អាជ្ញាធរខេត្តស្វាយរៀង បើកកិច្ចប្រជុំពិភាក្សាលើការប្រើប្រាស់ដីស្ថានីយ៍ផ្សព្វផ្សាយ និងស្ដារឡើងវិញ ព្រៃឈើក្រសាំង

នៅព្រឹកថ្ងៃទី៣០ ខែសីហា ឆ្នាំ២០២៣ លោក ម៉ែន អេង អភិបាលរងខេត្តស្វាយរៀង តំណាងអភិបាលខេត្ត បានចូលរួមកិច្ចប្រជុំពិភាក្សាលើករណីនៃការប្រើប្រាស់ដីស្ថានីយ៍ផ្សព្វផ្សាយ និងស្ដារឡើងវិញ ព្រៃឈើក្រសាំង ស្ថិតក្នុងស្រុករមាសហែក ខេត្តស្វាយរៀង។

កិច្ចប្រជុំនេះ មានការចូលរួមពីសំណាក់លោកអភិបាលស្រុករមាសហែក លោកប្រធានមន្ទីរកសិកម្ម រុក្ខាប្រមាញ់ និងនេសាទខេត្ត លោកប្រធានមន្ទីររៀបចំដែនដី នគររូបនីយកម្ម សំណង់ និងសូរិយោដីខេត្ត លោកប្រធានមន្ទីរបរិស្ថាន លោកប្រធានមន្ទីរព័ត៌មានខេត្ត លោកនាយកទីចាត់ការអន្តរវិស័យសាលាខេត្ត លោកអធិការនគរបាលស្រុករមាសហែក លោកមេបញ្ជាការមូលដ្ឋានកងរាជអាវុធហត្ថស្រុករមាសហែក លោកប្រធានផ្នែករដ្ឋបាលព្រៃឈើស្រុក លោកប្រធានការិយាល័យគ្រប់គ្រងការអភិវឌ្ឍន៍ និងសំណង់សាលាខេត្ត លោកប្រធានការិយាល័យសូរិយោដីភូមិបាលស្រុក លោក លោកស្រីមេឃុំ អណ្ដូងត្របែក, ក្រសាំង, ត្រស់ និងអ្នកដែលពាក់ព័ន្ធជាច្រើនរូបទៀត។

លោក ម៉ែន អេង អភិបាលរងខេត្ត បានលើកឡើងថា អាជ្ញាធរស្រុក-ឃុំ ត្រូវបង្កេីនការយកចិត្តទុកដាក់ឲ្យបានខ្ពស់លេីការងារមួយនេះ ក្នុងការចុះត្រួតពិនិត្យដីស្ថានីយ៍ផ្សព្វផ្សាយ និងស្តារឡេីងវិញ ព្រៃឈេីក្រសាំងជាប្រចាំ។ ចាប់ពីពេលនេះ តទៅបេីសិនជាប្រជាពលរដ្ឋមួយណានៅតែបន្តធ្វេីសកម្មភាពចាប់យកដីស្ថានីយ៍ផ្សព្វផ្សាយ និងស្តារឡេីងវិញ ព្រៃឈេីក្រសាំង យកមកធ្វេីជាកម្មសិទ្ធិផ្ទាល់ខ្លួនទៀត សូមអាជ្ញាធរដែលមានសមត្ថកិច្ចអនុវត្តន៍តាមនីតិវិធីផ្លូវច្បាប់៕

ដោយ៖ ភក្ដី