អាជ្ញាធរខេត្តកំពត ណែនាំ​​ពលរដ្ឋកុំឲ្យបោះចោលសំរាម​​ និងកាកសំណល់ចូលក្នុងប្រឡាយព្រែកជីក

នៅថ្ងែទី ១ ខែកញ្ញា ឆ្នាំ២០២៣ លោក សេង សិរីបុត្រ អភិបាលរងខេត្តកំពតបានលើកឡើងនៅក្នុងវេទិកាផ្សព្វផ្សាយសាធារណៈ​​ស្តីពីយុទ្ធនាការក្នុងការលើកកម្ពស់ទីក្រុងស្អាត​នៃគម្រោងអភិវឌ្ឍន៍ជាទីក្រុងរបៀង ២ ដែលធ្វើឡើងនៅស្ថានីយ​បូមទឹក និងចម្រោះទឹកកខ្វក់នៅប្រឡាយព្រែកជីកជាបណ្ដាញផ្លូវរំដោះទឹកមួយយ៉ាងសំខាន់របស់ក្រុងកំពតខេត្តកំពត ដើម្បីបញ្ជៀសការទឹកជំនន់ជនលិចក្រុងពេលរដូវវស្សាមានភ្លៀងធ្លាក់ច្រើននៅថ្ងៃមុខ។

លោក សេង សិរីបុត្រ អភិបាលរងខេត្តកំពតបានលើកឡើង​ថា បន្ទាប់​ពីបញ្ចប់គម្រោងស្តារប្រឡាយរួចមកឃើញថាក្រុងកំពតគ្មានការជន់​លិចទៀតនោះទេក្នុងនោះមានសោភណភាពតំបន់ប្រឡាយស្អាតគ្មានក្លិនស្អុយដូចពីមុន។ លោក​អភិបាលរងខេត្តបានស្នើដល់សិស្សានុសិស្ស និងប្រជាពលរដ្ឋដែលរស់នៅតាមបណ្ដោយព្រែកជីកសូមកុំបោះចោលសំរាមចូលព្រែក ដែល​បង្កឲ្យស្ទះផ្លូវទឹក និងបាត់បង់សោភណភាព។

លោក ពូ ម៉ានិត តំណាង​ឲ្យ​លោក វង្ស ពិសិដ្ឋ អនុរដ្ឋលេខាធិការក្រសួងសាធារណការនិងដឹកជញ្ជូនបានឲ្យដឹងដែរថា ការជំរុញផ្សព្វផ្សាយបរិស្ថានអនាម័យទីក្រុងស្អាត អាចនាំមកនូវសេដ្ឋកិច្ចនិងទាក់ទាញភ្ញៀវទេសចរណ៍ជាតិភ្ញៀវទេសចរអន្តរជាតិមកលេងច្រើន ដូច្នេះសូមពលរដ្ឋចូលរួមថែរក្សាប្រឡាយព្រែកជីកនេះឲ្យបានស្អាតជានិច្ច។

នៅក្នុងវេទិការផ្សព្វផ្សាយសាធារណៈស្តីពីយុទ្ធនាការលើកកម្ពស់ទីក្រុងស្អាត នៃគម្រោងអភិវឌ្ឍន៍ទីក្រុងរបៀង ២ ក៏មានការរៀបចំដើរដង្ហែក្បួនតាមបណ្តោយផ្លូវដងព្រែកជីក ចេញដំណើរពីសាលាបឋមសិក្សាកំពង់កណ្តាល រហូតមកដល់ស្ថានីយបូមទឹកនិងចម្រោះទឹកកខ្វក់ ដើម្បីផ្សាព្វផ្សាយសារអប់រំសំខាន់ៗមួយចំនួន ពិសេសការផាកពិន័យចំពោះអ្នក​ចោល​សំរាមផ្តេសផ្តាសពី ២ ម៉ឺន ទៅដល់២០ម៉ឺនរៀល៕

អត្ថបទ៖ សឹង រ៉ាត់