ក្រសួងមហាផ្ទៃស្វែងរកជនទុច្ចរិត បើកបង្ហៀរទឹកក្នុងអគារ ចំថ្ងៃសែនក្បាលទឹក ដើម្បីចាត់ការតាមច្បាប់

អ្នកនាំពាក្យនៃក្រសួងមហាផ្ទៃបានប្រកាសថា គណៈកម្មការសាងសង់អគារ កំពុងបន្តនីតិវិធីស្រាវជ្រាវរកអត្តសញ្ញាណបុគ្គលដែលលបលួចបើកក្បាលទុយោទឹក និងបុគ្គលដែលទម្លាយវីដេអូចេញទៅខាងក្រៅ ដើម្បីចាត់ការតាមច្បាប់ និងអនុវត្តវិន័យតាមលក្ខន្តិកៈមន្ត្រីនគរបាលជាតិ។​ ក្រសួងមហាផ្ទៃ បានចេញមកប្រកាសបែបនេះ ក៏ព្រោះតែមានជនទុច្ចរិតលបលួចបើកបង្ហៀរទឹកនៅក្នុងអគាទីស្ដីការក្រសួងមហាផ្ទៃ ក្នុងជាន់ទី៥ អំឡុងថ្ងៃសែនក្បាលទឹក។

អ្នកនាំពាក្យបានអះអាងថា គណៈកម្មការសាងសង់អគារ បានរកឃើញថាមាន បុគ្គលមិនស្គាល់អត្តសញ្ញាណម្នាក់បានឆ្លៀតឱកាសនៅចុងម៉ោងធ្វើការលបបើកក្បាលទុយោទឹកសម្រាប់សង្គ្រោះបន្ទាន់ករណីមានអគ្គិភ័យ ធ្វើឱ្យទឹកហូរចេញមក។ គណៈកម្មការសាងសង់អគារ ក៏បានរកឃើញមន្ត្រីនគរបាលថ្នាក់អនុសេនីយ៍ឯកម្នាក់ ជាអ្នកថតវីដេអូសកម្មភាព ប៉ុន្តែ ពុំទាន់ដឹងថា តើបុគ្គលណាជាអ្នកទម្លាយវីដេអូចេញទៅខាងក្រៅនៅឡើយ។

តាមសេចក្តីសន្និដ្ឋានរបស់គណៈកម្មការសាងសង់អគារ គឺករណីនេះ ពុំមែនបណ្ដាលមកពីលក្ខណៈបច្ចេកទេសសំណង់នោះឡើយ គឺអាចជាចេតនាទុច្ចរិតរបស់បុគ្គលដែលមិនសប្បាយចិត្ត នឹងសមិទ្ធផលដ៏ល្អវិចិត្រផូរផង់ក្រោមការគ្រប់គ្រងចាត់ចែងរបស់គណៈកម្មការសាងសង់អគារថ្មីនេះ ក្នុងបំណងមិនល្អធ្វើឱ្យប៉ះពាល់កិត្តិយសរបស់គណៈកម្មការសាងសង់អគារ។

អ្នកនាំពាក្យបន្តអះអាងថា ទោះបីកាមេរ៉ាសុវត្ថិភាពពុំទាន់បំពាក់រួចរាល់គ្រប់ជ្រុងនៅឡើយ ក៏គណៈកម្មការសាងសង់អគារ បានកំពុងបន្តនីតិវិធីស្រាវជ្រាវរកអត្តសញ្ញាណបុគ្គលដែលលបលួចបើកក្បាលទុយោទឹក និងបុគ្គលដែលទម្លាយវីដេអូចេញទៅខាងក្រៅ ដើម្បីចាត់ការតាមច្បាប់ និងអនុវត្តវិន័យតាមលក្ខន្តិកៈមន្ត្រីនគរបាលជាតិ។ ជាមួយគ្នានេះ អ្នកនាំពាក្យក្រសួងមហាផ្ទៃបានគូសរំលេចថា ក្រោយហេតុការណ៍កើតឡើង គណៈកម្មការសាងសង់អគារបានចាត់វិធានការភ្លាមៗ និងគ្រប់គ្រងបានទាន់ពេលវេលាមិនបណ្តាលឱ្យមានហានិភ័យអ្វីនោះឡើយ៕​

អត្ថបទដោយ​៖ ង៉ិល ណារ៉ាត់