ពលរដ្ឋខេត្តបាត់ដំបង ១៧៥ គ្រួសារ ដាច់ទឹកប្រើប្រាស់ដោយសារភាពរាំងស្ងួត

ប្រជាពលរដ្ឋប្រមាណ១៧៥គ្រួសារ បាននិងកំពុងដាច់ទឹកប្រើប្រាស់ និងទឹកបរិភោគ ស្របពេលដែលមេឃ​មិនអំណោយផល ធ្លាក់ភ្លៀងទាល់តែសោះ រីឯកម្តៅកាន់តែបង្កើនថែមទៀត។

ដោយយោងទៅលើភាពចាំបាច់ នៅថ្ងៃទី ៣១ ខែសីហា ឆ្នាំ ២០២៣ កន្លងទៅនេះ លោក ទេព ហន អភិបាលស្រុក​មោងឫស្សី បានដឹកនាំកម្លាំង ផ្នែកសណ្ដាប់ធ្នាប់ស្រុក សហការជាមួយកម្លាំង នគរបាលប៉ុស្តិ៍រដ្ឋបាលតាលាស់ បានចេញរថយន្តអគ្គីភ័យមួយគ្រឿង ផ្ទុកទឹកស្អាតពេញស៊ីទែន ដើម្បីចុះជួយពលរដ្ឋដែលកំពុងដាច់ទឹកប្រើប្រាស់ និងទឹកសម្រាប់បរិភោគ។

ការចែកជូនប្រជាពលរដ្ឋ ដែលជួបការរាំងស្ងួតដោយគ្មានទឹកប្រើប្រាស់ និងទឹកបរិភោគ ប្រចាំថ្ងៃចំនួន ១៧៥ គ្រួសារនេះ គឺនៅភូមិស្រករ និងភូមិបាណោក ឃុំ តាលាស់ ស្រុកមោងឫស្សី ខេត្តបាត់ដំបង ដែលកំពុងប្រឈមនិងបញ្ហា។

បច្ចុប្បន្នលោកអភិបាលស្រុកកំពុងរិះរកវិធី ដើម្បីធ្វើយ៉ាងណាឱ្យទឹកហូរតាមប្រព័ន្ធធារាសាស្ត្រ ទៅដល់ភូមិដែលធ្លាប់​ជួបគ្រោះរីងស្ងួតដ៏ធ្ងន់ធ្ងរនេះ ដើម្បីបញ្ចៀសនូវគ្រោះទុរ្ភិក្សដោយការខ្វះទឹកនេះ៕

អត្ថបទ : សោ និយមរ័ត្ន