នាយករដ្ឋមន្ត្រី ណែនាំឲ្យលោក ឃួង ស្រេង ត្រៀមរថយន្តក្រុងដឹកពលរដ្ឋទៅស្រុកកំណើត ក្នុងឱកាសបុណ្យភ្ជុំបិណ្ឌ

នាយករដ្ឋមន្ត្រីនៃកម្ពុជា ឯកឧត្ដមប​ណ្ឌិត ហ៊ុន ម៉ាណែត បានណែនាំឲ្យអភិបាលរាជធានីភ្នំពេញ ត្រៀមរថយន្តក្រុងសាធារណៈដឹកប្រជាពលរដ្ឋ ជាពិសេសកម្មករ-កម្មការនីទៅស្រុកកំណើត ក្នុងឱកាសពិធីបុណ្យភ្ជុំបិណ្ឌខាងមុខនេះ។

ការណែនាំនេះ បានធ្វើឡើងគ្រាដែលឯកឧត្ដមបណ្ឌិត ហ៊ុន ម៉ាណែត អញ្ជើញចុះជួបសំណេះ សំណាលជាមួយកម្មករ-និយោជិតជិត ២ម៉ឺននាក់ នៅក្រុងតាខ្មៅ ខេត្តកណ្តាល នៅព្រឹកថ្ងៃទី ១ ខែកញ្ញា ឆ្នាំ ២០២៣នេះ។

នៅក្នុងពិធីជួបសំណេះសំណាលនេះ ឯកឧត្ដមប​ណ្ឌិត ហ៊ុន ម៉ាណែត បានណែនាំជាថ្មីឲ្យរដ្ឋមន្ត្រីក្រសួងការងារលោក ហេង សួរ ត្រូវពិភាក្សារឿងប្រាក់ឈ្នួលកម្មករ-និយោជិត ក្នុងវិស័យកាត់ដេរសំលៀកបំពាក់ឆ្នាំ ២០២៤ ឲ្យបានចប់មុនពិធីបុណ្យភ្ជុំបិណ្ឌ ដើម្បីពួកគាត់មានដំណឹងល្អនៅពេលទៅស្រុកកំណើត។

ឯកឧត្ដមប​ណ្ឌិត ហ៊ុន ម៉ាណែត មានប្រសាសន៍ថា «នៅក្នុងមានការរៀបចំ និងសម្របសម្រួលការអនុវត្ត និងបង្កើនការ ចចារប្រាក់អប្បបរមា ធ្វើម៉េចឲ្យបានចប់មុនភ្ជុំបិណ្ឌ ដើម្បីបងប្អូនបានលទ្ធផលល្អទៅផ្ទះ»។

បន្ថែមពីលើនេះ ឯកឧត្ដមប​ណ្ឌិត ហ៊ុន ម៉ាណែត ក៏បានណែនាំឲ្យលោក ឃួង ស្រេង អភិបាល នៃគណៈអភិបាលរាជ ធានីភ្នំពេញ រៀបចំរថយន្តក្រុងសាធារណៈដឹកប្រជាពលរដ្ឋ ជាពិសេសកម្មក-កម្មការនីទៅស្រុកកំណើត ក្នុងឱកាសពិធីបុណ្យភ្ជុំបិណ្ឌខាងមុខនេះ ផងដែរ។

ឯកឧត្ដមប​ណ្ឌិត ហ៊ុន ម៉ាណែត បានណែនាំបែបនេះថា «​ឯកឧត្ដម សូមត្រៀមរថយន្តទៀត ត្រៀមរថយន្ត សម្រាប់ដឹក ជូនបងប្អូនកម្មករ-កម្មការនីទៅស្រុក ពេលទៅលេងភ្ជុំបិណ្ឌឲ្យសប្បាយ ឡានក្រុងឥឡូវសុទ្ធតែទំនើប ម៉ាស៊ីនត្រជាក់ ថ្ងៃមុនពេលបោះឆ្នោតលេង សុទ្ធតែឡានថ្មីប៉ុន្មានរយគ្រឿងណោះ»៕