រដ្ឋសភា ប្រកាសសុពលភាព នៃអាណត្តិរបស់បេក្ខជនជាប់ឆ្នោតតំណាងរាស្ត្រចំនួន ២៩រូប

រដ្ឋសភា បានប្រកាសអំពីសុពលភាព នៃអាណត្តិរបស់បេក្ខជនជាប់ឆ្នោតតំណាងរាស្ត្រ នីតិកាលទី ៧ នៃរដ្ឋសភាចំនួន ២៩រូប ជំនួសតំណាងរាស្ត្រដែលបានសុំលាលែង ដើម្បីទៅបំពេញតួនាទីភារកិច្ចផ្សេង។

ការប្រកាសនេះ បានធ្វើឡើងសម័យប្រជុំលើកទី ១ នីតិកាលទី ៧ ក្រោមអធិបតីភាពលោកជំទាវ ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា នាព្រឹកថ្ងៃទី ៣១ ខែសីហា ឆ្នាំ ២០២៣នេះ។

លោកជំទាវ ឃួន សុដារី បានប្រកាសថា បេក្ខជនជាប់ឆ្នោតតំណាងរាស្ត្រចំនួន ២៩រូប ជំនួសតំណាងរាស្ត្រដែលបានសុំលាលែង ត្រូវបានប្រកាសសុពលភាព នៃអាណត្តិរបស់ខ្លួន ចាប់ពីថ្ងៃនេះតទៅ។

នៅល្ងាចថ្ងៃទី ៣១ ខែសីហា ឆ្នាំ ២០២៣ដដែលនេះ បេក្ខជនជាប់ឆ្នោតជាតំណាងរាស្រ្ដទាំង ២៩រូប នឹងត្រូវ អញ្ជើញចូលរួមធ្វើសច្ចាប្រណិធាន នៅក្នុងព្រះទីនាំងទេវាវិនិច្ឆ័យ ព្រះបរមរាជវាំង៕