗ តែទីបំផុតចូលប្រជុំសភា ក្រោយទទួលបានតំណែងមួយចំនួន។

ឯកឧត្ដមបណ្ឌិត ហ៊ុន ​ម៉ាណែត ថ្លែងបែបនេះថា «អ្នកខ្លះគាត់ថា បោះឆ្នោតខុសច្បាប់ ហើយខ្ញុំឃើញក្រុមដដែលហ្នឹង គាត់មិនដែលទទួលស្គាល់លទ្ធផលពីកាលណាមកពីដើម​ ខ្ញុំចាំជាងគេគឺឆ្នាំ ២០១៣ គាត់ស្រែកបោះឆ្នោតក្លែងក្លាយ បោះឆ្នោតស្អីៗ តែទីបំផុតគាត់ទទួលលទ្ធផលនៅពេលដែលចែកតំណាងក្នុងសភា»។

នាយករដ្ឋមន្ត្រីកម្ពុជា ក៏បានលើកឡើងដែរអំពីក្រុមគណបក្សប្រឆាំងនៅក្រៅប្រទេស ដឹកនាំសកម្មជន និងអ្នកគាំទ្ររបស់គេធ្វើបាតុកម្ម មិនទទួលស្គាល់រាជរដ្ឋាភិបាលថ្មី ដោយឯកឧត្ដមលើកឡើងថា ការធ្វើបាតុកម្មជាសិទ្ធិរបស់ពួកគេ តែក៏ត្រូវគោរពសិទ្ធិអ្នកបោះឆ្នោតជាង ៨លាននាក់ ដែលបានទៅបោះឆ្នោត និងបោះឆ្នោតជូនគណបក្សប្រជាជនកម្ពុជា ផង។

ឯកឧត្ដមបណ្ឌិត ហ៊ុន ​ម៉ាណែត មានប្រសាសន៍បែបនេះថា «ប៉ុន្តែបងប្អូនត្រូវគោរពផងដែរណា សិទ្ធិរបស់ប្រជាជន ៨លាន ២សែននាក់ ដែលទៅបោះឆ្នោត ហើយត្រូវគោរពសិទ្ធិ និងឆន្ទៈរបស់ប្រជាពលរដ្ឋ ៦លាននាក់ជាង ដែលបោះឆ្នោតឲ្យគណបក្សប្រជាជន សូមគោរពអាហ្នឹងផង ហើយហ្នឹងហើយជាការបោះឆ្នោតពិតប្រាកដ»៕