អ្នកលក់ជ្រូកខ្វៃថា ឆ្នាំនេះដាច់គួរសម គ្រាន់តែមុនថ្ងៃសែនក្បាលទឹក១ថ្ងៃ លក់បាន ៣០-៤០ក្បាល

គិតត្រឹមម៉ោង ៤រសៀល ថ្ងៃទី២៩ ខែសីហា ឆ្នាំ២០២៣ អ្នកលក់ជ្រូកខ្វៃ យីហោ ចិនខ្មៅជ្រូកខ្វៃ បញ្ជាក់ប្រាប់កម្ពុជាថ្មីថា នៅថ្ងៃនេះ គាត់លក់ជ្រូកខ្វៃបាន ៣០-៤០ក្បាល ដោយទទួលបានការកុម្ម៉ង់មុនខ្លះ និងមានអ្នកមកទិញផ្ទាល់ខ្លះ។ សម្រាប់​ជ្រូកខ្វៃ​ដែល​លក់ដាច់​ជាងគេ គឺជ្រូកខ្មែរ តម្លៃ ៤០ម៉ឺនរៀល ៥០ម៉ឺនរៀល និង ៧០ម៉ឺនរៀល។

អ្នកលក់ជ្រូកខ្វៃរូបនេះ បានឱ្យដឹងថា នៅរសៀលនេះ ការលក់របស់គាត់មមាញឹកខ្លាំងណាស់ ដោយសារតែស្អែកនេះ ជាថ្ងៃសែនក្បាលទឹក ដែលប្រជាពលរដ្ឋមានសែស្រឡាយចិន តែងប្រារព្ធធ្វើ​ជា​រៀងរាល់​ឆ្នាំ ជាហេតុធ្វើឱ្យកន្លែងគាត់មានអតិថិជន​​ចាស់ថ្មី មក​ទិញ​ច្រើន​គួរសម ពិសេស​សម្រុកទិញខ្លាំងនៅល្ងាចនេះតែម្តង។
អ្នកលក់រូបនេះ​បន្ថែមដែរថា ដោយសារតែបច្ចុប្បន្ន ទីផ្សារលក់ជ្រូកខ្វៃមានច្រើន ដូចនេះការលក់របស់គាត់ អាចលក់បានក្នុងកម្រិតមួយប៉ុណ្ណោះ។

បើតាមអ្នកលក់ជ្រូកខ្វៃ បើប្រៀបធៀបនឹងឆ្នាំមុនក្រោយបញ្ហាកូវីដ ការលក់មានភាពប្រហាក់ប្រហែលគ្នា អាចចាត់ទុកថា កើនការលក់ឡើងវិញ បន្ទាប់ពីអំឡុងពេលមានវិបត្តិបញ្ហាកូវីដកើតឡើង៕

អត្ថបទ៖ សុធាវី