ផ្លូវលំមួយខ្សែរងការខូចខាតធ្វើឱ្យប្រជាពលរដ្ឋនៅភូមិអន្លង់ក្រមួនជួបការលំបាកក្នុងការធ្វើដំណើរ

ផ្លូវមួយខ្សែរងការខូចខាតយ៉ាងធ្ងន់ធ្ងរដោយសារទឹកភ្លៀងជោគជាំ រថយន្តតូចធំដឹកលើសទម្ងន់រួមផ្សំ និងគ្មានគុណភាពផងនោះ ធ្វើឱ្យផ្លូវមួយខ្សែនេះក្លាយជាបញ្ហាប្រឈមទៅលើប្រជាពលរដ្ឋនៅភូមិអន្លង់ក្រមួនឃុំស្រែ ឬស្សីស្រុកថាឡាបរិវ៉ាត់ ពិបាកធ្វើដំណើរទៅមកជារៀងរាល់ថ្ងៃ។

លោក សាង ណាក់ ជាប្រជាជននៅភូមិអន្លង់ក្រមួននៅក្នុង ឃុំស្រែឬស្សីស្រុកថាឡាបរិវ៉ាត់ខេត្តស្ទឹងត្រែងបានបញ្ជាក់ថា៖ ផ្លូវស្ថិតក្នុងស្ថានភាពបែបនេះ ពេលបងប្អូនយើងធ្វើដំណើរទៅមកបើខ្វះការប្រុងប្រយ័ត្ន ប្រសិនបើកបរលឿនអាចកើតមានគ្រោះថ្នាក់ចរាចរណ៍ ហើយម៉ូតូធន់អន់រលុតក្នុងទឹកក៍មាន។

លោកមានសុខសាន អនុភូមិអន្លង់ក្រមួនបានទទួលស្គាល់ថា៖ ផ្លូវខូចមានប្រវែងជិត១០០ម៉ែត្រតែប៉ុណ្ណោះដែលបង្កភាពលំបាក់ ហើយអាជ្ញាធរភូមិបានរាយការទៅឃុំរួចហើយតែមកដល់ពេលនេះគ្នានថ្នាក់ដឹកនាំណាមួយមកមើលទេភាពលំបាករបស់ប្រជាជនចេះតែអូសបន្លាយ។

លោកបន្តថា ប្រជាពលរដ្ឋយើងនៅតំបន់នេះគ្មានបច្ចេកទេស និងលទ្ធភាពក្នុងការជួសជុលទេ ក្នុងនាមខ្ញុំតំណាងប្រជាពលរដ្ឋនៅទីនេះ សូមឱ្យខាងអភិវឌ្ឃន៍ជនបទមេត្តាចុះជួសជុល ប្រវែងវាប្រហែលតែ៧០ម៉ែត្រទេ មិនវែងដែរទេ ដោយ​ឡែក​ខាងភូមិពួកខ្ញុំ ពុំមានលទ្ធភាពទេព្រោះប្រជាជនយើងឥឡូវនេះ បើរៃអង្គៀសលុយ ពួកគាត់ក៏គាត់អត់មានដែរ ព្រោះខែនេះគាត់ដាច់លុយដាច់អីអស់ហើយ។

ពាក់ព័ន្ធការស្នើសុំនេះលោក សន សាររឿន អភិបាលស្រុកថាឡាបរិវ៉ាត់បានបញ្ជាក់ថា៖ នេះជាគម្រោងខាងមន្ទីរអភិវឌ្ឍជនបទ ខ្សែផ្លូវរបស់មន្ទីរអភិវឌ្ឍជនបទគេថែទាំទាល់តែសួរបញ្ជាក់ទៅខាងមន្ទីរអភិវឌ្ឍជនបទ។

ជាមួយការលើកឡើងនេះលោកព្រំចាន់ថា ប្រធានមន្ទីរអភិវឌ្ឍជនបទខេត្តស្ទឹងត្រែងបានបញ្ជាក់ថា៖ ខាងមន្ទីរពុំមានកញ្ចប់ថវិកា សម្រាប់ធ្វើការជួសជុលទេ តែលោកនិងឱ្យមន្ត្រី ជំនាញចុះទៅសិក្សា ដើម្បីលើកគម្រោងដាក់ចូលទៅក្នុងផែនការសិន ហើយទទួលបានកញ្ចាប់ថវិកាទើបទៅជួសជុលបាន។

សូមបញ្ជាក់ថា៖ផ្លូវលំមួយខ្សែនេះមានប្រវែងជាង៤០គីឡូម៉ែត្រ ចូលពីផ្លូវជាតិលេខ៩ទៅឃុំស្រែឬស្សី ឆ្ពោះទៅឃុំអន្លុងជ្រៃនិងឃុំសំអាង ដែលជាផ្លូវមានប្រយោជន៍សំខាន់នៅក្នុងមូលដ្ឋានទីជនបទ ទើបមានការស្នើឱ្យជួសជុលបន្ទាន់ បម្រាប់ប្រជាពលរដ្ឋធ្វើចរាចរណ៍ទៅមក កូនចៅទៅសាលារៀន និងផ្នែកមួយបានលើកកម្ពស់ផ្នែកសេដ្ឋកិច្ចគ្រួសារប្រជាពលរដ្ឋផងដែរ៕

អត្ថបទ៖ ងិនលីម